ماتی زبانانی میان اُستمانی روچ ءِ درگت ءَ سبی ءَ دیوان

مست توکلی انسٹیٹیوٹ آف ریسرچ اینڈ پبلیکشنز ءِ نیمگ ءَ 25 فروری ءَ سبی ءَ یک روچی ءِ سیمنارے ماتی زبانانی ارزشت ءِ بارہ ءَ برجم کنگ بیتگ –

سیمنار ءَ ماتی زبانانی ارزشت ءُ آئی ءِ دیمپانیں اڑ ءُ جنجالانی سر ءَ گشتانکی دروشم ءَ تران کرتگ، دیوان دو بھر ءَ بیتگ کہ اولی بھر ءَ زبان ءِ ارزشت ءُ دومی ءَ لچہ کاری بیتگ –

دیوان ءِ اولی بھر ءَ مست توکلی انسٹیٹیوٹ آف ریسرچ اینڈ پبلیکیشنز ءِ رسانکدری شنگکار مھتاب جھکرانی ءِ سروکی ءَ بندات بوتگ –

دیوان ءَ بھر زرتگیں گچینی مھمانانی تہ ءَ زانتکار ءُ کواس بابو ستار سیلانی، زوراک بزدار، پناہ بلوچ، افضل مراد ءُ چاکر خان شھدربرجاہ ءِ وی سی ڈاکٹر علی نواز مینگل ھوار بیتگ –

دیوان ءَ تران کنوکیں مردماں گوشت: ماتی زبانانی ارزشت پی زندگیں راجاں انچش المی اِنت بنی آدماں پہ زندگ بوگ ءَ ورگ ءُ دگہ آسراتی المی اَنت –

آیاں گوشت کہ اگاں یک راجے ءِ زبان پدمنتگ بوت، لگتمال بوت، گڑا آیانی دود ءُ ربیدگ، راجی پجار ھم دنزانی مُجاں گار ءُ بیگواہ بیت اِنت، چریشی ءَ وتی ماتی زبان ءِ وانگ، مارکیٹ ءُ آ دگہ چاگردی پِڑاں زبان ءِ ارزشت دیگ المی اِنت –

دیوان ءَ بھر زیروکیں مردماں زبانانی دیمروئی ءِ بارہ ءَ جیڑہ ءُ جنجالانی بنگپ ءَ گپ کرت ءُ وتی ھیال ءُ لیکہ ھم دیوان ءِ دیم ءَ ایر کرت اَنت ءُ دیوان ءَ تلوے ڈبہ عمران لھڑی ءَ زرتگ ءُ دومی بھر شائری بیتگ کہ ایشی ءِ ڈبہ مھتاب جھکرانی ءَ زرتگ –

شائرانی تہ ءَ اتکگیں مھمان بلوچی زبان ءِ شائر سعید مزاری ءُ اجاز سنگت بیتگ اَنت ءُ دیوان ءَ بازیں شائراں وتی وتی شَیر ونتگ اَنت ءُ دیوان وتی نیمگ ءَ دلگوش کرتگ –

دیوان ءَ کتاب میلہ ھم بیتگ کہ مراگہ ءَ جتا جتائیں تکاں بندوکیں مردماں بازیں کچے ءَ بھر زرتگ ءُ وتی دلگوش گوں زبان ءَ کرتگ – دیوان ءِ آسری ءَ دیوان ءِ چارچین ءَ درسیں مردمانی منت گپتگ ءُ گوشتگ کہ ھمک سال ماتی زبانانی میان اُستمانی روچ ءِ درگت ءَ پد ءَ ھمے رنگ ءَ مردم مُچ بنت –