شاھرگ ءَ پوج ءِ گاڑی سر ءَ اُرش، اُرش ءِ زمّہ واری بی ایل اے ءَ منّ اِتگ

شاھرگ ءَ پاکستانی پوجی گاڑی ءِ تراک ناکیں شوروانی نشانگ کُتگ، تراک ءِ آسر ءَ یک پوجی ءِ مرتگ بازیں کارمندے ٹپی بوتگ اَنت – جئیند بلوچ

دی بلوچستان پوسٹ

سربوتگیں ھالانی رِد ءَ مروچی آدینگ ءِ روچ ءَ ناشناسیں مردماں ھرنائی ءِ دمگ شاھرگ ءَ پاکستانی پوج ءِ راہ ءِ سر ءَ تراک ناکیں شورو کل کتگ اَنت، پاکستانی پوج ءِ کاروان ءِ یک گاڑی ءِ تراک ناکیں شوروانی نشانگ کتگ، تراک ءِ آسر ءَ پاکستانی پوج ءَ جانی ءُ مالی تاوان رس اِتگ –

دومی نیمگ ءَ بلوچ آجوئی ءِ لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمۂ واری منّ اِتگ ءُ گوشتگ کہ مئے سرمچاراں مروچی ھرنائی دمگ شاھرگ ءَ پاکستانی پوج ءِ یک گاڑی ءِ تراک ناکیں شوروانی نشانگ کتگ –

جارکش ءَ گوشتگ تراک ءِ آسر ءَ دژمن پوج ءِ یک کارمندے مُرتگ ءُ وھدیکہ بازیں کارمندے ٹپی بوتگ اَنت –

جارکش جئیند بلوچ ءَ گوشتگ کہ بی ایل اے ءِ سرمچاراں دژمن ءِ گاڑی ھما وھد ءَ تراک ناکیں شوروانی نشانگ جوڑ کرتگ کہ آ کاروان ءِ دروشم ءَ رؤگ ءَ بوتگ انت – اے اُرش ءَ دژمنیں پوج ءِ یک ٹرکے ھم تباہ بوتگ –

جارکش ءَ گوشتگ کہ مئے اے اُرشانی مول ءُ مراد بلوچستان ءِ آجوئی ءُ زورگپتیں پوج ءَ چہ وتی سرڈگار ءَ درکنگ وتی منزل ءَ داں سربوگ ءَ بی ایل اے ءِ اُرش ھمے وڑ ترندی ءِ گون ءَ برجاہ مان انت –