اسلام آباد: بیگواھیں مردمانی زھرشانی نندانک سیمی روچ ءَ برجاہ

زھرشانی نندانک ءَ پی ٹی ایم ءِ رھشون منظور پشتین ءَ کھولانی گون ءَ پدردی ءِ درشان کنگ ءَ بنجل ءَ اتکگ ءُ پدردی درشان کرتگ –

پاکستان ءِ بنجاھی شھر اسلام آباد ءَ نیشنل پریس کلب ءِ دیم ءَ مروچی سیمی روچ ءَ بلوچستان ءَ بیگواہ بیتگیں مردمانی کھولانی زھرشانی نندانک برجاہ-

زھرشانی بنجل ءَ ڈاکٹر دین مھمد ءِ جنک سمی دین، شبیر بلوچ ءِ گوھار سیما بلوچ، عرب امارات ءَ بیگواہ بیتگیں راشد ھسین ءِ مات ءُ آئی ءِ براتزتک ماھزیب بلوچ، ھانی گُل بلوچ ءُ بلوچ نودر گل آزاد ءِ بیگواھیں رھشون زاکر مجید ءِ مات ءَ ھوار ھزب اللہ کمبرانی مھمد ھسان کمبرانی ءِ کھول ھم ھوار اَنت –

چاردہ فروری ءَ ھسان کمبرانی ءُ ھزب اللہ کمبرانی ءِ بیگواھی ءَ یک سالے سرجم بیگ ءَ چاگردی رسانکجاہ ٹوئٹر ءَ کمپئن ءِ جار پِرینگ بیتگ –

اسلام آباد ءَ بیگواھیں مردمانی نیمگ ءَ بیگواھیں مردمانی واستا جوڑ کرتگیں کمیشن ءِ نادلگوشی ءُ بیگواھیں مردمانی کھولانی ریپینگ ءِ پژدر ءَ بیگواھیں مردمانی کھولاں گوسگیں سَے روچاں اسلام آباد ءِ نیشنل پریس کلب ءِ دیم ءَ زھرشانی نندانک جتگ ءُ نشتگ اَنت –

کھولانی گوشگ اِنت مئے گار ءُ بیگواھیں مردمانی واستا پاکستان ءِ نیمگ ءَ یک کمیشن ءِ جوڑ کنگ بیتگ آ کمیشن مارا ھشک ءَ ریپینگ ءَ اِنت ءُ مئے گپاں گوشدارگ ءَ نہ اِنت –

آیانی گوشگ اِنت کہ کمیشن ءَ ھروھد ءَ ما پیش بیتگیں آئی ءَ مارا ھروھد ءَ جتا جتائیں ھنر ءُ ٹگی کرتگ ءُ رپینتگ ءُ گڈی ءَ گوشتگ مئے گور ءَ نِی مہ یا ءِ –

مروچی اسلام آباد نیشنل پریس کلب ءِ دیم ءَ وائس فار بلوچ مسنگ پرسنز ءِ چیئرمین نصر اللہ بلوچ ھم جاڑیگ اِنت ءُ آئی ءَ گوشتگ کہ مروچی ما سَے روچ اِنت نشتگ اِنت اد ءَ پاکستان ءِ راجماناں نشتگیں مردماں اے سما نیست اِنت کہ بلوچستان ءَ اتکگیں مردمانی لوٹ چی اَنت ءُ آ چی گوشگ ءَ اتکگ اَنت –

نصر اللہ بلوچ ءَ گوشت کہ اے وھد ھما اِنت کہ دراھیں زیردست ءُ لگتمالیں راجاں یکجاہ بیگ ءُ وتی ھکانی پدجنی ءَ توار چِست کنگی اِنت –

آئی ءَ گوشت کہ آ راج پشتونے بیت یا سندھی ءِ بیت یا زیردستیں پنجاپی ءِ بیت آئی ءِ گون زلم ءُ زوراکی بنت آیاں ما ایرجن ایں –

نصراللہ بلوچ ءَ گوشت: پاکستان ءَ آمیدگس ھست اَنت آئی ءِ سیول آمیدگس ھست اَنت اگاں آئی ءَ سیول آمیدگسانی سر ءَ اوست نیست گڑا وتی ملٹری آمیدگساں بیگواھیں مردماں پیش بہ کنت ءُ آیاں کانود ءِ رد ءَ سزا بہ دنت بلے اے وڑ ءَ گار ءُ بیگواہ کنگ پاکستان ءِ کانودانی لگتمالی ءُ انسانی ھکانی رد ءَ ھم اے ھکانی لگتمالی ءِ –

نصراللہ بلوچ ءَ گوشت کہ پاکستان ءَ مئے واستا نا پروفیسر اِشتگ، نا نودربر اشتگ نا ورناہ اشِتگ نا کماش اِشتگ ءُ بلوچستان ءَ سیاست کنگ مردینانی واستا کھرے ءِ کوھے ءِ سر ءَ کپگ ءِ بروبری ءَ سر بیتگ – ھمے واستا مئے ھما زالبول کہ ماہ ءَ نہ دیستگ اَنت آ مروچی دگانی سر ءَ نشتگ ءُ انساپ لوٹگ ءَ اَنت –

ھمے وڑ ءَ پی ٹی ایم ءِ رھشون منظور پشتین ءَ ھم اسلام آباد ءَ بیگواھیں بلوچانی کھولانی گون ءَ اتکگ ءُ پدردی درشان کرتگ –

منظور پشتین ءِ ھمراھی ءَ پی ٹی ایم ءِ دگہ باسک ھم ھوار بیتگ اَنت –

منظور پشتین ءَ بنجل ءَ تران کنان ءَ گوشت کہ من ءَ بژن اِنت کہ پاکستان ءِ رسانکدر کشمیر ءِ بارہ ءَ گپ کن اَنت، ھندوستان ءَ دھکانی بارہ ءَ گپ کن اَنت بلے آیانی لوگ ءِ دیم ءَ اتکگیں مردمانی لوٹ آں گوشدارگ ءُ گپ ءَ نہ کن اَنت-

منظور پشتین ءَ گوشت کہ چریشی ءَ ھمیشی ءَ زانگ بیت پاکستان ءِ ریاست ءَ انسانی درکار نہ اِنت بلکیں آیانی وسائلانی درکار اِنت مروچی اگاں کشمیر پاکستان ءِ دست ءَ کپ ایت گڑا آیانی گپ ھمے وڑ ءَ چیر تر اَنت-

منظور پشتین ءَ گوشت کہ پاکستان ءِ سروزیر عمران ءَ واک ءَ پیسر گوشتگ کہ اگاں مان اقتدار ءَ بہ باں بیگواھیں مردمانی جیڑہ ءَ ھلاس کن آں بلے تنی وھدی آئی ءِ اقتدار ءَ بازیں وھد گوزگ ءَ پد ھم آئی ءَ ھچ نہ کرتگ ءُ نِی بلوچستان ءِ لاچاریں مردم آئی ءِ گس ءِ دپ ءَ اتکگ ءُ وتی بیگواھیں مردمانی واستا انساپ لوٹگ ءَ اَنت بلے عمران گندگ نہ بیت –

منظور پشتین ءَ گوشت کہ من اے پُر ایمنیں جد ءَ جھد ءَ ھمے سرپد کہ اے ھما زانتکار ءُ کواسیں زانتانی برود اِنت اشانی پاکستان ءِ ھمک شھر ءَ زھرشانی کرتگ آ پُر ایمن بیتگ اَنت آیانی اے جد ءُ جھد ءَ دروت ندر کن آں –

زانگ بہ بیت گوستگیں سَے روچاں اسلام آباد ءِ نیشنل پریس کلب ءِ دیم ءَ بلوچستان ءَ گار ءُ بیگواھیں مردمانی بازیں کھولے ھوار اِنت ءُ آیانی گوشگ اِنت اے زھرشانی نندانک داں چاردہ فروری ءَ برجاہ بیت ءُ چاردہ فروری ءِ روچ ءَ مچی ءِ زھرشانی اسلام آباد ءِ پریس کلب ءِ دیم ءَ کنگ بیت اِنت –