اسلام آباد ءَ بیگواھیں مردمانی کھولانی نندانک برجاہ، عمران آیگ ءَ چم راھیگ

گوستگیں روچ ءَ جھانزیب قمبرانی مات بے ھوش بیگ ءَ پد دوبر نندانک ءَ ھوار بیتگ، سمی دین ءَ یک تامر بندے ءَ بلوچستان ءِ مھلوک ءَ لوٹ کرتگ ءُ گوشتگ کہ مئے سر ءَ پولیس ءِ نیمگ ءَ بیتگیں زوراکیانی ھلاپ ءَ زھرشانیانی جار ءَ بہ جن اَنت –

پاکستان ءِ بنجاھی شھر اسلام آباد ءَ بلوچستان ءَ بیگواہ بیتگیں مردمانی کھولانی نندانک ڈی چوک ءَ سارتیں مولم ءَ برجاہ اِنت،نندانک ءَ نشتگیں مردمانی لوٹ اِنت کہ پاکستان ءِ سروزیر عمران بئیت ءُ مارا سدکی بہ دنت ءُ مئے گاریں مردمانی پد جنگ ءِ کمک ءَ بہ کنت –

بیگواھیں مردمانی کھولاں گوستگیں شش روچاں اسلام آباد نیشنل پریس کلب ءِ دیم ءَ نندانک جتگ ءُ نشتگ اَنت ءُ گوستگیں روچ ءَ آیاں روانک ءِ دروشم ءَ اسلام آباد نیشنل پریس کلب ءِ دیم ءَ داں ڈی چوک اسلام آباد ءَ روانک ءِ کش اِتگ ءُ روانک ءِ وھد ءَ پولیس ءَ روانک ءَ بھر زیروکیں مردم لٹ ءُ کُٹ ھم کرتگ اَنت ءُ روانک ءِ دارگ ءِ جھد کرتگ ءُ روانک ءِ مردم ڈی چوک ءِ روگ ءَ سوبمند بیتگ اَنت –

گوستگیں روچ ءَ برجاہ کرتگیں نندانک مروچی سھب ءَ داں انگت ءَ برجاہ اِنت نندانک ءَ بلوچستان ءَ گار ءُ بیگواہ بیتگیں ڈاکٹر دین مھمد ءِ جنک سمی بلوچ، ھزب اللہ قمبرانی، حسان قمبرانی ءِ کھول، زاکر مجید ءِ مات، جھانزیب قمبرانی ءِ مات، راشد ھسین ءِ کھول، نسیم بلوچ ءِ کھول، مھر گل مری ءِ کھول، شبیر بلوچ ءِ کھول، سعید اھمد ءِ کھول ءَ بلوچستان ءَ بازیں بیگواھیں مردمانی کھول ھوار اَنت –

نندانک گوستگیں شپ ءَ پولیس ءُ دگہ ادارھانی انگیر ءِ تہ ءَ بیتگ ءُ نندانک ءَ بیگواھیں بلوچانی کھول سارتیں مولم ءَ ڈی چوک ءَ دگ ءِ سر ءَ سجوئیں شپ ءَ نندانکی زھرشانی ءَ بیتگ اَنت –

نندانک ءَ گوستگیں روچ ءَ ڈی چوک ءَ گپ ءُ تران ءِ وھد ءَ جھانزیب قمبرانی ءِ مات بے ھوش بیتگ اَت ءُ چریشی ءَ پد آ نادراہ جاہ ءُ برگ بیتگ اَت ءُ نادراھی ءَ جوڑ بیگ ءَ پد آئی ءَ دوبر گوستگیں شپ ءَ نندانک ءَ اتکگ ءُ بھر زرتگ –

ھمے وڑ گوستگیں شپ ءَ سمی بلوچ ءَ وتی یک تامرے ءَ ھم بلوچستان ءِ مھلوک ءَ گوں دزبندی کرتگ ءُ گوشتگ کہ گوستگیں روچ ءَ مئے سر ءَ پولیس ءِ نیمگ بیتگیں لَٹ ءُ کُٹانی ھلاپ ءَ بلوچستان ءَ زھرشانیانی جار ءَ بہ جن اَنت ءُ زھرشانی بہ کن اَنت –

بیگواھیں مردمانی کھولانی گوشگ اِنت پاکستان ءِ سروزیر بئیت ءُ مارا گوں دوچار بہ کپ ایت ءُ مئے بیگواھیں مردمانی بارو ءَ مارا گپے دست ءَ بہ دنت –

بلے مروچی بازیں روچانی گوزگ ءَ پد پاکستان ءِ مزنیں ادارھاں بیگواھیں بلوچانی کھولانی بنجل ءَ آیگ ءِ واک نہ کش اِتگ –

بیگواھیں مردمانی کھولانی گوشگ اِنت اے نندانکی بنجل ھما وھد ءَ داں برجاہ بیت سروزیر پاکستان نئیت اِنت –