روکپتی بلوچستان: تیرگواری وئیلاں دو کَس بیران ءُ یکے زدگ

وئیل پھرہ ءُ کسر کند ءَ پیش اتکگ اَنت کہ اود ءَ ناشناسانی تیرگواری ءَ دو کَس بیران بیتگ اَنت ءُ یکے زدگ بیتگ –

سر بیتگیں ھالانی رد ءَ روکپتی بلوچستان ءِ دمگ پھر ءَ ناشناسیں سلاہ بندیں مردمانی تیرگواری ءَ یک مردمے بیران بیتگ ءُ یکے زدگ بیتگ –

اھوالکار ءِ رد ءَ پھرہ ءِ ھند کارگر ءَ ناشناسیں مردماں سواری گاڑی ءِ سر ءَ تیرگواری کرتگ ءُ چریشی ءَ ھسین برھان زئی زدگ بیتگ ءُ سلام ءِ ھاجی دیدگ بیران بیتگ-

وئیل ھما وھد ءَ پیش اتکگ کہ ھسین برھان زئی راہ ءَ وتی گاڑی ءِ سر ءَ روگ ءَ بیتگ کہ ناشناسیں مردماں آئی ءِ سر ءَ تیرگواری کرتگ ءُ آئی ءِ ھمراہ سلام ھاجی دیدگ بیران بیتگ ءُ ھسین برھان زئی زدگ بیتگ –

ھمے وڑ ءَ روکپتی بلوچستان ءِ دمگ کسرکند ءَ ناشناسیں مردمانی تیرگواری ءَ یک مردمے بیران بیتگ –

اھوالکار ءِ رد ءَ گوستگیں روچ ءَ روکپتی بلوچستان ءِ دمگ کسرکند کورسر ءَ ناشناسیں مردمانی تیرگواری ءَ اھمد جدگال بیران بیتگ –

اھوالکار ءِ رد ءَ اھمد جدگال بنکی ءَ پیروسھراب دشتیاری ءِ نندوک اِنت کہ انو آ لوریانی کسرکند ءَ جھمنند بیتگ ءُ اود ءَ آ ٹکسی ء ھلاھینگ ءَ بیتگ –

ھردوکیں وئیلانی بارہ ءَ گیشیں سرپدی نہ بیتگ ءُ روکپتی بلوچستان ءَ وھد وھد ءِ سر ءَ تیرگواری وئیلانی ھال پیداک اَنت ءُ اود ءَ لس مردم زدگ ءُ بیران بیگ ءَ اَنت –

گیشتریں مردم اے وئیلاں سرکار ءِ پُشت ءُ پناھی ءَ سلاہ بند کرتگیں مردمانی سر ءَ لڈگ ءَ اَنت بلے سرکاری تکاں چوشیں گپانی راستی دیم ءَ نیاتکگ اَنت –