نبشتانک: بلوچ راجی دود ءُ ربیدگ ءِ روچ ءُ گلامی
نبشتہ کار: شانتُل بلوچ
دی بلوچستان پوسٹ
دنیا ءِ ھر آزات ءُ وتواجھیں راج وتی راجی دود، ربیدگ، پوشاک ءُ وتی راجی زبان ءِ سر ءَ ناز کن اَنت ءُ ھمے دْراھیں چیز راجی مڈّی اَنت کہ زندگیں راجاں ماں میان اُستمانی چاگِرد ءَ یک جُتائیں دْروشم ءُ الکاپیں پجّارے دے اَنت۔ پد ءَ ھمے زِندگیں راج پہ وتی پدریچ ءَ راجی دود ءُ ربیدگانی آگاھی ءُ دیگ ءِ ھاتر ءَ دود ءُ ربیدگی روچے ھم برجم دار اَنت کہ ھمے روچ ءَ زِندگیں راج ءِ شھر ءُ کوچّگاں، دمگ ءُ میتگاں ءُ وانگجاہ ءُ دمکاں راجی سوت ءُ دگہ راجی لیب ءُ گْوازی ءِ مراگش بیت ءُ شپ ءَ دیوان برجم دارگ بنت۔ ھمے دیوان ءُ مراگشاں مستریں کماش مراگاھانی تہ ءَ راجی زُبان، پوشاک ءُ دگہ رواجانی ارزِشت ءُ بستار ءِ بارہ گْوشتانکاں گوشت انت کہ مئے راجی رواج، پوشاک ءُ دود گار مہ بہ بنت ءُ راج ءِ تہ ءَ ھمے دُود مُدام البار بہ بنت ءُ راج ءِ تہ ءَ راجی دود ءُ ربیدگانی بستارے ودی بہ بیت ءُ پد ءَ چہ چوشیں مرگشاں راج ءِ تہ ءَ راجدوستی یے ءِ ودی بیت۔ راج وتی دود ءُ ربیدگ مھکم ءُ زِندگ دار اَنت۔
بزاں اِے شاتکامی ءِ روچے بیت کہ مرد ءُ جنین آدم، ورناہ، کماش، اُستاد ءُ نودربر دْراھیں نوکیں راجی پوشاکاں گور ءَ کن اَنت ءُ شاتکامی ءَ کن اَنت۔
چوناھیگا پہ اِے دْْراھیں مراگشانی اڈ کنگ ءَ وتواجھیں ڈیھ ءِ سرکار وت جار جنت ءُ ھر دمگدار ءِ ھرچگ ءُ کارمستری اے دْراھیں کار بنت نی بیا اِت کمیں بہ جیڑ ایں کہ بلوچ ھم یک سرجمیں راجے، بلوچ راج ءِ ھم دنیا ءِ گریں راجانی ڈول ءَ راجی زُبان، دود ءُ ربیدگ وَ ھست انت گُڑا زاناں بلوچ راج ھم دود ءُ ربیدگی روچے برجم بہ دار ایت ءُ شاتکامی بہ کنت یا اِناں-
اگاں چہ کَسے من ءَ جُست بہ کنت گُڑا من گْوش آں ھو بلوچ راج ءَ ھم ھمے ھکّ ھست کہ راجی دود ءُ سِستانی روچے الم برجاہ بہ دار ایت ءُ بلوچ وتی ھستیں وھد ءِ پدریچ ءَ سرپد بہ کنت کہ ما بلوچ ایں، ما گوں وتی دود ءُ ربیدگاں یک سرجمیں راجے ایں ءُ مارا وتی جُتائیں پجّارے ھست ءُ ما وت یک شاھگانیں زُبانے ءِ واھند ایں ءُ چریشی ءَ راج ءِ تہ ءَ راجی رواج ءُ دودانی بستاے ودی بیت، راج ءِ تہ ءَراجدوستی، زبان دوستی ءُ ڈیھ دوستی یے رُدان بیت ءُ پمیشکا بلوچ راج ءِ اولی دود ءُ ربیدگ ءِ روچ بلوچ نودربر گل (بی ایس او) آزات ءَ برجم داشتگ ءُ راج ءَ سرپد کنگ ءَ اَت کہ تئی وتی دود ءُ ربیدگ یک رِد ءُ رھبندے داب ءَ اَنت، تئی بلوچی آروس، گم، جیڑھانی میڑ ءُ مراکہ، مُچّی ءُ دیوان ترا سرپدی دے اَنت کہ تو یک جُتائیں راجے ئے بلے تو دُژمن ءِ دست ءَ زیردست ئے باید اِنت نوں تو سرپد بِہ بَہ ئے ءُ وتی گُلامی ءَ مار ئے ھمے وڑیں راجی دود ءُ ربیدگی دیوان گُلامیں راج ءِ تہ ءَ ھم راج ءِ تہ ءَ گُلامی ءِ مارشتاں ودی کنگ ءَ اَت چریشی ءَ راج ھم کم کم ءَ سرپد ھم بوُان اَت کہ ما گُلام ایں۔
وھدیکہ تئی دژمن ءَ زانت کہ تو وتی پجّار ءَ زانگ ءُ وتی گلامی ءَ مارگ ءَ ئے گُڑا تئی دُژمن تُرسے آماچ بوتگ کہ اِے دود ءُ ربیدگ ءِ روچ بلوچ راج ءِ تہ ءَ آشوبے رُدین ایت پمیشکا تئی دُژمن چہ تئی دود ءُ ربیدگ ءَ تُرس اِت ءُ 2 مارچ 2010 ءَ وھدیکہ ھُزدار یونیورسٹی ءَ بلوچ نودربر گل (بی ایس او) آزات ءَ بلوچی دود ءُ ربیدگی روچ ءَ شپ ءَ دیوانے برجم داشتگ اَت گُڑا دُژمن ءَ گوں راجدْراوھاں ھوار ھمے بلوچ نودربر گل- آزات ءِ سر ءَ اُرش کت ءُ سے نودربر شھید کُت ءُ بازیں کچے ءَ ٹپی بوتگ انت۔
چوناھیگا اِے اُرش ءِ مول ءُ مُراد ھمیش اَت کہ بلوچ چاگِرد ءِ تہ ءَ بیمے ودی بیت ءُ راج اِے وڑیں دود ءُ ربیدگی روچاں برجاہ مہ دار ایت۔
البت دُژمن ءِ ھمے لگوریں اُرش ءَ پد دُنیا ءِ ھر کُنڈ ءِ بلوچاں دو مارچ ءِ بلوچی دود ءُ ربیدگ ءِ روچ ءِ ایرکنگ ءِ تپاک کُت پمیشکا توری اوگانستان ءِ بلوچ بہ بنت، توری اومان، ایران ءُ پاکستان ءِ زیردست بلوچستان ءِ بلوچ بہ بنت ھر بلوچ دمگاں بلوچی دود ءُ ربیدگ ءِ روچ برجاہ بوُان بیتگ اَنت۔ ھر دیوان ءَ راجی سوت گُشگ بوتگ انت۔
گّڑا پد ءَ دژمن ءَ ھم ھیال کُت کہ چہ چوشیں مراگشانی تہ ءَ بلوچ راج وتی گُلامی ءَ مارگ ءَ اِنت گُڑا پندلے ساز اِت ئِے کُت کہ پہ ایشانی ھلاپ ءَ ما وت بلوچی دود ءُ ربیدگ ءِ روچاں برجم بہ دار این ءُ ایشانی ھلاپ ءَ پوتاری کن ایں۔ بہ گِند ئے مرچی تئی دژمن ھم لھتیں بلوچ گُشندہ بھا زور ایت ءُ بلاھیں بلوچی دود ءُ ربیدگی دیواناں جوڑین ایت کہ مئے مراگاہ مُچی بز بہ بیت۔ ھمے مُچّیاں پاکستان ءِ ستا ءُ دْروگیں گْوشتانک باز ءُ بلوچی دود ءِ باروہ ھچ نیست۔ ھیرانی گپ وَ ایش انت کہ راج ءِ دژمن بلوچی دود ءُ ربیدگ ءِ روچ ءَ برجاہ دار ءَ انت ھما دژمن کہ چہ تئی زُبان ءَ تُرس ایت، چہ تئی دوداں تُرس ایت! ھما دژمن ک تئی گِساں ماندار ایت، تئی بزگیں شْوانگ ءُ شپانکانی سر ءَ کُش ایت، راج ءِ تہ ءَ دپچٹ، کاسگ چٹّ ءُ راجدْروھاں کُمکّ انت، راجی مڈّیاں پُل ایت ءُ راج ءَ بزگ کنت گُڑا چوں راج ءِ دوداں دوست دار ایت۔
من گپ ءَ گْونڈ کنان ءَ گْوش آں کہ بلوچ راج مرچاں پُرسیگ انت، ھزارانی کچّ ءَ مئے ورناھیں بلوچ برات ءُ گْوھار شھید کنگ بوتگ انت ءُ ھزارانی کچ ءَ دُژمن ءِ تھاریں زِنداناں دژمن ءِ لگتمالی ءِ آماچ اَنت، مات ءُ گْوھارانی چمّ ارسیگ اَنت ءُ ما گوں دژمن ءَ نِند این ءُ شاتکامی کن ایں؟منی ھیال ءَ ما وتی راج ءِ برات ءُ ٹپاں واد مہ ریچ ایں، دژمن ءِ اڈکُتگیں دْروگیں دود ءُ ربیدگی مُچیاں بھر مہ زور ایں۔
اگاں ما بلوچ ایں گُڑا وتی گلامی ءَ مار ایں، وتی راجی زُبان ءَ بہ وان ایں گُڑا ما بلوچ بہ ایں انچوشکہ زِندگیں راجانی پجّار راجی زُبان اَنت پمیشکا واجہ ڈاکٹر ناگُمان گْوش ایت “داں وھدے کہ کسے زُبان دوست مہ بیت آ راجدوست بیت نہ کنت گُڑا پہ راجدوستی ءَ باید انت ما زُبان دوست بہ این ءُ وتی راجی زُبان ءَ بہ وان ایں چی ءَ کہ وھدیکہ ما زُبان دوست بیتگ ایں گُڑا ما راجدوست ءُ ڈیھ دوست بہ ایں۔ پد ءَ ما وتی گُلامی ءَ مار ایں، ما وتی برگی ءَ مار ایں، ما وتی بدواہ ءُ دوزواہ زان ایں۔ بلوچی دود ءُ ربیدگ زِندگ بات انت، مرگ بات پارسی ءُ ھندی۔ بلوچ ءُ بلوچی زِندگ بات، شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔