پنجگور ءَ لبزانکی دیوان، دیوان ءَ جتا جتائیں بنگپانی سر ءَ باوست بیتگ

بلوچستان ءِ دمگ پنجگور ءَ “پنجگور لٹریری فیسٹول ” برجم دارگ بیتگ فیسٹول ءَ جتا جتائیں بنگپانی سر ءَ باوست بیتگ، بلوچستان ءَ ھواریں بازیں ورناہ، نبشتہ کار، سیاسی ءُ ادبی ءُ چاگردی تکاں بندوکیں مردماں فیسٹول ءَ بھر زرتگ ءُ سیشنز ءَ ھم بھر زرتگ –

فیسٹول ڈگری کالج ءِ آڈیٹوریم ءَ برجم کنگ بیتگ کہ اود ءَ گچینی ءِ مھمانانی تہ ءَ ڈپٹی کمشنر پنجگقر عبدالرزاق ساسولی، سٹلمنٹ آفیسر مکران مھمد یونس سنجرانی ءُ نامی ئیں بلوچ کواس ءُ استاد رھیم بکش مھر، اے آر داد، ملا مراد، ایجوکیشن آفیسر امجد شھزاد، بانک فرزانہ، بانک ھاجرہ، بانک افسانہ، بانک نازیہ آفتاب، اسلم عطاء مھر ءُ دگہ مردم ھوار بیتگ اَنت –

فیسٹول ءِ گر ءُ دار کنوک آرگنائزنگ کمیٹی ءِ شاہ میر شمس بلوچ، نصرت خان، چاکر بلوچ، اقبال ظھیر، نیاز اکبر، عادل بلوچ بیتگ اَنت –

فیسٹول ءَ نبشتانک ءُ دگہ دودمانی چیز پیش کنگ بیتگ اَنت ءُ اے مراگاہ پنجگور ءَ وتی ناماں تہ ءَ ھمے واستا گیش بیتگ چریشی ءِ تہ ءَ بازیں کچے ءَ نودربراں بھر زرتگ –

فیسٹول ءَ کتابجاہ ءَ ھم مردمانی دلگوشی جوانیں رنگے ءَ گندگ ءَ اتکگ کہ اود ءَ جتا جتائیں تکاں کتاب ایر کنگ بیتگ اَنت –

فیسٹول ءَ زالبولانی چاگرد ءَ آیانی کرد ءُ ھکانی بارہ ءَ ھم گپ کنگ بیتگ – فیسٹول ءَ مھمان رھیم بکش مھر اے آر داد ءُ دگہ مھماناں وتی ھیال ءُ لیکہ درشان کرتگ اَنت ءُ گوشتگ کک رابعہ ھزداری بانڑی ءِ دروشم اِنت کہ آئی ءِ رندپداں روان اِنت ءُ دگہ زالبول وتی ناماں ھم برز کت کن اَنت –

آیاں گوشت کہ زبان ءُ دود چاگرد ءِ مستریں ھنڈال اَنت کہ چریشی ءَ ابید ھچ چاگرد وتی ھنڈالاں داشت نہ کنت – بلوچ چاگرد بازیں جنجالانی دیمپان اِنت ورنا اگاں اشی ءِ جوانیں کرد پیلو بہ کن اَنت گڑا اشی ءِ برود ھر نیمگ ءَ براھدار گندگ ءَ کاینت ءُ ورنایاں وتی زمہ واریانی سماہ بہ بیت ءُ کتاب دوستی ءِ دود ھرجاہ بہ بیت –

آیاں گوشت کہ کتاب یک ھنچیں چیزے کہ چراھی ءِ سوب ءَ نا ایوک ءَ مارا رھشونی رس ایت بلکیں چاگرد ءِ تہ ءَ بدلی کیت اِنت –

آیاں گوشت کہ سیاست ءُ زرکاری ھردوک زروی ءُ اژدری اَنت اگاں کسے ءِ تُشے سر بئیت اِنت گڑا چاگرد دیم ءَ شت نہ کنت – چاگردی دیمروئی ءُ زانت ءِ شنگ ءُ شانگ کنگ ءَ شائری ءِ ھواری ءَ ھم بتکشے ءِ ھم اژدری بیت اِنت، بتکش وتی بُتکانی سوب ءَ چاگرد ءِ ندارگانی راستی ءَ پیشداریت، یک بتکارے اگاں دومی انسان ءِ تھ ئِے ندارگ ءُ مارشتاں بیان کنت –

مھماناں فیسٹول ءِ گڈی ءَ منت گپتگ ءُ اے وڑیں مراگاہ دیم ءَ برجم کنگ ءِ اُمیت داشتگ –

زانگ بہ بیت بلوچستان ءِ بازیں جاھاں گیشتر ورنایانی نیمگ ءَ اے وڑیں مراگاہ دارگ بیگ ءَ اَنت ھمے سال ءَ چریشی ءَ پیسر ھب لٹریری فیسٹول، کیچ لٹریری فیسٹسل ءَ بنجاھی شھر شال ءَ سریاب فیسٹول برجم کنگ بیتگ اَنت –

اشاں ابید نودربر گل ایکشن کمیٹی ءِ نیمگ ءَ بلوچستان ءَ ھوار بازیں جاھاں کتاب کاروان ءِ نام ءَ “کتب ڈونیشن “بنجل برجم اَنت –