بلوچستان: دو بیگواھیں مردم یلہ کنگ بیتگ اَنت

کیچ ءَ اسلام آباد ڈی چوک ءَ نشتگیں بیگواھیں بلوچانی کھولانی ھمدردی ءِ واستا بلوچ یکجھتی کمیٹی کیچ ءِ نیمگ ءَ زھرشانی روانک کشگ بیتگ –

سر بیتگیں ھالانی رد ءَ بیست ءُ یک مئی دوھزار ءُ ھژدہ ءَ بلوچستان ءِ دمگ مَچ ءَ بیگواہ بیتگیں عبدالحئی کرد بازیں زندانی ءَ پد گوستگیں روچ ءَ یل بیتگ ءُ وتی لوگ ءَ سر بیتگ –

ھمے وڑ ءَ بلوچستان ءِ دمگ چاگی ءَ سَے سال پیسر بیگواہ بیگواہ بیتگیں پرنس خالد ساسولی دیم ءَ آرگ بیتگ –

کھول ءِ رد ءَ خالد ساسولی شال ءَ ہدہ ءِ جیل ءَ بندیگ اِنت –

ھمے وڑ دو سال ءَ بیگواہ بیتگیں ھدابکش جھمنند گریشہ مروچی ھزدار ءَ یلہ بیتگ ءُ وتی لوگ ءَ سر بیتگ –

زانگ بہ بیت بلوچستان ءَ بیگواہ بیتگیں مردمانی کھولاں شال کراچی ءَ ھوار اسلام آباد ءَ زھرشانی بنجل جتگ ءُ نشتگ اَنت – آیانی گوشگ اِنت چہ بلوچستان ءَ بیگواہ بیتگیں مردمانی بیگواھی ءَ ریاستی ادارہ دزمانجن اَنت –

دومی نیمگ ءَ چہ بلوچستان ءَ بیگواہ بیتگیں مردمانی کھول گوستگیں نُھ روچاں نشتگ اَنت مروچی آیاں دھمی روچ اِنت کہ انگت ءَ اسلام آباد ڈی چوک ءَ نندانک ءَ نشتگ اَنت –

اسلام آباد ڈی چوک ءَ نشتگیں مردمانی ھمدردی ءَ بلوچ یکجھتی کمیٹی ءِ نیمگ ءَ کراچی، شال، لاھور ءَ پد مروچی کیچ ءَ زھرشانی بیتگ –

مروچی کیچ ءِ بنجاھی شھر شال اسلام آباد ءَ نشتگیں بیگواھیں بلوچانی کھولانی ھمدردی ءِ درشان کنگ ءِ واستا بلوچ یکجھتی کمیٹی ءِ نیمگ ءَ زھرشانی روانک کشگ بیتگ –

روانک عطا شاد ڈگری کالج ءَ بندات بیتگ ءُ شھید فدا چار راہ ءَ مُچی ءِ دروشم ءَ مُچ بیتگ –

روانک ءَ زالبول ءُ چکاں ھوار بازیں کچے ءَ نودربر ءُ دگہ تکاں بندوکیں مردماں بھر زرتگ، زھرشانی کنوکانی دست ءَ پلے کارڈ ءُ بینر شھر ءِ دگانی سر ءَ روانکی دروشم ءَ تران بیتگ اَنت ءُ آیانی سر ءَ بیگواھیں بلوچانی دیم ءَ آرگ ءُ یل کنگ نبشتگ بیتگ اَنت –

روانک ءَ بھر زیروکیں مردماں گوشت کہ مروچی بازیں روچاں اسلام آباد ءَ دگ ءِ سر ءَ نشتگیں بلوچ مات بازیں جنجال ءُ مشکلانی دیمپانی ءَ وتی بیگواھیں بچانی واستا توار چِست کنگ ءَ اَنت چریشی ءَ آیانی ھمدردی ءِ واستا زھرشانی روانک کش اِتگ ءُ دراھیں بیگواھیں مردماں سرکار یل بہ کنت اگاں کسے ءَ جرمے کرتگ گڑا آیاں سرکار وتی آمیدگساں پیش بہ کنت ءُ جرماں پدر بہ کنت –

زانگ بہ بیت اسلام آباد ءَ نشتگیں مردمانی گوشگ اِنت سروزیر عمران خان بئیت ءُ مارا مئے بیگواھیں مردمانی یل کنگ ءِ سدکی ءَ بہ دنت بلے تنی وھدی سروزیر عمران خان نیتکگ ءُ بنجل ءَ بازیں سیاسی پاٹی ھمدردی ءِ واستا یکشل ءَ آیگ ءَ اَنت –