اسلام آباد: بلوچستان ءَ اتکگیں بیگواھیں مردمانی زھرشانی نندانک برجاہ

بیگواھیں ڈاکٹر دین مھمد ءِ جنک سمی بلوچ ءَ چاگردی رسانکجاھاں گوشتگ کہ گوستگیں شپ ءَ پولیس ءُ دگہ ادارھاں نندانک ءِ ھلاس کنگ ءِ بیھار ھم داتگ، کیچ ءَ بلوچ یکجھتی کمیٹی ءَ زھرشانی نندانک ءِ پلامرزی ءُ پولیس ءِ ناروائیانی ھلاپ ءَ زھرشانی ءِ جار پِرینتگ –

اسلام آباد ءِ سارتیں مولم ءَ دگانی سر ءَ بیگواھیں بلوچانی مات ءُ گوھارانی ءُ زھگانی نندانک برجاہ،نندانک ءِ ھلاس کنگ ءَ گوستگیں شپ ءَ پولیس ءُ دگہ ادارھاں ھلاس کنگ ءِ پرمان کرتگ –

نندانک ءَ آجزیں مات ءُ میراث بلوچ ءِ وڑیں کسان عمریں چُک ھم ھوار اَنت، اسلام آباد ءِ شپ ءِ سارتی ءَ بلوچستان ءِ بیگواھیں مردمانی کھولانی چَم پاکستان ءِ سروزیر عمران خان ءِ راہ ءَ چاران اَنت دَہ دمان ءِ دوری ءَ پارلیمنٹ ءِ در ءَ نشتگیں پیر ءُ آجزیں ماتانی ھرس پارلیمنٹ ءِ مردمانی چماں تنی وھدی کپگ ءَ نہ اَنت –

گوستگیں شپ ءَ پولیس ءُ دگہ ادارھاں نندانک ءِ ھلاس کنگ ءِ پرمان کڈنی کرتگ اَت بلے کھولاں پولیس ءِ گپ رد کرتگ ءُ نندانک ءِ نندگ ءِ سوڑگ کرتگ –

گوستگیں روچ ءَ اسلام آباد پولیس ءَ نندانک ءِ پلامرزی کنوکیں بلوچ نودربر دزگیر کرتگ ءُ بازیں ادارانی دارگ ءَ پد بیھار داتگ ءُ یلہ داتگ اَنت کہ شما اے نندانک ءِ نزیک ءُ گوراں دوبر زاھر نہ بئے ءُ دومی نیمگ ءَ بیگواھیں ڈاکٹر دین مھمد بلوچ ءِ جنک سمی بلوچ وتی شنگ کرتگیں تارمر بندے ءَ وتی ھمراھانی رکینگ ءَ ھاتر ءَ بلوچ نودربر یک گور ءَ نندگ ءِ کڈن کرتگ اَنت –

نندانک ءِ سروکی ءَ وائس فار بلوچ مسنگ پرسنز ءِ سرکماش نصراللہ بلوچ ءُ زالبولانی رھشونی ءَ سمی دین بلوچ کنگ ءَ اِنت نندانک ءَ دَہ ءَ گیش کھول ھوار اَنت کہ آ گوستگیں شش روچاں اسلام آباد نیشنل پریس کلب ءِ دیم ءَ نندانک ءَ روانکے ءِ دروشم ءَ اسلام آباد ڈی چوک ءَ اتکگ اَنت ءُ مروچی سیمی روچ ءَ آیانی زھرشانی نندانک برجاہ اِنت –

ھمے وڑ گوستگیں روچ ءَ شال ءَ اسلام آباد ءَ نشتگیں کھولانی ھمدردی ءُ آیانی سر ءَ پولیس ءِ ناروائی ءُ زوراکیانی بگیری ءَ زھرشانی روانک کشگ اِتگ ءُ روانک ءَ بازیں کچے ءَ بلوچ سیاسی پاٹی ءُ پی ٹی ایم ءِ باسکاں بھر زرتگ –

ھمے رنگ ءَ مروچی ھم بلوچ یکھتی کمیٹی تربت ءِ نیمگ ءَ اسلام آباد ءَ نشتگیں بلوچ کھولانی پلامرزی ءُ پولیس ءِ زوراکیانی ھلاپ ءَ زھرشانی کنگ ءِ جار جتگ اَنت –

جار ءَ یکجھتی کمیٹی ءَ دزبندی کرتگ ءُ گوشتگ کہ مھلوک ءَ گوں دزبندی اِنت آ بلوچ کھولانی سر ءَ گوزوکیں زُلم ءُ زوراکیانی ھلاپ ءَ آیانی ھمراھداری ءَ بہ کن اَنت-

زانگ بہ بیت چریشی ءَ پیسر کراچی ءَ ھم بلوچ یکجھتی کمیٹی ءِ نیمگ ءَ اسلام آباد ءَ نشتگیں مردمانی پلامرزی ءِ ھمدردی ءَ زھرشانی کرتگ –

کھولانی لوٹ اِنت پاکستان ءِ سروزیر عمران خان بئیت ءُ مارا دوچار بہ کپ ایت ءُ مارا مئے بیگواھیں مردمانی بارو ءَ سدکی بہ دنت –