نبشتانک: بانکیں گْوھار شھید ثمینہ بی بی
نبشتہ کار: گزین بلوچ
دی بلوچستان پوسٹ
بانک تو راج ءِ ھما گْوھار بوتگ ئے کہ تئی مھرانی درّور دگہ ھچ جاھا من نہ دیستگ تئی زانت ءُ زانگ و تئی پگر چو درور ءِ البُرزیں کوہ ءِ پیم ءَ اَت مرگ پہ ھمُک زندا الّمی اِنت-
بلے تئی مرگ ءَ ترا مُدام راجدپتر ءِ تہءَ زندگ کُت تو ابد مان بوت ئے تو نمیران بوت ئے کُلیں جھان سرپد اِنت کہ بلوچ راج ءِ ڈیھ بلوچستان ءِ سر ءَ پاکستان ءُ آئی ءِ زور گیریں پوج ءَ بلوچ سرڈگار ءِ سر ءَ وتی قبضہ 27 مارچ 1948 ءَ برجاہ کُتگ ءُ بلوچ ھماروچ ءَ بگر داں روچ ءِ مرچیگ وتی وت واجھی (آزادی) ءِ واست ءَ کُشگ ءُ آوار جَنگ بوگ ءَ اَنت بے گِس بے بُندر کنگ بوگ ءَ اَنت ھمُک ھنداں پاکستان ءِ رستریں پوج بلوچ راج ءِ ورنا ءُ کماش ماتءُ گُھاراں تِپل ءُ شیر مِچاں جنتر ءَ کناں ءُ دروشاں اِنت بلے بلوچ پہ وتئی حقّ ءِ پچ گِرگ ءِ ھاتِر ءَ پد نہ کِنزیت وتئی سراں پہ مڑاھے ندر کنان اِنت-
ھمے سر ندر کنوکاں چہ یکے بانُکیں گْوھار ثمینہ تو بُوتگ ئے بانُک تئی ھون مئے راھبریءَ کنت من دِل ءَ اے کدی نہ جیڑ اِتگ کہ تو چمن دور ئے من بلکیں ھمے جیڑ اتگ تو مُدام منی کِر ءَ نشتگ ئے چیاکہ تئی شھادت ءَ من ءَ ھمنچو مُھکم کُتگ کہ من مُدام گیر کاراں بانُک ترا منی چمّ پہ شانے بُرزباں چیاکہ تو من ءَ انچیں تاجے سر ءَ داتگ ۔
من اے تاج ءِ لایق نہ ھتاں تو یک جنیں زھگے اَت ئے بلے تئی کِرد منی وڑیں سد مردین ءِ کارے نہ اَت من نوں سرپد بوتاں کہ تئی لوٹ ءُ تما گُلیں راج بوتگ تئی وشی ءُ شاد مانی آجوی بوتگ ۔
تو واکی وتی ھقّ اد ءَ کُت پہ گُلزمین ءَ بانُک من ءَ آ وھد شر یاد اِنت کہ تئی لوگ ءَ رستریں پوج ءَ اُرش کُت تئی 3 برات ءِ شھید کُت یکے ءِ نام اَت شھید عبدلستار پنام ءِ ملک جان دومی برات ءِ نام اَت شھید سبزل جان پنام ءِ سبزو سیمی شھید داد جان پنام ءِ لونگ تئی چمانی دیم ءَ پوج شھید کُت اَنت ۔
بلے من ھمے ھِشکُت کہ جنگ ءِ پِڑا تئی تنگھیں براتانی تیر ھلاس بوتگاں گوں دُژمن ءَ جنگ دیگ ءِ تہ ءَ ایتاں کہ کمو تیر تئی لوگ ءَ ایرت پیسر ءَ تو پہ میدان شُت ئے ھما تیران ءَ وتی براتاناں ءَ دات ترا پاکستان ءِ پوج ءَ توار پِرجت کہ مرو تیراں مہ بر ماں نیں ترا جن آں بلے تو اے تُرس ءُ بیم پوج ءِ وتی دل ءَ نہ یارت ءُ دیم پہ وتی بِراتاں شُتئے ھمے تیراں ءَ دات گُڑا دُژمن ءِ اولی تیرانی آماچ تئی جِند بوت رندا تئی سَیں برات ءِ یک جاہ ءَ شھید کُت اَنت بانکُ تئی ھِمت ءُ ھوسلہ ءَ ءُ شھادت ءَ سُہرچکیں دروت دے آں ۔
بانُک تو دُژمن ءَ را ء پروش دات آئی ءِ کاسگ چٹ ایں دلاراناں پیش داشت کہ بلوچ ءِ وفاداری چے اے گوں وتی گُلزمین ءَ بانُک دُژمن ءِ دل ءَ تو سکّ ایں زنڈیں تُرس ءِ دات کہ آ بلوچستان ءِ کُجام ھند ءُ دمگاں برواں اُرش بہ کناں تئی بیم پیسرا گیر کیت دگہ انچیں ثمینہ ءِ مہ بیت من ءَ پہ تچگ مجبور مہ کنت ءُ دگہ باز اِنت بانُک تئی وڑیں گوھار براتاں نہ کہ چو تئی وڑ ءَ گوں دژمن ءَ جنگ بِہ دے آں تئی پِگر زندگ اِنت داں قیامت مُدام دل ءَ جیڑاں کہ بانک تو مئے وڑیں نزوریں دلاں چونیں بے بھائیں جزبگے دات بانُک تئی امیتانی درچکاں بر کُتگ بانک تئی ھونانی مٹ ءُ بدل مئے باندات ءِ آزاتی اِنت دُژمن ھمے ماریت کہ من گوں بلوچ راج ءَ وتئی ظُلم ءُ زوراکیانی آماچ کنیں بلے من گِنداں بانک تئی وڑیں دگہ ھزاراں مات ءُ گْوھار ورنا ءُ کماش زھگ وتی پاداں مِکّ داتگاں دُژمن ءِ تیرانی دیمپان بوھگ ءِ ھاترا چَکّ ءُ پد نہاں اوشتاتگاں چو تئی وڑ ءَ نوں شمئے ھوسلہ بلوچ راجی آجوئی ءِ جُنز ءَ مزید مھکم ءُ دیم ءَ بران اِنت ۔
یاد بہ بیت بانُک شھید ثمینہ بی بی بلوچستان ءِ دمگ ضلع ءِ آواران تحصیل مشکے سُنیڑی ءَ واجہ مرحوم محمود بلوچءِ لوگ ءَ ودی بوتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔