نبشتانک: دردواری
نبشتہ کار: ھدایت بلوچ
دی بلوچستان پوسٹ
ھست اَت یک میتگے ءَ مردے ءُ جنءِ کہ اشان وتی لوگءَ یک پَسے ءُ یک مُرگے ءُ یک کپودر ءِ داشتگ ات اشانی لوگ ءَ یک مُشک ءِ اوں ھست ات گوں کہ مُشک ءَ لوگ ءِ تہ ءَ ھر روچ گوں وتی ھراب کاری ءُ شیتانیاں اے مرد ءُ جن تین ءُ دل کُرتگ اِت اَنت یک روچے لوگ ءِ کچّے ءَ اشاں ڈبّءِ چیر کرت کہ مُشک ءَ گِراں۔
وھد ءِ مُشک ھمے ڈب ءِ چیر کنگ ءِ ھال ءَ سرپد بوت بیچارگ ءَ سیاھی ءَ برشانت سک پریشان بوت مُشک ءَ وتی اُرز کپودر ءِ گور ءَ بُرت کہ تو ھمے ڈب ءَ وڑ ءُ پیمے بکن من ءَ چہ اے جنجال ءَ بہ رکّین کپودر ءَ گُشت تو زانے تئی ڈب من ءَ گوں تئی جنجال ءَ ھچ کار نیست مُشک ھیران ءُ پریشان بوت ءُ وتی اُرز ءِ مُرگ ءِ گورا بُرت کہ بلکیں مُرگ منی کُمکءَ بکنت-
مُرگ ءَ اوں گُشت من ءَ گوں اے ڈب ءُ اے اڑ ءُ جنجال ءَ ھچ کار نیست من ءَ یلہ کن وتی زندگی ءَ وشھالاں برو وتی راہ ءَ بیچارگیں مُشک سک پریشاں بوت وتی اُرز ءِ پَسے گورا بُرت کہ توئِے پس منی اے ڈب ءَ وڑے بکن کہ من سک پریشان آں بلے پس ءَ اوں وتی سر جھل کُرت ءُ گشت من تئی واستا ھچ کُرت نہ کناں اے جنجال تھنا مُشک ءِ جنجال بوت ھچ کس ءَ مشک ءِ کُمک نہ کُرت ڈبّ لوگ ءِ کُچّے ءَ چیر ات کہ یک سیاہ مارے اھت ھمے ڈب ءِ چیرا پُتِرتءُ وپت
اناگاھا لوگ بانُک اھت ءُ وتی دست ڈبّ ءِ چیرا راہ دات کہ باریں ڈبّ ءَ مشک نہ گپتگ؟
مارا بانک ءِ دست ءَ ڈنگے جت بانُک درد ءِ ھولہ زار ءُ کتار ءَ لگت ءُ سک بیمار بوت ھمے میتگ ءَ یک تبیبے ھست ات تبیب ءَ گُشت کپودر ءَ بُکش ات درد ءِ جاہ ءَ بند ءِ دُراہ بیت مرد ءَ کپودر کُشت ءُ بست بانُک دراہ ءُ سلامت بوت سیاد ءُ مردم پہ ھال پُرسیءَ اھت انت مرد ءَ مُرگ کُشت نان ءُ ورگ جوڑ کرت مردمانءَ نان دات۔
نون میتگ ءِ مردماں گُشت تئج لوگ بانک چہ اے بیماری ءَ رکّتگ تو ھیرات ءِ بکن مرد ءَ پَس ءِ کَشگءِ ارادہ بست وھدے کارچ کہ پس ءِ گُٹ ءَ ایر کپت پس ءَ نوں زانت کہ ما چنچو بیزانگ بوتگ آں –
ما نزانت کہ اے جنجال تھنا مشکے نہ انت ھمے پیمیں ھزاراں کسہ مئے چاگرد ءِ تھا ھست انت براتے اے مردمے اے کار ءِ گٹ ءَ بیت جنجالے سر ئِے کپیت ما وتارا دور داراں ھچ درد واری نہ کناں ما مدام گُشاں اے جنجال بس پلانی انت من ءَ کار نیست ما وتارا چہ چاگرد ءِ اڑ ءُ جنجالانی گوما گیش ءُ گیوار کنگ ءَ چہ دور دارگ ءِ کوشست کناں بلے وھدے ھمے جنجال مئے وتی سر ءَ کپیت نوں چامپٹ سر ءَ لگیت اڑے من نزانت کہ یک روچ بیت بلکیں اے وڑیں جنجالے منی سر کپیت۔ وھدے تو کہ چاگرد ءِ تہ ءَ گوں برات ءُ مردماں درواری نہ کن ئے آھانی جنجالاں وتج نہ لیک اِت۔ گُڑا سکّی ءِ وھد ءَ تو تنھا بئے پہ وت ءَ ھچ کس نہ گند اِت۔ وھدء درواری کنگ ءِ گڑا گون تو دردواری کنگ بیت اِنت –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔