کراچی: بلوچ دود ءُ ربیدگی روچ ءِ درگت ءَ بیگواھیں مردمانی یات ءَ روانک

روانک بلوچ یکجھتی کمیٹی ءِ دزبندی ءَ آر ٹس کونسل ءَ بندات بیتگ ءُ شھر ءَ پند ءَ روان بیتگ ءُ بیگواھیں بلوچانی واستا نشتگیں بنجل ءَ سر بیتگ –

دی بلوچستان پوسٹ

روانک ءَ بازیں کچے ءَ زالبول، چکاں ھوار لس مردماں بھر زرتگ ءُ بے تواری ءِ دروشم ءَ بیگواھیں مردمانی یات ءَ روانک بیتگ –

روانک ءَ بھر زیروکیں مردمانی دستاں بیگواھیں مردمانی اکس ءُ روکپتی بلوچستان ءَ ایرانی لشکر ءِ دست ءَ کُشگ بیتگیں مردمانی اکس ءُ بینر بیتگ اَنت کہ آیانی سر ءَ بلوچ پہ چُنڈے نان ءَ بزگ اِنت، روانک ءَ بلوچستان ءِ نامی ئیں گشندہ میر اھمد میر، منھاج مکتار، آسمی ءُ دگہ گشندھانی سوت ھم پِر بیتگ اَنت –

روانک ءَ بلوچی سوت ءُ بیگواھیں گمگینی ءَ لس مردماں وتی درشانی ءَ شھر ءَ تران بیتگ ءُ بیگواھیں مردمانی واستا جتگیں بنجل ءَ سر بیتگ –

روانک ءَ بلوچ یکجھتی کمیٹی ءِ باسکاں ھوار بیگواھیں مردمانی کھول ھوار بیتگ اَنت –

روانک کراچی پریس کلب ءِ دیم ءَ جتگیں وائس فار بلوچ مسنگ پرسنز ءِ بنجل ءَ سر بیتگ ءُ اود ءَ جتا جتائیں مردماں وتی وتی ھیال ءُ لیکہ درشان کرتگ اَنت –

بلوچ دود ءُ ربیدگی روچ ءِ درگت ءَ کراچی پریس کلب ءِ دیم ءَ بلوچ یکجھتی کمیٹی ءِ نیمگ ءَ برجم کرتگیں مُچی ءَ بلوچستان ءَ بیگواہ بیتگیں مردمانی کھولاں ھم تران کرتگ –

بلوچستان ءَ بیگواہ بیتگیں مردمانی کھولانی تہ ءَ ڈاکٹر دین مھمد ءِ جنک، سمی بلوچ، عرب امارات ءَ بیگواھی ءَ پد پاکستان ءَ چیریں ادارھانی دست ءَ دیگ بیتگیں راشد ھسین ءِ برات زتک ماھزیب بلوچ، ھانی بلوچ، سیما بلوچ ءُ کراچی ءَ بیگواہ بیتگیں سلتان سعید ءِ گوھار ءَ ھوار بازیں مردماں تران کرتگ –

ڈاکٹر دین مھمد ءِ جنک سمی ءَ گوشت: مروچی ءِ روچ بلوچ دود ءُ ربیدگی روچ اِنت بلے بلوچستان ءَ ھزارانی مات ءُ گوھار دگانی سر ءَ کپتگ اَنت ھزاراں مات وتی بچانی ودار ءَ نشتگ اَنت ھزاراں کھول ناوشیں زند ءِ گوازینگ ءَ اَنت –

آئی ءَ گوشت کہ زیکیں بلوچاں مروچی ءِ بلوچاں گیشتر سما کرتگ کہ آیاں وتی دود داشتگ بلے بیگواھیں مردمانی یاتگیری ءَ داشتگ –

آئی ءَ گوشت کہ دود تھنا اے نہ اِنت کہ وتی سر ءَ پاگ ءَ بند ءُ ناچ بہ کن دود ءَ اشی ءَ ھم سما بہ کن کہ تئی پیر ءُ آجزیں مات دگانی سر ءَ در پہ در اَنت –

آئی ءَ گوشت کہ اے دو مارچ ءَ ما دیستگ کہ بلوچستان ءِ بازیں گشندھاں وتی جارانکانی تہ ءَ گوشتگ کہ ما اے دو مارچ ءَ ھچ مراگشاں بھر نہ زوریں ءُ اے دو مارچ ءَ ما وتی بے تواری ءَ نندیں ءُ ھزاراں گماں گوں وتی مردماں یات کن ایں –

سمی دین ءَ گوشت کہ ما دراھیں ھما بلوچ، ازمکارانی منت ءَ گراں کہ آیاں روچ ءِ درگت ءَ مئے درد مار اِتگ ءُ دود ءُ ربیدگ بیگواھیں مردمانی یات ءَ کرتگ –

زانگ بہ بیت اے اولی بلوچ دود ءُ ربیدگی روچ اِنت کہ بلوچ یکجھتی کمیٹی ءَ بلوچستان ءِ بیگواھیں مردمانی یات ءَ داشتگ ءُ ھمک سال بازیں جاھاں بلوچ دود ءُ ربیدگی روچ جتا جتائیں دروشماں دارگ بیتگ اَنت –

چِد ءُ پیسر سال دوھزار ءُ دہ ءَ ھزدار یونیورسٹی ءَ بی ایس او آزاد ءِ نیمگ ءَ بلوچ دود ءُ ربیدگی ءِ روچ ءِ بنھشت ایر کنگ بیتگ اَت کہ اود ءَ جوڑ کرتگیں مراگش ءِ سر ءَ سرکار ءِ داشتگیں ڈیتھ اسکواڈ ءِ کارمنداں دزبمباں گوں اُرش کرتگ ءُ چریشی ءَ بی ایس او آزاد ءِ دو باسک بیران ءُ بازیں کچے ءَ نودربر زدگ بیتگ اِت اَنت –

مروچی دو مارچ ءَ چاگردی رسانک جاھاں ھم بلوچ سیاسی مردمانی نیمگ ءَ بیگواھیں مردماں ھوار بلوچستان ءَ پاکستانی پوج ءِ دست ءَ جنگ بیتگیں مردمانی اکساں گوں دارگ بیگ ءَ اِنت –