نبشتانک: وتی گناھاں بہ چار
نبشتہ کار: ھدایت بلوچ
دی بلوچستان پوسٹ
ھست اَت یک سوداگرے وتی میتگ ءَ چہ دور دگہ میتگاں شُت لوگ پہ لوگ گشت ءُ چیز ئِے بھا کُرت پہ وتی لاپ ءِ شوھازگ ءَ یک روچے ھمے سوداگر ءِ سر یک دیوانے ءَ مردمانی مُچی ءَ کپت ۔۔ دیوانءِ تہ ءَ باز مردم نشتگ ات سوداگر ءَ لھتیں کیمتی مُھرگ گون ات ایشی ءَ وتی مھرگ مردماں پیش داشت ءُ ایشانی ساڑا بندات ئِے کُرت کہ اے چشیں شریں کیمتی ئیں مُھرگ انت ۔ایشانی نھاد لَکّانی ھساب ءَ انت-
ھمے دیوان ءِ تہ ءَ یک دُزے اوں نشتگ ات دُز ءَ ایشی ءِ کیمتی مھرگ دیست انت دُز ءِ نیت ھراب بوت کہ من اے مرد ءِ مھرگاں پچ بہ گراں دیوان ءِ مردمانی چہ مھرگانی چارگ ءُ زورگ ءَ پَد سوداگر ءَ وھدے دیوان ءِ مردم رُکست کُت انت کہ نوں من دیم پہ وتی میتگ ءَ رواں دُز ءَ گُشت تئی میتگ زاناں کجا انت سوداگر ءَ گشت من پلانہ میتگ ءِ جاھمننداں دُز ءَ گُشت منی راہ اوں ھما نیمگ ءَ کپ اِیت من تو ھمسپر بہ اِیں راہ دور انت دو پہ دو ءَ گپ ءُ تران کنیں سپر اوں وشتر گوز اِیت سوداگر ءَ گُشت گُڑا بیا کہ رویں بے وھد انت روان روان جاھے شُت اَنت اے شپ کپت انت ایشاں ھمد ءَ وابجاھے چار اِت ءُ وسپگ ءِ وڑ ءَ بوت انت سوداگر سکیں ھوشار ءُ دانائیں مردے ات زانت ئِے اے مرد پہ مکسدے گوں من ھمراہ انت۔
دُزءَ وتی جامگ کشّ اِت ءُ چہ وت ءَ کمو دور ایر کُت سوداگر ءَ وتی کیسگ ءِ مُھرگ پہ چیرکانی بُرت ءُ دُز ءِ جامگ ءِ کیسگ ءَ ایر کُرت انت وتی جامگ کشّ اِت ئِے ءُ دگہ نیمگے ایر کُرت ءُ پہ دلجمی وپت پہ چیرُکانی چار اِت ئِے گوں دُز شپ ءِ وھد ءَ پاد اھت سوداگر ءِ جامگ پیشک پیشک کُرت داں اد ءَ وَ ھچ نیست دُز ھیران بوت اے مرد ءِ مھرگ کجا انت۔ دل یکیم بوت ءُ وپت-
سُھب ءَ ماھلہ سوداگر ءَ پہ چیرکانی شُت وتی مھرگ چہ دُز ءِ کیسگ ءَ کشّ اِت انت ءُ وتی کیسگ ءَ ئِے کُرت انت دُز وھدے چہ واب ءَ پاد اھت گشت ئِے ھما گران نھادیں مھرگ کُج انت کہ تو ھمود ءَ مارا پیش داشت انت مردم ءَ دست کیسگ ءَ بُرت ءُ مُھرگ در کُرت ءُ پیش داشت انت دُز ھیران ءُ پریشان بوت کہ اے کُجا بوتگ انت اے دگہ روچ ھنچو راہ ءَ سپر ءَ گوست شپ ءَ واب ءِ وھد ءَ سوداگر ءَ ھما وڑ وتی مھرگ دُز ءِ جامگ ءِ کیسگ ءَ دات ءُ پہ دلجمی وپت دُز شپ ءِ وھد ءَ پاد اھت ءُ مرد ءِ کیسگ پٹ ءُ پول کرت ھچ نہ دیست ئِے ۔
سُھب ءَ سوداگر ءَ وتی مھرگ کشّ اِت ءُ وتی کیسگ ءَ کرت انت۔۔ دُز ءَ کہ مھرگانی جُست کُرت پد ءَ کشّ اِت ءُ پیش ئِے
داشت انت دو شپ پہ ھنچو گوست سیمی سُھب ءَ دُز ءَ وت دپ ءُ زبان کُرت کہ من ءَ سے روچ بیت من ھمے مھرگانی دُمب ءَ آں تو شپ ءَ زاناں ایشاں کجا ایر کن ئے من تئی جامگ ءِ کیسگاں ھمک شپ پیشک پیشک کناں اد ءَ مھرگ نیست سُھب ءَ ترا جُست کناں تو دست ءَ کیسگ ءَ بر ئے مھرگاں کشّ ئے پیشدار ئے سوداگر ءَ گُشت تو دگرانی کیسگاں پٹ ئے وتی کیسگ ءَ ھچبر نہ چار ئے۔
ما ءُ شما ھمے کسہ ءِ وڑ ءَ ایں ھر وھد ءَ دگرانی ایبانی کشگ ءِ دُمب ءَ ایں وت ءَ را نہ چار ایں کہ ما وت چے کنگ ءَ ایں چتور ایں۔ مارا ھچبر اے سما بوتگ ما وت چینچو پولنگیں ما چینچو ایب دار ءُ گُناہ گار ایں بس ھر وھد ءَ پہ دگر ءِ گُشگ ءَ پہ دگر ءِ ملامت کنگ ءَ مارا چاڑے چیر انت-
بلے زانتکار ءُ دانشور ھر وھد ءَ وت ءَ را چار انت وتی کمیاں سرجم کن انت ھر وھد ءَ وتی ایبانی پاد ءِ چیر ءَ دیگ ءُ چیر ترینگ ءَ ھچبر تو ساپ ءُ پلگار نہ بئے۔۔ شرتر ھمیش انت چہ دگر ءِ ایبانی کشگ ءَ پیسر ما وتارا شر بہ کن ایں وتی جند ءِ گُناھکاری ءُ ھرابیاں بہ کشیں نَے وتی لنکُک ءَ پہ دگر ءَ ٹال بہ کنیں کہ پلانی چوش انت پلانی اد ءَ ھراب انت پلانی ءَ اے ایب مان انت۔
آیا ھمے ایب ترا مان نہ انت ھمے ھرابی ءِ راہ ءَ تو روگ ءَ نہ ئے کمو وتی نیمگ ءَچمشانکے بدے گوں باریں تو وت کجام شریں کار کُرتگ؟-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔