بیگواھیں مردمانی واستا جوڑ بیتگیں کمیشن بس نامے جوڑ بیتگ – سمی دین

بیگواھیں دین مھمد ءِ جنک سمی دین مھمد بلوچ ءَ شال ءَ بیگواھیں مردمانی کمیشن ءِ دیم ءَ پیش بیگ ءَ پد بیگواھیں مردمانی واستا جوڑ بیتگیں کمیشن بس نامے جوڑ بیتگ ءُ کھولانی گون ءَ کمک کنگ ءَ نہ اِنت –

سمی بلوچ ءِ گوشگ اَت منی پِت ڈاکٹر دین مھمد بلوچ بیست ءُ ھشت جون دوھزار ءُ نُھ ءَ پاکستانی چیریں ادارھاں زورانسری آوار جتگ ءُ بیگواہ کرتگ –

آئی ءَ گْوشت کہ وتی پِت ءِ سلامتی ءِ یلہ کنائینگ ءَ پاکستان ءِ سپریم کورٹ، ھائی کورٹ ءَ ھوار درسیں ادارھاں شتگ اَنگ بلے من ءَ ھچ انساپ نہ رس اِتگ –

آئی ءَ گوشت کہ چریشاں پد وھدیکہ پاکستان ءَ بیگواھیں مردمانی واستا یک کمیشنے جوڑ بیتگ گڑا من داں دوھزار ءُ چاردہ داں ھبدہ ءَ یکشل ءَ آئی ءِ دیم ءَ پیش بیتگ بلے یک رندے وانگی پرکاری ءِ سوب ءَ کمیشن ءَ پیش بیگ ءِ موہ نہ رس اِتگ گڑا آئی ءَ منی پت ءِ نام کمیشن ءَ چہ درکرتگ،چریشی ءَ پد دوبر پت ءِ نام کمیشن ءَ ھوار کنگ ءِ دزبندی کرتگ ءُ گوستگیں سال ءَ داں انیگ ءَ پنچ رند ءَ کمیشن ءِ دیم ءَ پیش بیتگ آں –

آئی ءَ گوشت کہ وھدیکہ من کمیشن ءِ پیشیاں من پیش بیتگ آں گڑا کمیشن ءَ بھانگ کرتگ ءُ گوشتگ کہ کیس ءِ رپورٹ سرجم نہ اِنت برے گوشتگ ئِے آفیسر اد ءَ نہ اِنت –

آئی ءَ گوشت کہ اے کمیشن ءَ آئی ایس آئی، ایم آئی پولیس ءُ دگہ ادارہ جاڑیگ اَنت ءُ اشانی رویش کھولانی گون ءَ ترند اَنت ءُ بیگواھیں مردمانی کھولانی گون ءَ اے ادارہ بے ھودیں رنگے ءَ دیم ءَ کاینت –

آئی ءَ گوشت من کمیشن ءَ را گوشتگ کہ من دوازدہ ادارانی سفر ءَ کن آں (شال) ءَ سر باں بازیں جیڑہ بنت من ءَ منی پت ءِ بارہ ءَ ھچ گپ گوشگ نہ بیت ءُ گڑا کمیشن ءَ گوشتگ تو مہ یا –

آئی ءَ گوشت کہ اے کمیشن بس نامے جوڑ بیتگ ھما رنگ ءَ پاکستان ءِ دگہ ادارہ ءُ انسانی ھکانی گل ھست اَنت اے ادارہ بس نامگپت اَنت –

آئی ءَ گوشت وھدیکہ اے کمیشن جوڑ بیتگ اشی ءِ تہ ءَ کھولانی گپ گوشدارگ نہ بنت اگاں اے کمیشن بیگواھیں مردمانی واستا جوڑ کنگ بیتگ گڑا گپاں تچک ءَ تچک گوش بہ دار اِیت –

زانگ بہ بیت بیگواھیں مردمانی یلہ کنائینگ ءِ واستا ھستیں کمیشن ھمے سال ءِ ھشت فروری ءَ بلوچستان ءِ بنجاھی شھر شال ءَ کیسانی پیشی ءَ کنگ اِنت – کمیشن وفاقی سرکار ءِ پرمان ءَ بیگواھیں مردمانی درگیجگ ءَ جوڑ کنگ بیتگ –

کمیشن ءِ سروکی ءَ بلوچستان ءِ ھائی کورٹ ءِ پیسریگیں جج جسٹس فضل الرحمن کنگ ءَ اِنت –

بلے بیگواھیں مردمانی کھول اے کمیشن ءَ سدک نہ اَنت ءُ آیاں جتاجتائیں وھداں کمیشن ءِ رویشانی سر ءَ وتی لیکھ درشان کرتگ اَنت –

گوستگیں روچ ءَ بی ایس او آزاد ءِ بیگواھیں رھشون شبیر بلوچ ءِ گوھار کمیشن ءِ پیش بیگ ءَ پد آئی ءَ گوشتگ منی برات پاکستانی سیکورٹی فورسز ءِ گور ءَ اِنت – شبیر آئی ءِ لوگبانک ءِ دیم ءَ آوار جنگ بیتگ – اگاں کمیشن ءِ تہ ءَ اینکس ساہ نیست کہ سیکورٹی ادارھاں شبیر ءُ دگہ بیگواھیں مردمانی بارہ ءَ جست بہ کنت ھدا ءِ نام ءَ مئے کیس ءَ ھراب مہ کنت ءُ اشی ءَ تچک ءَ بہ گوش ایت سیکورٹی ادارہ مئے گپ ءَ دلگوش نہ کن اَنت –

زانگ بہ بیت گوستگیں سال ءَ انسانی ھکانی باسک راشد ھسین ءِ مات کمیشن ءِ دیم ءَ پیش بیتگ ءُ آئی ءَ کمیشن ءِ رویشانی سر ءَ وتی لیکھ درشان کتگ اِت اَنت ءُ گوشتگ اَت کہ کمیشن ءِ سروک جسٹس فضل الرحمن ءَ کھولانی گون ءَ بے ھودیں رنگے ءَ دیم ءَ اتکگ-

آئی ءِ رد ءَ “وھدیکہ ما چہ آئی ءَ بیگواھیں مردمانی بارہ ءَ کمک لوٹ اِتگ گڑا کمیشن ءِ سروک ءَ گوشتگ من وھدیکہ اد ءَ پاد کایاں ڈن ءَ شمارا ھیرات ءِ زر دے آں ”

بیگواھیں مردمانی کھولانی رد ءَ ما وتی دوستگیں مردمانی یلہ کنائینگ ءِ واستا لاچاری ءِ سوب ءَ پیش بہ ایں گڑا “ کمیشن سرجم ءَ چیریں ادارھانی لَنکُکانی سر ءَ سُریت ءُ دروگ بندگ ءَ ابید دگہ ھچ نہ کنت ”-

وائس فار بلوچ مسنگ پرسنز ءِ رد ءَ گل ءَ دوھزار ءُ چاردہ ءَ کمیشن رد کرتگ، بیگواھیں مردمانی کھول وتی کیساں کمیشن ءَ برگ ءَ اَنت ءُ پیش بیگ ءَ اَنت بلے کمیشن ءِ کار ءُ کسب ھما رنگ ءَ نا اُمیتی اَنت –