روکپتی بلوچستان ءَ باپاری مردمانی کوش: مروچی چارُمی روچ ءَ روکپتی بلوچستان ءَ انٹرنیٹ بند

گوستگیں شپ ءَ روکپتی بلوچستان ءِ بازیں جاھاں زھرشانی کنوکاں دگ بند کرتگ اَنت ءُ ٹائر مانداشتگ، بازیں سرجمیں بلوچستان ءَ انٹر نیٹ بند ءُ بازیں جاھاں کم ءُ سست اِنت –

گوستگیں شپ ءَ روکپتی بلوچستان ءِ بنجاھی شھر زاھدان “دزاپ ” ءَ مھلوک ءِ زھرشانی برجاہ بیتگ، ھمے رنگ ءَ دشتیاری، چھبار، جاسک ءُ دگہ جاھاں زھرشانی کنوکاں دگ بستگ اَنت –

گوستگیں چار روچاں پیسر روکپتی بلوچستان ءِ سیمسری دمگ ھق آباد ءَ سیمسرانی سر ءَ ایرانی پاسداران انکلاب ءِ تیرگواری ءَ لس مردم بیران ءُ بازیں کچے ءَ زدگ بیتگ اِت اَنت چرے وئیل ءَ پد بلوچستان ءِ جاور نگیگ گوشگ بیگ ءَ اَنت –

گوستگیں چار روچاں یکشل ءَ مھلوک ءِ برانز برجاہ اَنت اے برانز ءَ روکپتی بلوچستان ءِ زربار ءُ گوریچانی ھر نیمگاں سر بیتگ اود ءَ لس مھلوک ءِ گوشگ اِنت ایرانی لشکر ءَ لس مردم سیمسری دمگاں جتگ ءُ کُشتگ اَنت –

گوستگیں دزاپ ءَ ھواریں دمگ شیر آباد ءَ ایرانی لشکر ءِ تیرگواریاں زالبولانی زدگ بیگ ءِ تامر بند ھم شنگ ءُ تالان بیتگ اَنت تامر بندے ءَ گندگ بنت تامر بند ءَ زالبول ءُ چک زدگ بیگ ءَ گندگ بیگ ءَ اَنت –

روکپتی بلوچستان ءَ انٹرنیٹانی بند بیگ ءِ سوب ءَ بازیں جاھاں راستیں تاوانانی ھال سر بیگ ءَ نہ اَنت –