پنجگور ءُ مچھ ءَ دو بیگواھیں مردم یلہ بیتگ اَنت

دی بلوچستان پوسٹ

بلوچستان ءِ دمگ پنجگور ءِ جھنندیں اورنگزیب ء سراج یلہ بیتگ ءُ لوگ ءَ سر بیتگ –

سر بیتگیں ھالانی رد ءَ گوستگیں سال ءِ دو جون ءَ چہ کراچی ءَ بیگواہ بیتگیں اورنگزیب ء سراج اھمد جھمنند پنجگور یلہ بیتگ -ھمے رنگ ءَ گوستگیں سال ءِ نومبر ءَ بلوچستان ءِ دمگ چہ مچھ ءَ بیگواہ بیتگیں حیر مھمد مری ھم یلہ بیتگ ءُ وتی لوگ ءَ سر بیتگ –

وائس فار بلوچ مسنگ پرسنز ھَ بیگواھیں مردمانی یل بیگ وشی یے گُشتگ ءُ گوشتگ کہ سرکار دگہ بیگواھیں مردماں ھم یلہ بہ کنت –

زانگ بہ بیت دو روچ پیسر بلوچستان ءِ دمگ آواران ءِ ھند جاؤ ءَ چار مردم یلہ بیتگ ءُ وتی لوگاں سر بیتگ اَنت ءُ ھمے روچاں ندیم بلوچ ءِ یلہ بیگ ءِ ھال ھم دیم ءَ اتکگ اَت پد ءَ کھول ءَ آئی ءِ یلہ بیگ ءِ ھال دروگ کرتگ اَت ءُ گُشتگ اَت کہ ندیم انگت ءَ بیگواہ اِنت –

زانگ بہ بیت اپریل دوھزار ءُ نوزدہ ءَ بلوچستان ءِ دمگ جاؤ ءَ پوج ءَ ندیم دگہ مردمانی ھمراھی ءَ دزگیر کرتگ ءُ ناشناسیں جاھے ءَ برتگ اَت –

چہ بلوچستان ءَ پوج ءِ دست ءَ آوار جنگ ءُ ناشناسیں جاھانی برگانی ھال ھروھد ءَ رسانکدراں شنگ بنت – بلوچ ہیومین رائٹس کونسل ءِ رپورٹ ءِ رد ءَ گوستگیں سال ءِ گُڈی ماہ ءَ چہ بلوچستان ءَ چِل ءُ نُھ مردم زورانسری ءِ آماچ بیتگ اَنت –

بی ایچ آر سی ءِ رد ءَ چِل ءُ نُھیں مردمانی تہ ءَ بیست ءُ یک مردم یلہ بیتگ اَنت ءُ سَے کسانی جون دزکپتگ اَنت –