تربت: یک سالے ءِ تہ ءَ شش زالبولانی کوشانی وئیل پدردی اِنت – تربت سول سوسائٹی

تربت سول سوسائٹی ءِ جارکش ءَ گوستگیں روچ ءَ تربت ءَ یک زالبولے ءَ ھوار دو مردمانی کوش ایر جتگ ءُ وئیل ءِ سرجمیں راستیانی دیم ءَ آرگ ءِ لوٹ کرتگ –

جارکش ءَ گوشتگ کہ گوستگیں سال ءَ تربت ءَ جتا جتائیں سوباں شش زالبول کُشگ بیتگ اَنت چریشاِ شھید ملکناز ءِ کشندہ آئی ءِ گھگیری ءِ سوب ءَ گرگ بیتگ اَنت آ دگہ پنچ زالبولانی کشندہ تنی وھدی کانود ءِ گرفت ءَ نیتکگ اَنت –

گوستگیں سال ءَ کُشگ بیتگیں زالبولانی تہ ءَ نامی ئیں بُتکار شاھینہ شاھین ھم ھوار اِنت کہ ایشی ءِ کُشندہ دزگیر نہ بیتگ اَنت –

جارکش ءَ گوشتگ کہ بژنی گپ ایش اِنت کہ سال ءِ سیمی ماہ ءَ یک زالبولے تیر جنگ ءُ کُشگ بیتگ ءُ آئی ءِ کشندہ ھم دزگیر کنگ نہ بیتگ –

جارکش ءَ گوشتگ کہ تربت ءُ مکران ءِ تکاں زالبولانی پھزداری ءُ آجوئی دگہ جاھاں بھتر بیتگ اَنت بلے گوستگیں سال ءُ اے سال ءِ بندات ءَ اے وڑیں دلپدریں وئیلانی دیم ءَ آیگ مکران ءِ رژناہ پگر ءُ پچیں مازگانی جیڑگاں جست دیم ءَ کار اَنت –

جارکش ءَ ڈپتٰ کمشنر کیچ، ڈی پی او کیچ ءُ اُستانی سرکار ءَ چہ لوٹ کرتگ کہ آ گوستگیں شپ ءَ کُشگ بیتگیں زالبول ءُ آئی ءِ ھمراھی ءَ کُشگ بیتگیں بچک ءِ کوشکاراں بہ گپت ءُ کانود ءِ دست ءَ بہ دنت –