نبشتانک: مئے چاگرد ءُ بے لِٹکیں روباہ
نبشتہ کار: ھدایت بلوچ
دی بلوچستان پوسٹ
جنگل ءَ کرودے ساھگ ءَ یک روبایے وپتگ ءَ ات اناگاہ ءَ چہ کرودے سر ءَ یک پوڑے لگُشت روباہ ءِ لٹک ءِ سر ءَ کپت ءُ روباہ چہ واب ءَ پچ لرزِت، پوڑ چُش ترند ھم نہ ات بلے زاناں روباہ ءِ تورینت روباہ لٹک ءِ درد ءَ وا وا کنگ ءَ لگت چارت ءِ داں لٹک چہ بُن ءَ سِستگ ءُ دور اتکگ۔
مُدتے ءَ رند کہ وھدیکہ درد آرام بوت گڑا روباہ سک پریشان بوت کہ نوں من چون بہ کن آں بے لٹک ءَ من آدگہ روباھانی دیم ءَ سک پشل باں گوں بیچارگی ءَ روباہ دیم پہ جنگل ءَ روام بوت دیستے دگہ روباہ ءِ پیداک انت روباہ ءَ بے لٹکیں روباہ دیست ھیران بوت ءُ کندگ ءَ لگِت گُشت ئِے ترا چے بوتگ کہ تو چو شِر ءُ رُزوا ءِ بے لٹکیں روباہ ءَ گشت جُست ءَ مکن ھما کہ من وتی لٹک دور کُرتگ من سُبک سُبک آں گُشے زانا من آزمان ءِ دیما ءَ گردگ ءَ آں ھنچو سما بیت من پیسرا بڈ ءُ بار بوتگ آں روباہ لگِت گوں وتی توسیپ ءَ
آ روباہ ءَ را ھنچو بلینتے کہ آ اوں وتی لٹک ءِ دور کنگ ءَ آمادہ بوت روباہ ءَ وتی لٹک ءِ گُڈگ پیسلہ زُرت ءُ بے لٹک ءَ گشت ءِ تو منی لٹک ءَ بدار گوں من گُڈاں دورے کناں تئی وڑ ءَ سُبک باں گوں وھدیکہ دومی روباہ ءِ لٹک دور اھت لٹک ءِ درد ءَ روباہ ءَ زھر زھر ءَ گریوْگ ءَ لگِت ءُ گُشت ئِے من ءَ آزمان ءِ روگ بیزار انت تو من ءَ کُشت ءُ گار کُرت تو من ءَ رد دات منی لٹک دور کنائینت-
اولی روباہ ءَ گُشت نوں من تو بے لٹکاں بلے جنگل ءِ آدگہ روباھانی دیم ءَ ما سک پشل باں کہ مارا لٹک بِرنیست تو چو کن آدگہ روباھانی دیم ءَ اے گپ ءَ زاھر مکن کہ بے لٹکی چو گران انت اگاں تو ھال دات گڑا ھچ کس وتی لٹک ءَ دور نہ کنت من تو آھانی دیم ءَ شِر ءُ رُزوا باں۔
اے دوئیناں دُرسیں جنگل ءَ گشت ءُ روباھانی دیم ءَ وتی سُبکی ءُ آرام ءِ گپ جت لھتے وھد گوست جنگل ءِ گیشترین روباہ بے لٹک بوت انت لھتے کموکیں روباہ ءِ پشت کپتگ ات آھاناں لٹک بِر اَت نون جنگل ءَ لٹک والا روباھانی ازت کمتر بوت بے لٹکیں روباہ ءَ جنگل ءَ پہ شان ءِ گشت کہ لٹک والاھاناں کلاگ اش بست۔
ھمے ھال مئے چاگردیگ انت ھمے رنگ ءَ مئے چاگرد روگ ءَ اِنت۔ مئے چاگرد ءِ تہ ءَ ھراب کاری، نشہ، دُزی کنگ ھمنچو گیش بوتگ دُزی ءَ بازیں مردم ھما وڑ کنگ ءَ انت کہ دُزی یک کار ءُ بار ءِ جوڑ بوتگ نشہ ھمک لوگ ءَ ھمک میتگ ءَ ھنچو تالان انت۔ نشہ ءِ بھا گنگ ءُ نشہ ءِ تالاں کنگ ءَ ھچ کس پہ سلکاری ءِ نہ ماریت چاگرد ءِ تہ ءَ ھما دُز ءُ ھراب کاریانی کنوک ھنچو باز انت ھما مردم کہ ھراب کاری ءُ دُزی نہ کن انت آ کمتر انت ھراب کاری ءُ نشہ ءُ دُزی ءُ مردم پہ مڑاھے کنگ ءَ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔