بلوچستان: یک مردمے بیگواہ، یکے یلہ کنگ بیتگ

کیچ گورکوپ ءَ پاکستانی پوج ءِ لشکر کشی برجاہ، شوانگے دزگیر کنگ بیتگ ءُ بازیں لوگ سوچگ بیتگ اَنت –

دی بلوچستان پوسٹ

سر بیتگیں ھالانی رد ءَ کیچ ءِ دمگ گورکوپ ءَ پاکستانی پوج ءِ لشکر کشی برجاہ اِنت، لشکر کشی ءِ وھد ءَ بازیں لوگے ماندارگ بیتگ اَنت ءُ بازیں مردمانی دزگیریانی ھال اِنت –

گیشیں ھالانی رد ءَ گورکوپ ءَ پوجی لشکر کشی ترند کنگ بیتگ ءُ لشکر کشی ءِ وھد ءَ بازیں لوگ ماندارگ بیتگ اَنت ءُ کوھی دمگ ءَ جمعہ ء ابراھیم نامیں شوانگے دزگیر کنگ بیتگ –

زانگ بہ بیت کیچ ءِ دمگ گورکوپ ءِ بازیں جاھاں گوستگیں روچاں چہ برجاھیں پوجی لشکر کشی ءِ وھد ءَ سالاچ ءَ نیک سال ء صالح مھمد نامیں مردمے ءِ لوگاں ھوار بازیں مردمانی لوگ ماندارگ بیتگ اَنت –

کروچی ڈاٹ ءُ بکسر زیارت ءَ نوکیں چیک پوسٹ جوڑ کنگ ھمے رنگ ءَ ریسو ءَ داں گوادر ءَ کوھی دمگاں پانگس جوڑ کنگ بیتگ اَنت ھمے رنگ ءَ ترینگل ڈاٹ ءَ ھم پوجی گاڑی گشت کنگ ءَ گندگ بیتگ اَنت –

ھمے وڑ ءَ ھب چوکی ءَ بیگواھیں بیتگیں مردمے یلہ کنگ بیتگ –

گیشیں ھالانی رد ءَ بیست جنوری دوھزار ءُ ھژدہ ءَ بلوچستان ءِ باپاری شھر ھب ءَ بلوچ کالونی ءَ چیریں ادارھانی دست ءَ آوار جنگ بیتگیں ناصر حسین جھمنند جاؤ مروچی یلہ کنگ بیتگ-

ناصر حسین ءِ یلہ بیگ ءِ ھال بلوچستان ءَ گار ءُ بیگواھیں مردمانی واستا جھد کنوکیں گل وائس فار بلوچ مسنگ پرسنز ءَ راست کرتگ –