کراچی ءَ بیگواھیں مردمانی ھاتر ءَ زھرشانی برجاہ

نوزدہ سد ءُ ھپتاد ءُ یک ءِ پوجی کاروائیانی میان ءَ ھزارانی کچ ءَ بلوچ آوار جنگ ءُ بالیگرابانی سر ءَ برگ بوتگ انت کہ آھانی درگت ءَ روچ مروچی کسے ھم سرپد نہ انت بلے بلوچ چہ وتی پرزنداں ھچبر شمشکار نہ بوتگ انت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ماما قدیر بلوچ ءِ سرکماشی ءَ برجاہ، زھرشانی بنجل ءَ مروچی چار ھزار ءُ دو سد ءُ سِی ءُ سَے روچ سرجم بوتگ –
اے این پی ءِ بنجاھی کمک کار مستر شازیہ مروت، صوبائی سیکرٹری شبیر آفریدی، بنجاھی کونسل ء باسک نور اللہ اچکزئی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدری درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ چہ اولی روچ ءَ بلوچ، پشتون، سندھی اے ریاستی زوراکیانی بگیری ءَ گپ جنگ ءُ پُرایمنیں زھرشانی کنان ءُ پیداک انت – ھما وھد ءَ بگر تاں روچ مروچی بلوچ پرزندانی آوارجنی ءُ بیگواھی ءِ رد یکشل ءَ برجاہ انت –

آئی ءَ دیمتر ءَ گوشتگ کہ زورانسری آوارجنیانی ھساب جنگ بہ بیت تو بس نوزدہ سد ءُ ھپتاد ءُ یک ءِ پوجی کاروائیانی میان ءَ ھزارانی کچ ءَ بلوچ آوار جنگ ءُ بالیگرابانی سر ءَ برگ بوتگ انت کہ آھانی درگت ءَ روچ مروچی کسے ھم سرپد نہ انت بلے بلوچ چہ وتی پرزنداں ھچبر شمشکار نہ بوتگ انت –

ماما قدیر بلوچ ءَ گوشتگ کہ مروچی ھم سندھی، بلوچ ءُ پشتون پاکستانی زوراکیانی آماچ انت مروچی ھم پہ آھاں زند گوازینگ گران انت – اد ءَ ھک گپ جنوک اوپار کنگ نہ بنت، آ آوار جنگ ءُ بیگواہ کنگ بنت، آھانی جون دیم دیگ بنت یا ٹارگٹ کنگ ءُ شھید کنگ بنت –