آواران ءَ پاکستانی پوج ءِ سر ءَ اُرش، زمّہ واری بی ایل ایف ءَ منّ اِتگ

آواران ءَ سَے جاھاں پاکستانی پوج ءِ سر ءَ اُرش کُتگ ھشت کارمند کُشتگ اَنت بازینے زدگ کتگ – میجر گْوھرام بلوچ

سربوتگیں ھالانی رِد ءَ مروچی ناشناسیں سلاہ بندیں مردماں آواران ءِ دمگ تیرتیج، لباچ چوکو ءَ پاکستانی پوج ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرشانی زمّہ واری منّ اِتگ گوشتگ کہ مئے سرمچاراں آواران ءِ دمگ تیرتیج جک ءِ کوہ ءِ سرے پوجی پانگس، سرمچارانی رندگیری کنوکیں پوجی کارمند ءُ لباچ چوکو ءَ پوجی پانگس ءِ سر ءَ اُرش کتگ ءُ پاکستانی پوج ءِ ھشت کارمند کُشتگ ءُ بازینت زدگ کتگ اَنت-

جارکش ءَ گوشتگ کہ ھپت فروری ءَ یک شمبے ءِ بیگاہ ءِ شش ءَ تیرتیج جک ءَ پوجی پانگس ءِ نگھپان دور جنگیں توپک ءِ نشانگ کتگ ءُ کُشتگ ءُ ھمے وھد ءَ پانگس ءِ سر ءَ گوں مزنیں سلاھاں اُرش کتگ ، اُرش ءَ چہ دگہ یک کارمندے مرتگ ءُ بازینے زدگ بوتگ- اُرش ءَ پد پاکستانی پوج ءَ سرمچارانی رندگیری کنگ ءِ جُھد کتگ بلے سرمچاراں جوانیں جنگی رِپکاں چہ تیرتیج ءَ سنگر گپتگ ءُ پوجی کارمند مزنیں سلاھانی گون ءَ نشانگ کرتگ انت – اُرش ءَ چہ پاکستانی پوج ءِ چار کارمند ھما جاہ ءَ مُرتگ ءُ دگہ بازینے زدگ بوتگ اَنت-

جارکش ءَ گوشتگ کہ شش ءُ نیم ءَ مئے سرمچاراں لباچ چوکو ءَ برجاھیں پاکستانی پوج ءِ پانگس ءِ سر ءَ راکٹ ءُ نوکیں سلاھانی گون ءَ اُرش کتگ، اے اُرش ءَ چہ زورگیریں پاکستانی پوج ءِ دو کارمند مرتگ ءُ دگہ دو زدگ بوتگ اَنت-

گڈسر ءَ جارکش میجر گْوھرام بلوچ ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں زورگپتیں پاکستانی پوج ءِ سر ءَ مئے اُرش برجاہ مان انت –