روکپتی بلوچستان ءَ یک مردمے بیگواہ

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سرباز ءَ ایرانی ھمپنتیں لشکر ءَ یک مردمے آوار جتگ ءُ برتگ-

آوار جنگ بیتگیں مردم ءِ پجار عبدالرؤف بارانی ء دوست مھمد جھنند نور آباد سرباز ءِ نام ءَ زانگ بیتگ –

اھوالکار ءِ رد ءَ عبدالرؤف دو ھپتگ ءَ پیسر سیاسی دزمانجنی ءِ بھتام ءَ ایرانی “ارگانھای امنیتی ” لشکر ءَ دزگیر کرتگ ءُ برتگ –

اھوالکار ءِ رد ءَ عبدالرؤف دزاپ ءِ زنداناں برگ ءُ بندیگ کنگ بیتگ کہ اود ءَ آیاں سیاسی ھواری ءِ دزمانجنی ءَ بھتام جنگ بیتگ کہ آ ڈیھ ءِ بگیری ءَ سیاسی گلاں گوں ھوار بیتگ –

دمگی مردمانی رد ءَ عبدالرؤف تیل ءِ باپاری مردمے بیتگ کہ آئی ءَ تیل ءِ باپاری کرتگ ءُ آئی ءَ سیاسی مردماں گوں ھچ سیادی نہ بیتگ-

دمگی مردماں گوشت کہ ایران ءِ چیریں ادارہ روکپتی بلوچستان ءَ بازیں مردماں ھمے رنگ ءَ دزگیر کن اَنت ءُ آیاں ڈیھ ءِ بگیری ءَ سیاسی دزمانجنی ءِ بھتاماں جن اَنت ءُ آیاں سالانی سال بندیگ کن اَنت –

دمگی مردماں گوشت کہ تنی وھدی بازیں بلوچے ھمے رنگ ءَ گرگ ءُ گار کنگ ءُ پد ءَ گڈسر ءَ آیاں پاھو ءِ دار ءَ درنجگ ءُ کُشگ ءَ اَنت –

دمگی مردماں جھانی انسانی ھکانی گلاں لوٹ کرتگ ءُ گوشتگ کہ آ روکپتی بلوچستان ءَ ناوشیں جیڑھانی سر ءَ وتی نگاھاں ایر بہ کن اَنت ءُ ایران ءِ چیریں ادارہ ءُ واکداراں اے جُست ءَ الم بہ کن اَنت –