کراچی ءَ بیگواھیں بلوچانی ھاتر ءَ زھرشانی برجاہ

بلوچستان ءِ تہ ءَ درسیں مردمانی سزا دیگ ءُ آھانی زورانسری آوار جنی رِد یکشل ءَ برجاہ انت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ چِل ءُ یک روچ سرجم بوتگ – بلوچ یکجھتی کمیٹی ءِ باسک ءُ رھشوناں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کُتگ گوشتگ کہ بلوچستان ءِ تہ ءَ روچ ء مروچی مردمانی زورانسری آوار جنی ءِ رِد یکشل ءَ برجاہ انت – درسانی سزا دیگے ھاتر ءَ سیاسی باسک ءُ رھشونانی لوگاں بیڑ برگ ءَ ھوار آھانی سیاد ءُ وارس بیگواہ کنگ بوگ ءَ انت –

آئی ءَ گوشتگ کہ گوستگیں بیست ءُ چار ادارانی میان ءَ ھزدار ءُ جاؤ ءَ پانزدہ مردمانی آوار جنی ءُ بیگواھی ءَ ھوار پسنی وارڈ نمبر شش ءَ پاکستانی پوج بیڑ برتگ ءُ مردمانی سر ءَ زوراکی کُتگ –

آئی ءَ گوشتگ کہ مروچی ھزدار ءِ دمگ باغبانہ ءَ بی این ایم ءِ بنجاھی باسک ڈاکٹر خدابخش بلوچ ءِ لوگ ءَ پاکستانی پوج ءَ بیڑ برتگ ءُ آئی ءِ دو چُک عبدالوحید ءُ نثار احمد زورانسری آوار جتگ ءُ بیگواہ کرتگ انت – وھدیکہ جاؤ ءَ لشکر کشی ءِ میان ءَ سیزدہ مردم زورانسری آوار جتگ ءُ پوجی زنداناں برگ بیتگ اَنت- اھانی پجار جمل ء قادربخش، فیض محمد ء قادربخش، علی بخش ء قادربخش، غوث بخش ء مراد، رمضان ء مراد، ارشد ء مراد، ثناء اللہ ء محمدحسین، منظور ء محمدحسین، یارمحمد ء محمدنور، محمد عارف ء اللہ بخش، عبدالواحد ء رسول بخش، چھٹہ ء الہ یار، رسول بخش ء نورا ءِ ناماں چہ بوتگ انت –

ماما قدیر ءَ گوشتگ کہ بلوچستان ءِ تہ ءَ آس ھون ءِ ندارگ ءَ گیش کنگ ءِ ھاتر ءَ ھمک روچ ریاستی تاکت نوکیں وڑے ءَ انسانی المیہ ءُ زلم ءُ زوراکی دیم ءَ آرگ ءَ انت – ھر ھما دمگے تہ ءَ پُرایمنیں جھدے پراہ ءُ شاھگانیں بنیاد ھست انت اود ءَ ریاستی تاکت سرجمیں بلوچستان ءَ سلاہ بندیں زوراکی وڑ وڑیں پندلاں آھاں نشانگ کنگ ءَ انت –

ماما قدیر بلوچ ءَ گوشتگ کہ ھاکم زمینی راستیاں وتگڑیں کسہ گوش انت چہ بلوچستان ءَ برجاھیں لشکر کشیاں انکاری انت – بلے پوجی کاروائیاں چہ انکار کنگ ءِ ٹاھانی سر ءَ یک دگہ پددراھی گوستگیں لشکر کشی اَنت ۔