بلوچستان: تیرگواری وئیل ءَ ھوار دگ ءِ وئیلاں شش مردم بیران، چار زدگ

تربت چوگان کنڈگ ءَ تیرگواری ءَ دو مردم بیران، کلات، چاگی ءُ پنجگور ءَ دگ ءِ وئیلاں چار مردم بیران-

سر بیتگیں ھالانی رد ءَ بلوچستان ءِ کیچ ءِ ھند چوگان ء کنڈگ ءَ تیرگواری ءَ کس بیران بیتگ اَنت –

گیشیں ھالانی رد ءَ تربت چوگان ء کنڈگ ءَ سبی ءِ جھمنندیں یک بچکے گوں ھمراھے جنکے ءَ کُشگ بیتگ اَنت –

ھالانی تہ ءَ گوشگ بیتگ کہ ھردوک ننگ ءِ نام ءَ گوھار ءِ برات ءَ تیرگواری کرتگ ءُ کُشتگ اَنت –

کُشتگیں مردمانی پجار عبدالطیف ء خان مھمد ءُ شریفہ ء کلندر خان ءِ ناماں زانگ بیتگ اَنت ءُ ھردوک ڈھاڈر ءِ نندوک گوشگ بیتگ اَنت –

جون پولیس ءَ چِست کرتگ ءُ دمگ ءِ نادراہ جاہ ءَ رسینتگ اَنت ءُ گیشیں پَٹ ءُ پول بندات بیتگ –

کلات ءَ دگ ءِ وئیل ءَ دو مردم بیران ءُ چار زدگ بیتگ اَنت وئیل کلات ءِ ھند سنگداس ءَ پیش اتکگ –

وئیل ترند روکیں ٹوڈی گاڑی ءِ دیم ءَ آؤکیں ٹرکے ءِ میان ءَ پیش اتکگ- دمگی مردمانی رد ءَ وئیل ءَ کسان سالیں چک گوں ھمراھے پِت ءَ بیران بیتگ ءُ زالبول ءُ چکاں ھوار یکیں کھول ءِ چار مردم زدگ بیتگ اَنت، زدگ بیتگیں مردم نادراہ جاہ ءَ سر کنگ بیتگ اَنت –

پولیس ءِ رد ءَ کلات ءِ شھر ءَ پنج میل دور شال ءُ کراچی ءَ رؤکیں شھدگ ءَ سنگداس ءَ کراچی ءَ دیم پہ شال ءَ رؤکیں ٹوڈی کار ءِ دیم ءَ آؤکیں ٹرک ءخ ٹکر جتگ کہ چریشی ءِ آسر ءَ گاڑی ءَ سواریں رضوان علی ے قائم علی جھمنند کلی شابو شال ءُ آئی ءِ دو ماھی زھگ زاریار بیران بیتگ اَنت زالبول ءُ چکاں ھوات چار مردم زدگ بیتگ اَنت –

ھال ءِ سر بیگ ءَ کلات ءِ پولیس ءُ ایدھی ءِ کارمند سر بیتگ اَنت جون ءُ زدگ بیتگیں مردم نادراہ جاہ ءَ رسینگ بیتگ اَنت –

پولیس ءَ ٹرک ءِ ڈرائیور دزگیر کرتگ ءُ گیشیں پَٹ ءُ پول بندات کرتگ –

ھمے وڑ ءَ بلوچستان ءِ دمگ چاگی ءَ پَرپٹ ءَ یک مردمے کپتگ ءُ بیران بیتگ – وئیل شَے سالار ءَ پیش اتکگ کہ اود ءَ پرپَٹ سوار کپتگ ءُ بیران بیتگ –

نادراہ جاہ ءِ رد ءَ مھمد رمزان نامیں مردمے پَرپٹ ءَ کپتگ ءُ زدگ بیتگ کہ آئی ءَ نادراہ جاہ ءَ ٹپ نہ سگ اِتگ ءُ بیران بیتگ –

ھمے وڑ ءَ پنجگور ءِ دمگ کاٹاگری ءَ سی پیک دگ ءَ گاڑی ءِ وئیل ءَ یک مردمے بیران بیتگ کہ آ نال ءِ جھمنند گوشگ بیتگ –

زانگ بہ بیت بلوچستان ءَ دگ ءِ وئیل روچ پہ روچ گیش بیان اَنت ءُ دگ ءِ وئیلانی گیشتریں سوب دگانی پَرشت ءُ پروش ءپ ڈرائیورانی نادلگوشی ءِ سوب گوشگ بیگ ءَ اَنت –