دست بندی – زبادی بلوچ

نبشتانک: دست بندی

نبشتہ کار: زبادی بلوچ

دی بلوچستان پوسٹ

منی مکھیں مات ءُ گھاراں
دُروت ءُ درا بات اِت، ردی چہ انسان ءَ بیت پد ءَ بلوچ ءَ گیش ءَ چہ گیش بلوچستان یک جنگ زدیں جاھے کہ اود ءَ ھرچ روچ یک ماتے ءِ بچ چہ آئی ءِ چمانی دیم ءَ تیرانی آماچ کنگ بیت۔ بلے اے گپ ھچبر دل ءَ برگی نہ اِنت کہ آجوئی ءُ آجو بوؤکیں زمین مُدام ھون لوٹ اِیت۔ بید ء ھون ءَ زمین آجو ھچبر نہ بیت۔ دگنیا ءِ راجدپتر ءَ اگاں پٹ ءُ پول بہ کن ئے تاں مارا اے رنگیں بازیں کسہ دیم ءَ کاینت کہ گلامیں راجاں پہ وتی زمین ءِ رکینگ ءِ جھد ءِ ھاتر ءَ وتی سرانی کُربانی داتگ۔

منی مکھیں مات ءُ زھر ءَ پریں براس ءُ گھاراں-

بلوچ ءِ راجدپتر ھست اِنت ھمے گمان ءَ مارا دنت کہ بلوچ ءَ دائم ءَ پروش وارتگ گُڑا بزاں وتی جبزگانی ردیں رنگ ءَ پیلو کنگ ءِ سوب ءَ۔ مرچی بلوچ ءَ 70 سال بیت گوں ھون واریں پاکستانی لشکر ءِ گوما جنگ کنگ ءَ اِنت آ اوں اے جنگ ءِ تہ ءَ بلوچ ءَ وڑ وڑیں تکلیپی ءُ سکی دیستگ اَنت۔ اِستان ءِ پندل باز رنگ ءُ داب ءَ دیستگ اَنت بلے بلوچ ءَ باز ھرچ وھد ءَ کہ پروش وارتگ یا ردی کُرتگ گُڑا بزاں اود ءَ بلوچ ءَ سیاسی ءُ سائنسی رنگ ءَ ابید وتی توکی مارشتانی درانگاز کنگ ءِ سوب ءَ اِستان ءِ لشکر ءِ پندلانی آماچ بوتگ۔

وت ءَ را گھرام ءُ چاکر ءِ پدریچ لیکوکاں-

مرچی میان اُستمانی سیاست ءِ دروشم چہ ساریگیں دہ سال ءِ سیاست ءَ چہ باز گیش گچین ءُ بدل اِنت۔ مرچی دُگنیا ءِ پندل ساز وتی لوٹانی پیلو کنگ ءِ واست ءَ وتی جند ءِ سرکار ءُ کاردار ءَ تاوان دیگ ءَ چہ ھچ چک ءُ پد نہ بنت۔ ھمے داب ءَ آھانی کر ءَ بلوچ اوں بید ء یک لیبوکے ءَ چہ گیش دگہ ھچّے نہ اِنت۔ میان اُستمانی دُور چار ءُ پندل ساز مُدام ھمے چیز ءِ لوٹوک اَنت کہ کجام ھم جاھے کہ اود ءَ آیانی سیتّ بندوک بہ بنت گُڑا آ اود ءَ وتی دست رس ءَ کنت وھدیں آئی ءِ سیت ءُ پائدگ کہ اود ءَ نہ بنت گُڑا بزاں اود ءَ میان اُستمانی انسانی گَل ءُ ایمن ءِ گپ جنوکیں درستیں مھلوک ھاموش بنت۔

اکبر ءُ ھیربیار ءِ اوبادگاں-

آجوئی مدامی وتی بچاں وارت بانُک کریمہ ھم یک بلوچ ماتی بچے بوتگ۔ آئی ءِ سیاسی چست ءُ ھیر ءُ آئی ءِ پہ زمین ءَ داتگیں کُربانی ءَ کس پراموش کُرت نہ کنت۔ بلے بانک ءِ شھید بوگ بائد اِنت پہ بلوچ ءُ بلوچ ءِ سیاست ءَ یک نوکیں دورے بہ بیت کہ اے دور استمانی ءُ میان استمانی سیاست ءَ گیش ءُ گیوار بہ کنت ءُ بہ چار اِیت ناں کہ کْوھنیگیں روچانی ردیاں دوبر دیم ءَ بیار اِت بلوچ ءَ کہ اینکس نُکس وتی گْوست ءِ سیاست ءَ وارتگ بائد ھمیش اِنت کہ نوں آ رنگیں ردی نوں مہ کنت۔ انوگیں وھد ءَ بلوچ ءَ وتئ جبزگانی کارمرز کنگ ءَ چہ گیش گوں سوچ ءُ پکر ءَ یک نوکیں دابے ءَ وتی آجوئی ءِ جنگ دیم ءَ برگی اِنت۔

منی ماس ءُ براس ءُ گھاراں جھد بہ کن اِت کہ وتی جھد ءِ ساروکانی دیم ءَ ھمے گپ ءَ ایر بہ کن اِت کہ بس انت نوں یک ءُ دومیگ ءِ پُچکانی شودگ نوں باز جاہ ءَ، ءُ باز وھداں گوں یکشمتی ءَ وتی جھد ءَ دیم ءَ بہ بر اِت جوزگ مرچی ھست اَنت بلے باندا نہ بنت مرشی بانک ءِ کبر ءِ سرون ءَ نندوکیں مردم وتی ارساں ریچ اَنت بلے باندا پد ءَ بے ھیال بنت شرتر ھمیش اِنت کہ وتی جوزگ ءُ مارشتاں پہ سوچ ءُ پکر کارمز بہ کن اِت دانکہ مرچیگیں جوزگ دیم ءَ ھم ھمے رنگ ءَ برجم بہ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔