بلوچ ازمکاراں بلوچ دود ءُ ربیدگی روچ دو مارچ ءَ بھر نہ زیرگ ءِ جار جتگ

چاگردی رسانکجاھاں شنگ بیتگیں تامربنداں ازمکار، وقار بلوچ، حنیف دُبی، دانش بلوچ، شاہ جان داؤدی ءُ سلیم بلوچ ءَ وتی شنگ کرتگیں تامربنداں دو مارچ بلوچ دود ءُ ربیدگ ءِ روچ ءَ بھر نہ زورگ ءِ جار جتگ –

تامر بند ءَ بلوچی تامر کاری ءَ ازمکار وقار علی بلوچ ءَ وتی کلوہ ءَ گوشتگ کہ من اے سال ءِ دو مارچ ءَ بلوچ دود ءُ ربیدگی روچ ءَ بھر نہ زوراں ءُ منی اکس ھم بلوچ دود ءُ ربیدگی روچ ءِ درگت ءَ جوڑ کرتگیں مراگش ءَ جنگ مہ بیت –

ھمے وڑ بلوچ ازمکار حنیف دُبی ءَ ھم وتی کلوہ ءَ گوشتگ کہ من اے روچ بزاں دو مارچ ءَ بلوچ دود ءُ ربیدگی روچ ءَ بھر نہ زوراں –

ھمے وڑ ءَ بلوچ ازمکار دانش بلوچ ءَ ھم وتی کلوہ ءَ گوشتگ کہ دو مارچ ءَ بلوچ دود ءُ ربیدگی روچ دارگ بیگ ءَ اِنت چریشی ءَ من ھوار نہ آں –

دانش بلوچ ءَ گوشتگ بلوچ راج گم ءُ رنجانی تہ ءُ گوزگ ءَ اِنت ءُ بلوچ مات ءُ گوھار دگانی سر ءَ زھرشانی ءُ وتی بچانی شوھازگ ءَ در پہ در اَنت ءُ چریشی ءَ ما دراھیں ازمکاراں ھمے سوڑگ کرتگ کہ دو مارچ ءِ دزکشی اِنت –

ھمے رنگ ءَ بلوچ گشندہ شاہ جان داؤدی ءَ چاگردی رسانکجاہ پیس بک ءَ شنگ کرتگیں تامربندیں کلوہ ءَ گوشتگ کہ دو مارچ ءَ کراچی پورٹ گرینڈ ءَ دو مارچ ءِ مراگش بیگ ءَ اِنت ایشی ِ تہ ءَ من ءُ بلوچی زبان ءِ نامی ئیں گشندہ عارف بلوچ گون نہ اِنت –

ھمے رنگ ءَ بلوچی زبان ءِ گشندہ سلیم بلوچ ءَ ھم وتی کلوہ ءَ دو مارچ ءَ دزکشی ءِ جار جتگ –

سلیم بلوچ ءَ پیس بک ءَ وتی شنگ کرتگیں جارانک ءَ گوشتگ کہ ملیر ءَ دو مارچ ءَ مراگشے بیگ ءَ اِنت ءُ ایشی ءِ تہ ءَ منی نام ھوار گیجگ بیتگ ءُ من اے مراگش ءَ ھوار نہ آں ءُ نہ رواں –

آئی ءَ گوشتگ کہ دو مارچ ءَ بلوچ دود ءُ ربیدگ ءِ نام ءَ ھر کجا مراگش بیگ ءَ اِنت درستیں مراگشاں من بھر نہ زوراں –

زانگ بہ بلوچستان ءَ ھوار بازیں جاھاں ھمک سال بلوچ دود ءُ ربیدگی روچ دارگ بیتگ اَنت ءُ گوست ءَ ھزدار ءَ بلوچ نودربر گل آزاد ءَ بلوچ دود ءُ ربیدگی ءِ دیوانے کرتگ اَت کہ اود ءَ پاکستانی ریاست ءِ چیریں ادارھانی نیمگ ءَ داشتگیں ڈیتھ اسکواڈ بلوچ دود ءُ ربیدگی روچ ءِ مراگش ءِ سر ءَ اُرش کرتگ اَت کہ چریشی ءَ بی ایس او آزاد ءِ باسک سکندر بلوچ ءُ جنید بلوچ جنگ بیتگ اِت اَنت –

ھمے وڑ بلوچ یکجھتی کمیٹی ءَ دو مارچ بلوچ دود ءُ ربیدگ ءِ روچ ءِ درگت ءَ وتی شنگ کرتگیں بیان ءَ گوشتگ کہ دو مارچ ءَ بیگواھیں بلوچانی یات ءَ کن ایں –

بلوچ یکجھتی کمیٹی ءَ گوشتگ کہ بلوچ دود ءُ ربیدگی روچ ےَ کراچی آرٹس کونسل ءَ داں پریس کلب ءَ پند ءَ روان کنت ءُ اود ءَ بیگواھیں مردمانی واستا جوڑ کرتگیں بنجل ءَ بھر زور ایت بیگواھیں مردمانی یاتگیری ءِ دروشم ءَ دود ءُ ربیدگ ءَ داریت –