کراچی ءَ بیگواھیں بلوچانی ھاتر ءَ زھرشانی برجاہ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ سبی روچ سرجم بوتگ، نیشنل پاٹی سیکرٹری جان محمد بلیدی، الھی بخش لھڑی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ تران کنان ءَ گوشتگ کہ ھما تاکتاں بلوچ ءِ بگیری گوستگیں ھپتاد ءُ سئے سالاں زوراکی برجاہ داشتگ انت ءُ سال دوھزار ءَ چہ بلوچ ءِ بگیری ءَ یک دگہ جنگ ءُ لشکر کشی ءِ بندات کُتگ آھاں بوت کنت اے اندازہ نیست کہ نوں جاور ھال پیشی وڑ ءَ نہ انت، جاور ھال مٹ بوتگ انت – بلوچ یکرندے پد ءَ زانت ءُ سیاسی سوچ پگرے ئِے گون ءَ پاد کائنت –

آئی ءَ گوشتگ ھر مردم ،ہر راج ءَ راجداری، مزھبی، چاگردی چست ایراں آھانی بنکی ھک انت بلے پاکستان ءَ راجداریں باسک، نودربر، ڈاکٹر، زانتکار ءُ دگہ پگری منوگر ریاستی چیریں ادارھانی دست ءَ آوار جنگ ءُ بیگواہ کنگ بنت –

ماما قدیر بلوچ ءَ گوشتگ زورانسری آوارجنیاں چہ درسیں کھول مازگی نادراھی آماچ بیت شدکشیں زھرشانی بنجل پچ کنگ بنت راجدار ءُ آھانی کھول زھرشانی کن انت بلے سرکار ءِ گوشاں مورے نہ وارت ، آ گنگ ءُ کَرّ اِنت –

آئی ءَ گوشتگ کہ انسانی ھکانی گل کجایاں انت آ اے ریاستی زوراکیانی سر ءَ پرچا ھاموش انت وھدیکہ سیاسی بے وسی ءِ اے ھال انت کہ مئے رھشون ءُ نودربر گل مھکمیں جھد ءَ گندگ نہ بنت –