کریمہ بلوچ ءِ “کل ءُ کسارت”ھرتال برجاہ

نودربر رھشون کریمہ بلوچ ءِ کَل ءُ کسارت ءِ درگت ءَ کیچ ءِ بنجاھی شھر تربت ءَ سرجم ءَ ھرتال برجاہ اِنت –

تربت ءِ شھر ءِ دراھیں کسان ءُ مزنیں باپاری بنجل بند اَنت – ھرتال ءِ جار بلوچ یکجھتی کمیٹی ءِ نیمگ ءَ دیگ بیتگ – کریمہ بلوچ ءِ کل ءُ کسارت مروچی آئی ءِ بنکی ھنکین تمپ ءَ بیت اِنت –

بلوچستان ءِ بازیں جاھاں ھوار کراچی ءُ دگہ جاھاں بازیں کچے ءَ مردمانی آیگ گوستگیں روچ ءَ بندات بیتگ چریشی ءَ دگانی سر ءَ پوجی کارمندانی اوشتگ ءَ مردم آیگ ءَ داشتگ اَنت – مروچی سھب ءَ ھم بازیں جاھاں مردمانی آیگ برجاہ اِنت –

کریمہ بلوچ ءِ کل ءُ کسارت مروچی آئی ءِ بنکی ھنکین ءَ بیت اِنت وھدیکہ بازیں جاھاں گائبانہ نماز جنازہ ھم وانگ بیت اِنت – زانگ بہ بیت گوستگیں روچ ءَ جسد کراچی ءَ بلوچانی دست ءَ دیگ نہ بیتگ چریشی ءَ پد گائبانہ نماز جنازہ ءِ وانگ ءَ پد زھرشانی بیتگ –

دربندیں ھرتال ءِ جار بلوچ یکجھتی کمیٹی ءِ نیمگ ءَ دیگ بیتگ – کمیٹی ءِ گوشگ اِنت کہ بلوچ راجی رھشون کریمہ بلوچ ءِ جسد کراچی ءَ آیگ ءَ پد پوج ءَ دستیگ کرتگ ءُ گڈی دیدار ءَ نئیشتگ ءُ جسد ءِ کمشرپی کرتگ –

جار ءَ گوشگ بیتگ کہ ریاست مزنیں دستاں کارمرد کنگ ءَ کیچ ءِ بازیں جاھاں نیٹورک اش بند کرتگ ءُ بانک کریمہ بلوچ ءِ گڈی دیدار ءِ واستا سرجمیں راہ ءُ دربند کنگ بیتگ اَنت ءُ بانک کریمہ ءِ بنکی ھنکین تمپ سرجم ءَ پوجی انگر ءِ تہ ءَ اِنت –