کراچی ءَ بیگواھیں بلوچانی ھاتر ءَ زھرشانی برجاہ

باندا شش مارچ ءَ بیگواھیں بلوچانی ھاتر ءَ وائس فار بلوچ مسنگ پرسنز ءِ زھرشانی بنجل دوبر بلوچستان ءِ بنجاھی شھر شال ءَ برگ بیت اِنت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ چِل ءُ سَے روچ سرجم بوتگ – وائس فار مسنگ پرسنز آف سندھ ءِ کنوینئر سورٹھ لوھار، سارنگ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ-

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ تئی یکجاھی لڑاں بنداتی لوٹانی ھاتر ءَ جوانتریں لوٹ انت پرچا کہ درسیں نزریاتی ءُ المی جھلی برزی بازیں گلانی گور ءَ مڈی نہ بوگے سوب ءَ اگاں ایردستیں راجے ئِے تہ ءَ اتھاد ءُ یکجھتی مہ بیت آ چہ ایردستی ءَ رکگ ءُ راجی پُرایمنیں جھد ءِ واب ءَ مانا کُرت نہ کنت –

آئی ءَدیمتر ءَ گوشتگ کہ ھر وڑیں جھد پردی ءُ ٹولیانی بنیاد ءَ دیم ءَ برگ نہ بیت بلکیں اے درسیں چاگردے مھلوک، گیشتریں راج ءِ زانت ءِ ھوار بوگ ءَ دیم ءَ برگ بیت –
ماما قدیر بلوچ ءَ گوشتگ کہ بلوچستان ءَ زورگپتیں تاکتانی تھنا واب ءُ آرام نہ شُتگ بلکیں آ گیشتر زوراک جوڑ بوتگ انت کہ آئی ءِ لگتمالی میان اُستمان ءِ نیمگ ءَ چہ جنگی کانودانی بگیری ءَ بلوچ ءِ چکچینی چہ پوجی لشکر کشیاں آئی ءِ زوراکی پدر انت –

ھمے وھد ءَ ماما قدیر بلوچ ءَ جار پرینتگ ءُ گوشتگ کہ باندا شش مارچ ءَ بیگواھیں بلوچانی ھاتر ءَ وائس فار بلوچ مسنگ پرسنز ءِ زھرشانی بنجل دوبر بلوچستان ءِ بنجاھی شھر شال ءَ برگ بیت – ھمودا شال پریس کلب ءِ دیم ءَ بیگواھیں مردمانی ھاتر ءَ زھرشانی کنگ بیت اِنت –