بلوچستان: دگ ءِ وئیلاں شش مردم بیران نُھ ٹپی

تربت، ھب، نال ، چمن، ھزدار ءَ دگ ءِ وئیلاں زالبولے ءَ ھوار شش مردم بیران ءُ نھ مردم ٹپی بوتگ اَنت –

ٹی بی پی پتر ھال ءَ سر بیتگیں ھالانی رِد ءَ کیچ ءِ دمگ تربت دشت ءَ دگ ءِ وئیلے ءَ بلوچی زبان ءِ نامداریں شائر شرف شاد ءِ ورنائیں بچ زین شرف بیران بوتگ –

دومی نیمگ ءَ بلوچستان ءِ دمگ ھزدار ءَ دگ ءِ دو جتائیں وئیلاں زالبولے ءَ ھوار دو مردم بیران ءُ ھپٹ ٹپی بوتگ اَنت –

اھوالکار ءِ رِد ءَ اولی وئیل اورناچ ءِ دمگ گاسلیٹی ءَ دیم ءَ اتکگ کہ کراچی ءَ رؤکیں گاڑی ءَ گوں ٹرالرے ءَ ٹکر وارتگ، ٹکر ورگ ءِ سوب ءَ زالبولے بیران بوتگ ھپت مردم ٹپی بوتگ اَنت، ٹپی بوتگیں مردمانی پجار کریم جان ء عبدالحمید، داد جان، محمد، محمد ھاشم، امان اللہ ء شعیب ءَ ھوار ھپت مردم ٹپی بوتگ اَنت، ھپتیں مردم پنجگور ءِ دمگ کلگ ءِ نندوک انت –

دمگی لیویز ءَ ٹپی بوتگیں مردم ھزدار وڈھ ءِ نادراھجاہ ءَ سرکتگ انت وھدیکہ دومی وئیل ھزدار ءِ دمگ پیر عمر ءَ دیم ءَ اتک کہ تیز رؤکیں گاڑی ءِ چپی بوگءَ یک مردمے بیران بوتگ، بیران بوتگیں مردم ءِ پجار عبدالواسع ء جمعہ خان جھمنند مستونگ ءِ نام ءَ چہ بوتگ – آئی ءِ لاش ٹیچنگ نادراھجاہ ءَ سرکنگ بوتگ –

اشی ءَ ابید بلوچستان ءِ دمگ ھب ءَ ساکران دگ ءِ سر ءَ اچار ھوٹل ءِ نزیک ءَ تیز رؤکیں گاڑی ءَ پرپٹ ءِ ٹکر جتگ –

ٹکر ورگ ءِ سوب ءَ پرپٹ سواریں دو ورنا سک باز ٹپی بوتگ اَنت -ھمے وڑ ھب ءَ دگہ وئیلے ءَ دو مردم بیران بوتگ اَنت –

گیشیں ھالانی رد ءَ ھب بھوانی گھر اسٹاپ ءِ نزیک ءَ گاڑی ءِ گوں پرپٹے ءَ ٹکر وارتگ، ٹکر ورگ ءِ سوب ءَ پرپٹ سواریں دو مردم بیران بوتگ اَنت، بیران بوتگیں مردمانی پجار غلام رسول ء محمد عثمان، سجاد علی ء کرم خان نام ءَ چہ بوتگ انت- دؤئیں مردم مدینہ کالونی مھلہ جنوبی کراچی بلدیہ نندوک انت –

اشی ءَ ابید چمن باڈر ءِ سر ءَ دگ ءِ وئیلے ءَ ورنایے بیران بوتگ، بیران بوتگیں ورنا ءِ پجار دنیگت ءَ نہ بوتگ آئی ءِ لاش دمگی سول ھسپتال ءَ برگ بوتگ –