مچھ ءَ دَہ ھزار کاریزکاراں وتی کار یلہ کرتگ

اشکرانی کھنانی سر ءَ پھزداری ءِ نیست مرگ ءِ ترس اِنت ھمک روچ مرگ مئے دیم ءَ ترگ ءَ اِنت – کاریزکار

دی بلوچستان پوسٹ

سر بیتگیں ھالانی رد ءَ بلوچستان ءِ دمگ مچھ ءَ اشکرانی کھن ءَ کار کنوکیں کاریزکاراں وتی یلہ کرتگ ءُ لوگاں شتگ اَنت –

اشکرانی کھن ءِ واکدارانی گوشگ اِنت کاریزکارانی روگ ءَ پد اشکرانی کھن بند بیتگ اَنت ءُ چریشی ءَ اشکرانی درایگ ءَ کمی اتکگ –

پوریاگرانی گوشگ اِنت کہ آ اشکرانی کھن ءَ مرگ ءِ ترس ءِ آماچ اَنت چریشی ءَ ما اے جاہ ءَ کار کنگ نہ لوٹ اِنت ءُ اشکرانی کھن ءَ پھزداری نیست اد ءَ واب ءَ وپتگیں مردم کُشگ بوگ ءَ اَنت ءُ سرکار ءِ گوشاں مورے ھم نہ وارت اِنت –

پاکستان سینٹرل مائنز پوریاگرانی گل ءِ سروک لالا مھمد سلطان ءَ رسانکدراں گوں گوشتگ کک شال ءُ کچی، بولان ءِ دمگ آب گم، مارگٹ ءُ مارواڑ ءَ دَہ ھزار کاریزکاراں وتی کار یلہ کرتگ ءُ شتگ اَنت –

آئی ءَ گوشت کہ ڈیگاری سورینچ، پیر اسمائیل زیارت ءُ دگہ دمگاں اشکرانی چاتاں کار کنوکیں کاریزکاراں ھم وتی کار یلہ کرتگ ءُ شتگ اَنت –

آئی ءَ گوشت کہ شتگیں کاریزکارانی تہ ءَ گیشتریں کاریزکار ھیبرپکتونواہ ءِ دمگ مالاکنڈ ڈویژن ڈیر،سوات ءُ شانگلہ ءُ اوگستان ءِ نندوک بیتگ اَنت –

آئی ءَ گوشت کہ کاریزکارانی روگ ءَ پد چار سد ءُ پنجاہ کھن بند بیتگ ءُ شتگیں کاریزکارانی تہ ءَ ھزارہ برادری ءَ بندوکیں مردم ھم ھوار اَنت-

دومی نیمگ ءَ اسسٹنٹ کمشنر مچھ ءَ وتی ٹاھے ءِ تہ ءَ گوشتگ کہ مچھ ءِ وئیل ءَ پد اشکرانی کھناں کار کنوکیں مردمانی پھزداری ءِ واستا گیشیں لشکری بنجل جوڑ کنگ بیتگ اَنت ءُ اشی ءَ ابید دمگ ءَ شپ ءُ روچ پھزداری بیگ ءَ اِنت –

دومی بلوچستان ءَ بندوکیں سیاسی مردمانی ءُ اجوئی لوٹوکیں سلاہ بندیں مردمانی گوشگ اِنت بولان ءِ کَش ءُ گوراں پاکستانی پوج مچھ ءِ وئیل ءِ پژدر ءَ لس مردمانی سر ءَ لشکر کشی کنگ اِنت ءُ لس دست ءَ گوشیں مردماں نشانگ کنگ ءَ اِنت –

زانگ بہ بیت ھمے ماہ ءِ بنداتی سَے جنوری ءِ شپ ءَ مچھ ءَ اشکرانی کھن ءَ ناشناسیں مردمانی دست ءَ دَہ کاریزکار کُشگ بیتگ اِت اَنت کہ آیانی سیادی ھزارہ برادری ءَ اَت ءُ چریشی ءَ پد اُرش ءِ زمہ واری جھانی ناشرکاریں گل داعش ءَ منّ اِتگ اَت –

مچھ ءِ وئیل ءَ پد کُشتگیں مردمانج کھولاں دھیں جون زرتگ ءُ شال ءَ داں بازیں روچاں نندانک جتگ ءُ وتی مُزانی واستا زھرشانی کرتگ –

زھرشانی ءَ نندانکیں مردمانی لوٹ بیتگ اَت کہ پاکستانی سروزیر عمران ھان بئیت ءُ مارا دوچار بہ کپ ایت ءُ داں ھما وھد ءَ ما وتی زھرشانی ھلاس کن ایں بلے بازیں روچانی زھرشانیاں پد کھولانی گون ءَ سدکی بیتگ اَت ءُ آیاں جون کَل کتگ اِت اَنت –