پسنی ءَ کُشتگیں مردمانی کشندھانی دزگیر نہ کنگ ءِ ھلاپ ءَ کھولاں زھرشانی کرتگ

سر بیتگیں ھالانی رد ءَ مروچی پسنی ءَ کُشتگیں مردمانی کشندھانی دزگیر نہ کنگ ءِ ھلاپ ءَ کھولاں زھرشانی کرتگ –

زھرشانی کنوکاں اسٹنٹ کمشنر پسنی ءِ کارگس ءِ دیم ءَ زھرشانی کرتگ، زھرشانی ےَ زالبول ءُ چک ھم ھوار بیتگ اَنت –

زھرشابی کنوکاں گوشتگ کہ حمید اللہ، جمیل ءُ ماجد اکبر اوغان ءِ کہ گوستگیں ھشت فروری ءَ گوادر سیشن ءَ بَری بیتگ اَنت چریشی ءَ پد گوادر ءَ دیم پہ پسنی ءَ آیگ ءَ بیتگ اَنت مزن شھدگ ءِ سر ءَ آ تیرانی نشانگ کنگ ءُ کُشگ بیتگ اَنت –

کھول ءَ گوشت کہ ما ھما کشندھانی نام ءَ ارزی نبشتگ کنائینتگ اَنت بلے پولیس ءَ دگہ لھتے جرمکار دزگیر کرتگ اَنت ءُ آ انگت ءَ ڈن ءَ ترگ ءَ اَنت-

کھولاں گوشت کہ پولیس آیاں دزجنگ ءَ ترسگ ءَ اِنت ءُ مئے دزبندی ھمیش اِنت کُشندہ دزگیر کنگ بہ بنت –

دومی نیمگ ءَ پولیس ءَ وتی جارانکی ءَ پسنی ءَ ھواریں کوش ءَ سَے کشندھانی دزگیر ءِ ھال شنگ کرتگ –

پولیس ءِ گوشگ اِنت پسنی ءِ وارڈ نمبر شش ءُ پنچ انگیر کرتگ ءُ اود ءَ کوش ءَ ھواریں ناصر ء عمر، آصف ء عمر ءُ سلیم ء رفیق بنگالی دزگیر کرتگ اَنت –