شال: اے این پی ءِ رھشون ءِ آوار جنگ ءُ کوش ءِ ھلاپ ءَ شھر بندیں ھرتال، باپاری بنجل بند

بلوچستان ءِ بنجاھی شھر شال ءَ عوامی نیشنل پاٹی ءِ بلوچستان ءِ رھشون اسد خان اچکزئی ءِ آوار جنگ ءُ کوش ءِ ھلاپ ءَ شھر بندیں ھرتال ءِ سوب ءَ شھر ءِ باپاری بنجل بند اَنت-

گیشیں ھالانی رد ءَ بنجاھی شھر شال ءَ ابید دگہ چمن، پشین، ژوب، لورالائی، زیارت، موسیٰ خیل، قلعہ سیف اللہ، ھرنائی، دکی، سنجاوی ءُ قلعہ عبداللہ ءَ عوامی نیشنل پاٹی ءِ دزبندی ءَ باپاری بنجل بند ءُ سیاھیں روچ دارگ بیگ ءَ اِنت –

زانگ بہ بیت اسد خان اچکزئی عوامی نیشنل پاٹی بلوچستان ءِسیکرٹری اطلاعات بیتگ کہ آ پنچ ماہ ءَ پیسر شال ءَ بالی پَٹ دگ ءَ ناشناسیں مردماں آوار جتگ ءُ بیگواہ کرتگ ءُ پاٹی ءَ ھمے ماہ ءَ رھشون ءِ بیگواھی ءُ دگہ بیگواھیں مردمانی دیم ءَ نیارگ ءِ ھلاپ ءَ سرجمیں پاکستان ءَ زھرشانی کرتگ، بلے گوستگیں روچ ءَ آئی ءِ جون نوحصار ءَ یک چاتے ءَ دزکپتگ –

شال ءِ پولیس ءِ رد ءَ اسد خان اچکزئی ءِ کوش ءَ یک لیویز کارمندے ھوار اِنت ءُ آ دزگیر کرتگ –