بلوچستان: جتا جتائیں وئیلاں ھپت مردم بیران زالبولے ءَ ھوار بیست ءُ سَے مردم زدگ

بلوچستان ءِ دمگ ڈیرہ غازی خان ءَ تیرگواری وئیلے ءَ ھپت مردم بیران چاردہ ٹپی ءُ شال ءَ سیلنڈر ءِ ترکگ ءَ زالبولے ءَ ھوار نُھ مردم ٹپی بوتگ اَنت –

سربوتگیں ھالانی رِد ءَ بلوچستان ءِ بنجاھی شھر شال نواں کلی ءَ گیس سلینڈر ءِ ترکگ ءُ آس لگگ ءِ سوب ءَ زالبولے ءَ ھوار نُھ مردم سُتکگ ءُ ٹپی بوتگ اَنت – وئیل نواں کلی ءَ لیبر کالونی مارکیٹ ءَ دیم ءَ اتکگ –

ھال ءِ سربوگ ءَ فائر بریگیڑ گاڑی وئیل جاہ ءَ سر بوتگ ءُ آس کُشگ ءِ جھد اش کُتگ-

وئیل ءَ زدگ بوتگیں مردمانی پجار بی بی ملائکہ، منصور، ثمرن، عروج، جسیکہ، نگین، فاروق، یوتانین، صدف، کومل ءُ انمول ھوار انت – زدگ بوتگیں مردم ھما دمان ءَ دمگی نادراھجاہ سر کنگ بوتگ انت –

دومی نیمگ ءَ ڈیرہ غازی خان ءَ تھانہ شاہ سدر دین ءِ دمگ ءَ پل شیھانی ءِ نزیک ءَ بازارے ءَ سلاہ بندیں مردمے ءِ تیرگواری ءَ چہ ھپت مردم بیران بوتگ ءُ چاردہ مردم زدگ بوتگ اَنت لس مھلوک ءِ پسّھی ءَ اُرشکار ھم جنگ بوتگ اَنت –

اھوالکارانی رِد ءَ گوَستگیں روچ ءِ ادار یازدہ ءَ بازار ءِ نزیک ءَ چار راہ ءَ یک مردے ءَ چادرے مانپوشِتگ ءُ ناگھاں کلاشنکوپ ئِے کشّ اِتگ چاریں نیمگاں تیرگواری بندات کتگ ات چریشی ءَ چہ ھپت مردم بیران بوتگ وھدیکہ دو زالبول ءَ ھوار چاردہ مردم زدگ بوتگ اَنت، لس مھلوک ءَ پسّھی ءَگوں سِنگ ءُ ڈوکاں ارشکارانی سر ءَ اُرش کتگ ءُ کُشتگ اَنت-

دمگی مردمانی گوَشگ اِنت کہ اُرشکار ءِ پجار گلام پرید ء ھسن لاشاری نام ءَ چہ بوتگ آئی ءَ وتی دئیندار گلام ھیدر ءُ منزور ھسین لاشاری ءِ سر ءَ تیرگواری کتگ ءُ کُشتگ اَنت ءُ پد ءَ چاریں نیمگاں تُپنگ ءِ دپ ئِے تَرّینتگ چریشی ءَ چہ آ دگہ مردم بیران ءُ زدگ بوتگ اَنت-