نبشتانک: ما پد ءَ گوں تو دُچار کپ ایں
نبشتہ کار: جاڈ بلوچ
دی بلوچستان پوسٹ
ما چارُمی نُماز ونتگ ات مسیت ءِ کش ءِ تلو ءِ سر ءَ نشتگ ءُ دیوان کتگ اَت مُدامی ءِ وڑ ءَ گونڈوے اتک من ءَ توارے کُت بیا ترا لوگ ءَ لوٹگ ءَ انت- من دیم لوگ ءِ نیمگ ءَ دات من ءَ گُمان بوگ ءَ ات گُش ئِے مرچی مئے لوگ ءِ نیمگ تھار تر اِنت لوگ ءِ پُشتے بلپ ھم روک نہ اَت-
بلکیں پد ءَ لین ھراب آں انچو روگ ءُ آیگ ءَ لین کُجا شر بنت من کہ لوگ ءِ دروازگ ءِ دپ ءَ رس اِتاں ءُ من سرپد بیتاں- مات ءَ ھم لوگ ءِ ڈن ءِ دُراھیں لیٹ کُشتگ اِت اَنت لوگ ءِ دروازگ ءَ ھوار درسیں کڑیکیانی پردہ ھم جھل کُتگ ات اَنت دیوال ءَ تیکہ اَت ءُ-
مات ءِ گندگ ءَ پد من ءَ ھم گڑ ءُ مُنجیاں گپت چی بوگ ءَ اِنت من گُشت ماتی ، مات ءَ گُشت بیا واھگ اتکہ من لوگ ءِ تہ ءَ شُتاں واھگ بَلی ءِ کش ءَ نشتگ اَت –
واھگ ءَ دیر اَت کہ بلی ءِ چارگ ءَ اتکگ اَت من بس واھگ ءَ چارگ ءَ اِت آں آئی ءَ بلوچی چادرے ءِ مانپوشتگ ات گُوں بلّی ءَ کِسھاں آرگ ءَ اَت من ءَ دل ھچ مرینگ ءَ نہ اَت من واھگ ءَ گُشگ لوٹگ ءَ اِتاں کہ من ءَ بر گوں من ءَ تئی گُون ءَ سپر جَنگی اِنت من ءَ تئی کِسہ گوشدارگی اَنت-
بلے واھگ ءَ ھنچش اشتاپ اَت من بس واھگ ءَ چارگ ءَ اِتاں واھگ ھنچیں زیبناکیں رنگے ءَ بلی ءَ گوں گپ ءَ اَت آئی ءِ ھُورکیں بچکنداں کہ ترا دگے نیمگے ءَ براں ترا آئی ءِ پچکندانی درگیجگ ءَ آئی ءَ گُوں ھمراہ بوگ ءَ مجبور کن آں-
بلے ماں واھگ ءَ ھچ گُشت نہ کُت تاں آئی ءَ بلی اجازت کُت شُت آئی ءِ ایوک ءَ روگ من ءَ باور بوگ ءَ نہ اَت منی چمانی ارس شیپ گران بوت آں لُنٹ گلگ کنگ ءَ اِتاں بلے باریں چی ءَ من واھگ ءَ ھچ گُشت نہ کت پد ءَ وت ءَ تلسہ دات ءُ گُشت اڑے واھگ پد ءَ کیت ترا بارت گُوں واھگ ماں اے سھت ءَ درانڈیھ یک کوٹی ءَ نشتگ آں پہ تو لھتے گپ نبشتہ کنگ ءَ آں واھگ من ءَ پہ ترا سک زھیر بوگ ءَ ایں من پد ءَ ترا گُوں دُچار کپگ لوٹاں وھدے پہ ترا زھیر کنت تئی زھیر من ءَ بلوچستان کُلیں ندارگانی ترانگاں گیج انت من ءَ جُھد کنگ ءَ ئے سیکن ءَ دنت واھگ پُل اگاں زندگ بوتاں گُوں تو الم دُچار کپاں تناوھد ءَ سلامتی پہ شُما سوبین بات ئے دائم-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔