نبشتانک: ماتی زبان ءُ میان اُستمانی روچ
نبشتہ کار : مھراب ازیر
دی بلوچستان پوسٹ
دگنیائے کجام راج کہ یک اِستانے ءَ زیردست کنگ لوٹیتگ انت گُڑا هما زورگِریں اِستان ءَ دُرساں پیسر هما راجے زُبان زیردست کُتگ۔
چیا اگاں یک راجے ءِ زُبان کہ زیردست بیت گُڑا آ هما ایردست ءُ زورگِرے زبان ءَ کارمرز کنت ءُ وتئی راجی پجار ءَ گار کنت وتئی ماتیں زبان ءَ بیھال کنت۔
بلوچ ءَ گوں هم انچُوش کنگ بوتگ بلوچ ءِ گلزمین ءِ سرءَ وهدے باروٹیاں اُرش کتگ گُڑا درساں پیسر زورگِر ءَ بلوچی زبان گار کنگے جھد کتگ کہ روچے مروچی برجاه انت۔ اے درگت ءَ زوراکاں ما دربر جاهاں بلوچی نا وانینتگ ءُ بلوچی ءَ هچ ارزشت ھم نداتگ۔
چیا کہ زوراکاں مُدام همیں لوٹیتگ بلوچ وتئی راجی پجار ءَ گار بکنت بلوچ وتئی جِند ءَ مہ زانت، بلوچ وتئی گلزمین ءُ وتئی راجدپترے ارزشت ءَ مہ زانت، وهدے بلوچ وتئی راجی پجار ءَ نہ زانت گُڑا بلوچ مدامی زیردست کنگ بیت کنت۔
مروچی بلوچی زبان بلوچستان ءَ وانگ جاهاں وانینگ نہ بیت بلوچ نبشتہ کار گار ءُ بیگواه کنگ بنت بلوچی وانکی ماندارگ ءُ بُن دیگ بنت اے دُرسیں هُنر ءُ هیلہ آنی پُشدر بس همیش انت کہ بلوچ گار کنگ بہ بیت ءُ بلوچستان پہ ایمنی وتئی پنجگانی چیرا دارگ بہ بیت۔ چیا کہ بلوچ ءِ بدواه زانت دانکہ بلوچی است بیت گُڑا بلوچ است بیت۔
نوں بلوچ راج اگاں وتا زندگ دارگ لوٹیت وتئی راجی پجار ءَ زندگ دارگ لوٹیت گُڑا بلوچ راج ءَ دُرساں پیسر وتئی زبان زندگ دارگ لوٹیت، وتئی زبان وانگ لوٹیت، وتئی زبان نبشتہ کنئگ لوٹیت۔ بلوچی زبان ءَ وتئی چُکاں بوانینیت، وتئی پدریچ ءَ وتئی زبان ءَ گوں مهر کنئگ ءِ سکین بدھئیت۔ چیا کہ ما دانکہ وتئی زبانءَ گوں مهِر مہ کنیں مارا وتئی راج ءُ وتئی گُلزمین ءَ گوں هچ وڈا مھر نہ بیت۔
اگاں وتا تچکیں راجدوست ءِ جوڑ کنگ لوٹے گُڑا وتئی زبان ءَ گوں مھر بکن وتئی زبان ءِ دیمروی ئے هاترا جھد بکن وتئی زبان ءَ نبشتہ بکن وتئی زبان ءَ وتئی آوکیں پدریچ ءُ وتئی چُکاں سر بکن۔
بلوچ ءَ بلوچ بس بلوچی زبان جوڈ کنت،
اگاں بلوچی مہ بیت بلوچ نہ بیت۔
بلوچی میزران بات
بلوچ راج ابدمان بات
بلوچستان زندگ بات
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔