کراچی ءَ بیگواھیں بلوچانی ھاتر ءَ زھرشانی برجاہ

اے وھد ءَ مئے گور ءَ راجی تاکت ءُ ایمانداریں سنگتانی جزبگ ءَ ابید دگہ ھچ وڑیں مزنیں تاکت ءُ مال مڈی ءِ نیست اگاں اے دلپروش بہ بنت ما ھچ درد ءِ دوا نہ بہ ایں – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ چاردہ روچ سرجم بوتگ –

گوستگیں روچاں یل بوتگیں عبدالمجید ءِ کھول ءَ بنجل ءَ اتکگ ءَ وائس فار بلوچ مسنگ پرسنز ءِ منّت گپتگ –

عبدالمجید ء شھداد جھمنند ھب چوکی گوستگیں سال ءَ پاکستانی پوج ءَ آوار جتگ ءُ چیریں جاھاں بندیگ کرتگ، عبدالمجید ءِ یل کنگ ءِ ھاتر ءَ وائس فار بلوچ مسنگ پرسنز ءَ آئی کھول ءِ گون ءَ زھرشانیاں ھوار بوتگ –

ھمے وھد وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ مارا اے وھد ءَ وتی پگر دور چاری کنگی انت پرچاکہ اے وھد ءَ دشمن وتی ھنراں چہ بلوچ ءِ پُرایمنیں جھد ءِ نیزور کنگ ءَ وتی درسیں تاکت ءَ کارمرز کنگ ءِ انت مدامی لشکر کشیانی میان ءَ بازیں پرزنداں آوار جنگ ءُ آھانی جوناں چگل دیگ ءَ اِنت –

آئی ءَ گوشتگ کہ وھدیکہ پُرایمنیں جھدے روانک ءُ زھرشانیانی تہ ءَ گیشی کیت گڑا دژمن وتی رکینگ ءِ ھاتر ءَ وڑ وڑیں ھنر کنت – مروچی بلوچستان ءِ تہ ءَ ھمے وڑ بوگ انت، بازیں جیڑہ ءُ جنجال ءِ ودی کنگ انت ءُ مھلوک ءَ مازگی جیڑھاں گوں دُچار کنگ انت –

ماما قدیر بلوچ ءَ گوشتگ کہ دژمن وتی پندلاں گیش کنگ ھر روچ نوکیں دابے ءَ اُرش کنت – مروچی اگاں مئے تہ ءَ کسانیں اڑ ءُ جنجال ھست انت دژمن ھمیشی ءَ چہ پائدگ چست کنت ءُ مئے تہ ءَ رد پھمی پیداک کنت ءُ وتی اسل مکسد ءَ سرجم کنت –

گڈسر ءَ ماما قدیر بلوچ ءَ گوشتگ کہ من ھمے پھماں کہ اے وھد ءَ مئے گور ءَ راجی تاکت ءُ ایمانداریں سنگتانی جزبگ ءَ ابید دگے ھچ وڑیں مزنیں تاکت ءُ مال مڈی ءِ نیست اگاں اے دلپروش بہ بنت ما ھچ درد ءِ دوا نہ بہ ایں –