نبشتانک: درامدیں شھر ءِ درامدیں کبر
نبشتہ کار: مھروان کمبر
دی بلوچستان پوسٹ
بیست ءُ چار ساھت ءَ گیش گْوستگ اَت کہ آ درامدیں شھرے ءِ درامدیں مردُماں ، درامدیں کبرے ءَ پہ ابدی واپینتگ اَت ءُ من انگت ھمے جیڑگ ءُ ھیالاں چہ در نہ یتکگ اِت آں کہ اے وڑ چوں بوت کنت،یکّیں دمان ءَ زندگی چوں دْروہ اِیت ۔آئی ءَ زان ءَ کُجا زِندگی ءِ بھار دیستگ اِت اَنت ، بلکیں آ نوکی چاردہ سال ءِ ورناھے اَت۔ نوک بروت ءِ سبزگ ءَ اِت اَنت، ڈلگیں چمّ ، بُرزیں پونز ءُ سبزیں لُنٹ آئی ءِ شیر سبزی ءِ گوائی ءَ دَیَگ ءَ اِت اَنت۔
بلے آ زندگی ءَ چو نیم بیلیں ساھگ ءِ پیم ءَ دروہ اِتگ اَت ءُ آ درامدیں شھرے ءِ درامدیں کبرستان ءَ درامدیں مردُماں درامدیں کبرے ءِ میار کُتگ اَت۔
ھَو! آ زندگی ءَ دْروہ اِتگ اَت، آئی ءِ واب ، واھگ ءُ واھشت، لوٹ ءُ ارمان ، وشّی ، ٹھک ءُ بچکند دُرست آئی ءِ پجّیگ ءَ ھاکانی میار کنگ بوتگ اِت اَنت چونائی ءَ آئی ءِ واھِشت ءُ ارمان ، آئی ءِ کودکی ھما روچ ءَ ھلاس بیتگ اِت اَنت کہ آئی ءَ وتی سرزمین ءِ سر ءَ، وتی ھند ءُ دیاراں اولی رند ءَ بوٹ پادیں سپاھیگانی دْروشم ءَ درامدیں مردُم دیستگ اِت اَنت۔ بلے آئی ءَ واب گندگ بس نہ کُتگ اَت ءُ نیکہ آئی ءِ دیستگیں واب اَھد ءِ زُوراکاں پچ گپت کُتگ اِت اَنت۔ ھمے وابانی شوھاز ءَ آ دُور ءُ درامدیں ھند ءُ دیاراں درکپتگ اَت۔
آئی ءَ وتی کسانی شر یات اَت ءُ مُدام ھمے کِسّھے کُت اَنت کہ چوں وتی سرڈگار ءِ سر ءَ وتی لیبوھاں گوں دلگوش اَت کہ بوٹ پادیں سپاھیگاں آیانی گِس انگر کُت اَنت ءُ آئی ءِ لیبوھانی پجّیگ ءَ آیانی گِس، پیژگاہ ءِ شریش ءُ سبزیں چنال، باگ ءِ اَمب ءُ لیمبو ءُ مچ آس دات اَنت آئی ءِ سیاد ءُ ازیز آوار جَت ءُ شھید کُت اَنت ءُ آدرامدیں مُلکے ءِ درامدیں شھرے ءَ درامدیں مردُمانی تہ ءَ درانڈیھیں زِندے ءِ گْوازینگ ءَ لاچار بوت اَنت۔
منی ءُ آئی ءِ آشنائی ءِ سپر ھما روچ ءَ چہ بِندات بوت کہ آ وتی برات ءُ گْوھار ، ایندگہ درانڈیھ بیتگیں زھگانی ھمرائی ءَ منی گْور ءَ پہ وانگ ءِ ھاتر ءَ اتکگ اَت۔ اولی رند ءَ کہ آئی ءِ نیمگ ءَ من اِشارہ کُت ءُ جُست کُت تئی نام؟-
پہ ادب پاد اتک اُوشتات ، دست ءِ دلبند ءِ سر ءَ بست اَنت ءُ گوشت ئے منی نام ھمید بلوچ من پد ءَ جُست کُت ھمید بلوچ تو پرچا وانگ لوٹ ئے ؟ آئی ءِ سبزیں لُنٹانی سر ءَ پُرشتگیں بچکندے تالان بوت ءُ کمے بے توار بُوَگ ءَ رند درّائینت ئے وانگ ھژدری اِنت من چم پچیں کُورے بُوَگ نہ لوٹ آں ، منی لھتیں واب اَنت کہ من ءَ سرجم کنگی اَنت اے واب ھما وھد ءَ پورہ بَہ اَنت کہ من بہ واناں ءُ وت ءَ بہ زان آں ، وتی راج ءَ بہ زان آں اے دُگنیا ءَ بہ زان آں۔ زُوراک ءِ دست ءَ اچ من پُلگ بیتگیں بازیں چیزانی من ءَ شوھاز اِنت، من ءَ وتی شوھاز اِنت، ھما ھمید ءِ شوھاز اِنت کہ آئی ءِ کسانی ءِ لیبوکانی پجّیگ ءَ زُوراک ءِ دست ءَ وت گار ءُ بیگواہ بوت ءُ درامدیں مُلکے ءِ درامدیں شھرے ءَ درامدیں مردُمانی تہ ءَ درامدیں زندگی ءِ گْوازینگ ءَ لاچار بوت اے دُرست وانگ ءَ گوں بندوک اَنت من واناں ءُ چیزّے زان آں ، گُڑا وتی شوھاز ءَ در کپاں ءُ رھن بوتگیں ڈگار ءَ موکاں ۔ زُوراک ءِ دست ءَ من گار بوتگیں ھمید ءَ پولاں
آئی ءِ وانگ ءِ سپر انگت سرجم نہ اَت ، بلکیں آئی ءَ انگت بازیں چیزّے دربرگی ءُ بازیں سارت ءُ گرمے گندگی اَت چی ءَ کہ نوکی زندگی ءِ پیچ ءُ تابیں دمکانی تہ ءَ سپر کنگی اَت، گُژن ءُ تُنّ سگگی اَت نوکی آئی ءَ تراولیں پاداں گوں پند بُرگی اَت کہ زندگی ءَ درامدیں مُلکے ءِ درامدیں شھرے ءَ درامدیں دگے ءَ دْروہ اِت ءُ درامدیں کبرستانے ءِ درامدیں کبرے ءِ میار کُت۔
آ روچی آئی ءِ گُڈّی پیپر اَت۔ کسی گُمان ءَ نہ اَت کہ اے درامدیں شھر ءَ مروچی آئی ءِ زندگی ءِ گُڈّی روچ اِنت۔ مُدامی دُرستاں چہ رند وتی پیپرے ھلاس کُت ءُ من ءَ دات ءُ گْوشت ئے ، ھواریں سر! دو روچ ءِ چُٹّیاں چہ پد پدا دُچار کپیں ، شُت دیم پہ وتی سائیکل ءَ کہ آئی ءِ برات ءُ گْوھار ساری ءَ آئی ءِ ودار ءَ اِت اَنت۔ سائیکل اسٹارٹ بوت، گیٹ ءَ چہ ڈن دراتک۔ لھتیں کدم دُور درامدیں شھر ءِ درامدیں چارراہ ءِ سر ءَ درامدیں ٹرکے ءَ ڈیک وارت ءُ کپت اَنت۔ نزّیک ءِ پارک ءَ نِشتگیں درامدیں مُرگانی ھواری ءَ آئی ءِ ارواہ ءَ ھم بال کُت۔ کش ءُ گور ءَ آئی ءِ شنگ اِتگیں کتاب، کلم ءُ کاپیانی پجّیگ ءَ ھزاری ئیں واب ھم شنگ ءُ شانگ بیتگ اِت اَنت۔
بیست ءُ چار ساھت ءَ گیش گْوستگ کہ آ درامدیں شھرے ءِ درامدیں کبرستان ءَ درامدیں کبرے ءَ پہ مُدامی واپینگ بوتگ کہ اُود ءِ دُرستیں مُردگ درامدیں زُبانے ءِ واھند اَنت درامدیں زُبانے ءَ گپ جن اَنت ءُ آ ھر کس ءَ چہ درامد اِنت، بلے آئی ءِ چمّانی دیستگیں شنگ ءُ شانگیں واب انگت درامد نہ بوتگ اَنت ، ءُ الم اے واب یکروچے مانا بَہ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت