وھد ھمیش اِنت بلوچ ءُ سندھی پاکستان ءِ زورگری ءِ ھلاپ ءَ ھمسنت بہ بنت – براس
دی بلوچستان پوسٹ
بلوچانی چار ھمسنتیں گلانی گل راجی آجوئی سنگر (براس) ءِ جارکش بلوچ خان ءَ سندھی راجدوستیں سروک سائیں جی ایم سید ءِ سالروچ ءِ درگت ءَ وتی یک شنگ کرتگیں درشانے ءِ تہ ءَ گْوشتگ کہ بلوچ ءُ سندھی گْوستانکی براس ایں راج اَنت۔چہ ھزاراں سالاں مئے سکی ءُ سوری، وشی، دوست ءُ دُژمن یک اَنت مرچی ھم سندودیش ءَ کروڑانی کچ ءَ بلوچ آباد اَنت ءُ آ سرڈگار ءُ دودانی پُرایمنیں بھر جوڑ بیتگ اَنت بلے گْوستانکی بندریں دودانی وارس سندو ءُ مھرگڑ دودانی وارس بلوچاں مرچی ھواری ءَ شیتان ءُ بےبُنیادیں پاکستان ءِ زورگری ءِ دیمپان اَنت وھد ھمیش اِنت کہ بلوچ ءُ سندھی راج پاکستانی زورگری ءِ ھلاپ ءَ یکمُشت بہ بنت ءُ زورگریں پنجابی ءَ چہ وتی سرڈگار ءَ بہ گَلین اَنت ءُ وتی گْوستانک ءِ ارزیشت ءَ بہ پھریز اَنت-
بلوچ خان ءَ گْوشتگ کہ سائیں جی ایم سید ءِ لیکہ ءُ برجاھیں جُھد نا ایوک ءَ پہ سندھی راج ءَ بلکیں بلوچ ءَ ھوار پہ اے دمگ ءِ دُرسیں ایردستیں راجاں یک تچکیں کشکے زورگِر ءِ ھلاپ ءَ جی ایم سید ءِ لیکہ ءُ شون داتگیں کشک برجاھیں جُھد ءُ سلاہ بندیں گِھگیری اِنت سائیں ءَ وتی زندگی ءِ ھیلکاریانی تہ ءَ دیستگ اَنت کہ پنجاب ءِ وڑیں بےدودمانیں دُژمن تچکیں گپ ءَ سرپد نہ بیت،پوڑ ءِ پسو گوں سنگ ءَ دیگ ءِ پسو ءَ سرپد کنگ بیت مرچی بلوچ ءُ سندھی کہ اے دُژمن ءِ دیمپان اَنت،بدل نہ بیتگ بلکیں گْوست ءِ ھساب ءَ گیش رسترجوڑ بیتگ ما سائیں جی ایم سید ءِ سالروچ ءِ درگت ءَ سندھی راج ءَ اے کلوہ ءَ دیگ لوٹ ایں کہ آ سائیں ءِ سلاہ بندیں گھگیری ءِ لیکہ ءِ رندگیر بہ بنت ءُ پہ سندو دیش ءِ آجوئی ءَ پاد بیا اَنت وتی سندھی آجوئی ءِ دوستیں سلاہ بندیں گلاں مُھکم بہ کن اَنت داں بلوچ ءُ سندھی یکجاہ بہ بنت ءُ وتی سرڈگارانی آجوئی ءَ ھواری ءَ جنگ بہ کن اَنت۔
براس ءِ جارکش ءَ گْوشتگ کہ بیست ءُ شش جولائی دوھزار بیست ءَ چار بلوچ آجوئی دوستیں گلاں بی ایل اے، بی ایل ایپ، بی آر اے، بی آر جی ءِ ھم سنت براس ءُ سندھی آجوئی دوستیں سلاہ بندیں گل سندودیش روولیوشنری آرمی ءِ میان ءَ یک گْوستانکی یکجاھی پڑے برجم دارگ ءِ جارجنگ بیتگ اَت اے بلوچ ءُ سندھی گھگیری گْوستانک ءِ یک راستی ءِ ارزیشت ئِےدار ایت اے ھواریں پڑ ءَ گیش مُھکم کنگ ءُ ھربلوچ ءُ سندھی ءِ لوگ لوگ ءَ سرکنگی اِنت داں دُژمن ءِ ھلاپ ءَ ھمک لوگ آجوئی ءِ سنگر جوڑ بہ بیت۔
بلوچ خان ءَ گْوشتگ کہ بلوچ ءُ سندھی راج ءَ نہ ایوک ءَ تچکی ءَ زورگری ءِ دیمپان اَنت بلکیں اے زورگری ءَ ودی بیتگیں بازیں ھواریں جیڑوانی ھم دیمپان اَنت ایشانی ھلاپ ءَ یکجاھی کارشونے ءِ رد ءَ ھواری ءَ جُھد کنگ اژدری اِنت پاکستان ءُ چین یک ھواریں پندلی ءِ بنیاد ءَ زورگری شوربندی سی پیک ءِ رد ءَ سند ءُ بلوچستان ءَ سرجم ءَ زورگیپتی ءَ دارگ ءُ اے دمگ ءِ تہ ءَ وتی وتسریں سیاسی،مالی ءُ جنگی سیتاں آسرکنگ لوٹ اَنت ءُ گوادر ءَ بگر داں تیاب ءُ تیاب دپ ءَ پہ مدامی زورگِر بیگ لوٹ اَنت نیکراھی ناشرکاری ءَ مئےسرڈگار ءِ سر ءَ پاد کنگ لوٹ اَنت داں مئے آجو داب ءُ رُژنا پگریں ارزیشت ءُ دودمان ءَ شنگ ءُ شانگ ءُ ناشرکاری ءِ توم ءَ مئے تہ ءَ رودینگ ءِ پندل سازگ بیگ ءَ اِنت بلوچ ءُ سندھی راجاں وتی سرڈگارانی سر ءَ درامد جوڑ کنگ ءَ دُژمن آبادکاری زورگری ءِ پندل ھم ترندی ءَ چکاسگ بیگ ءَ اَنت مئےزروانانی سر ءَ تچکی ءَ زورگِری کنگ بیگ ءَ اِنت۔
گڈسر ءَ براس ءِ جارکش بلوچ خان ءَ گْوشتگ کہ بلوچ ءُ سندھی چہ ھزاراں سالاں وتی سرڈگاراں آباد بیتگ اَنت ءُ مدامی گوں بازیں اُرشکار ءُ زورگراں دیم پہ دیم بیتگ اَنت ھمے وڑ ءَ گْوستانک ءَ ما مدام ھمک اُرشکار چہ وتی سرڈگار ءَ کش اِتگ ءُ وتی سرڈگار ءُ دودمان ءِ پھریزگ ءَ سوبمند بیتگیں اے زورگِر ءِ آسر ھم انچُش بیت وھد ھمیش اِنت کہ اے دری اُرشکار ءُ لُٹ ءُ پُلپھانچیں زورگر ءِ روچانی کم کنگ ءَ سندھی ءُ بلوچ راج یکمشت بہ بیت ءُ وت ءَ مھُکم بہ کنت ءُ دُژمن ءَ بےسوب بہ کن اَنت۔