روکپتی بلوچستان ءَ وتکشی ءَ ھوار دو کس بیران، دو بیگواہ

تفتان ءَ یکے ءَ وتکشی کرتگ، سراوان ءَ یک مردمے ءِ جون دزکپتگ، چھبار ءَ ایرانی چیریں ادارھانی دست ءَ دو کس بیگواہ

سر بیتگیں ھالانی رد ءَ روکپتی بلوچستان ءِ دمگ تفتان ءَ گوستگیں روچ ءَ نوک آباد ءَ کسان سالیں زھگے ءَ وتکشی کتگ ءُ بیران بیتگ –

بیران بیتگیں زھگ ءِ اُمر چاردہ سال گوشگ بیگ ءَ اِنت ءُ آئی ءِ نام طاھا ھاجی عبدی ھاشمی زئی ءِ نام ءَ زانگ بیتگ-

وتکشی ءِ سوب زانگ نہ بیتگ، ھمے سال ءَ چکانی وتکشی کنوکیں زھگانی تہ ءَ گیشی اتکگ کہ گوستگیں ماہ ءَ بنگلان ءِ گیشدان ءَ یک زھگے ءَ وتکشی کتگ ءُ وت ءَ کُشتگ –

ھمے وڑ ءَ سراوان ءِ دمگ ءِ زیارت ءَ مسلم نامیں زھگے ءَ ھم وتکشی کتگ ءُ وت ءَ کُشتگ، اھوالکار ءِ رد ءَ اے سال ءِ بندات ءَ زھگانی وتکشیانی تہ ءَ اے سیمی وئیل اِنت –

ھمے وڑ ءَ سراوان ءِ شھر ءَ یک مردمے ءِ جون دزکپتگ، جون مروچی دزکپتگ –

اھوالکار ءِ رد ءَ دزکپتگیں جون ءِ پجار مجید آسکانی ء اسھاک جھمنند گنوش بمپشت ءِ نندوک گوشگ بیتگ –

اھوالکار ءِ رد ءَ مجید ءَ گوستگیں روچ ءَ وتی دکان ءَ دراتکگ ءُ دیم پہ وتی گس ءَ روگ ءَ بیتگ کہ ناشناسیں سلاہ بندیں مردماں آوار جتگ ءُ برتگ –

اھوالکار ءِ رد ءَ مروچی آئی ءِ جون دزکپتگ ءُ مجید بنکی ءَ بمپشت ءِ نندوک اِنت کہ انو سراوان ءَ نندوک بیتگ- مجید ءِ گیشتریں وھد دکانداری ءَ گوستگ ءُ آئی ءِ کوش ءِ سر ءَ دمگی مردماں پدردی درشان کتگ –

ھمے وڑ ءَ گوستگیں روچ ءَ پھرہ ایرانشھر ءَ ھم ناشناسیں مردمانی تیرگواری ءَ یکے مردمے بیران بیتگ کہ آئی ءِ نام حسین شھلی بر ءِ نام ءَ زانگ بیتگ –

ھمے وڑ ءَ چھبار ءَ ایرانی چیریں ادارھاں دو کس آوار جتگ ءُ برتگ اَنت، آوار جنگ بیتگیں مردمانی پجار احسان ءُ ھبیب ءِ ناماں زانگ بیتگ اَنت –

اھوالکار ءِ رد ءَ ھردوکیں مردم بیست روچ ءَ پیسر آوار ءُ جنگ بیتگ اَنت مروچی آ بلوچستان ءِ بنجاھی شھر دزاپ ءَ دیم ءَ آرگ بیتگ ءُ مزنیں زندان ءَ بندیگ کنگ بیتگ اَنت –

اھوالکار ءِ رد ءَ تنی وھدی ھردوکانی مردمانی دزگیری ءِ بارہ ءَ ایرانی چیریں ادارھاں ھچ گپ دیم ءَ نیاؤرتگ اَنت-

زانگ بہ بیت روکپتی بلوچستان ءَ بازیں مردمے ھمے رنگ ءَ زندانی کنگ ءُ آ پاھو دیگ بیتگ اَنت ءُ بازیں کچے ءَ مردم تنی وھدی گار ءُ بیگواہ اَنت –

چرے وئیلانی سر ءَ چاگردی رسانکجاہ ءَ روکپتی بلوچستان ءَ ھوار انسانی ھکانی گل ھم ایر جنگ ءَ اَنت –