وائس فار بلوچ مسنگ پرسنز ءِ زھرشانی بنجل شال ءَ برجم

مستونگ وئیل ءِ درگت ءَ سرجمیں بلوچ راج ءَ ڈن ءَ درآیگی انت دنیا ءَ پیشدارگی انت ما چونیں ریاستی زوراکیانی آماچ انت – ماما قدیر بلوچ

وائس فار بلوچ مسنگ پرسنز ءِ زھرشانی بنجل بلوچستان ءِ بنجاھی شھر شال ءَ برگ بوتگ – سارتی ءِ سوب ءَ بنجل سندھ ءِ مزن شھر کراچی پریس کلب دیم ءَ سَے ماہ ءَ تاں برجاہ دارگ بوتگ –

بیگواھیں بلوچانی ھاتر ءَ برجاھیں زھرشانی بنجل ءِ رھشونی ءَ وائس فار بلوچ مسنگ پرسنز ءِ وائس چیرمین ماما قدیر بلوچ کنگ ءَ انت – مروچی زھرشانی بنجل ءَ چارھزار ءُ دوسد ءُ چل ءُ دو روچ سرجم بوتگ – مروچی نیشنل ڈیموکریٹک پاٹی ءِ رھشون ءُ دگہ پگری منوگراں زھرشانی بنجل ءِ تر ءُ تاب کُتگ –

ھمے وھد ءَ ماما قدیر بلوچ ءَ وتی ھیال درشان اتگ ءُ گوشتگ کہ زالم ءُ ایردستانی میان ءَ چِلاں کش برجاہ انت، زوراکانی اے کار ءَ سک دیر انت کہ آ مدامی ایردستانی جُھدے ھلاس کنگے ھاتر ءَ آھاں سرے بازار تیرانی آماچ کن انت آھاں زورانسری آوار جن انت ءُ بیگواہ کن انت، آ ھمے پھم انت کہ چریشی ءَ آ جھد ءَ ھلاس کن انت –

آئی ءَ دیمتر ءَ گوشتگ کہ گوستگیں روچ ءَ مستونگ ءَ دروگیں میڑ ءِ نام ءَ آوار جنگ بوتگیں بیگواھیں مردمانی کوش بلوچستان ءِ تھ ئِے ریاستی پالیسی ءَ درشان ءَ کنگ انت – اے مردمانی تہ ءَ سمیع پرکانی ءُ جمیل پرکانی پاکستانی پوج ءَ شال ءِ تہ ءَ سرےبازار آوار جتگ انت کہ آھانی درگت ءَ کھول ءِ مردماں ارزی ھم نبشتہ کنائینتگ وھدیکہ ایندگہ مردم پاکستانی چیریں ادارھاں آوار جتگ ءُ بیگواہ کتگ انت –

ماما قدیر بلوچ ءَ گوشتگ پنچیں مردم دروگیں میڑ ءِ نام ءَ کُشگ بوتگ انت – اے وئیل ءِ درگت ءَ بس لھتے گلاں ابید ایندگہ کہ وت ءَ راجدوست گُش انت ایدگرانی ھاموشی بازیں جست ءِ ودی کنت –

گڈسر ءَ ماما قدیر بلوچ ءَ گوشتگ کہ اے وئیل ءِ درگت ءَ سرجمیں بلوچ راج ءَ ڈن ءَ درآیگی انت دنیا ءَ پیشدارگی انت ما چونیں ریاستی زوراکیانی آماچ انت –