آواران ءَ پوج ءِ سر ءَ اُرش، زمّہ واری بی ایل ایف ءَ منّ اتگ

بزداد کُلی ءَ پاکستانی پوج ءِ پانگس ءِ یک پوجی کارمندے دور جنگیں توپک ءِ نشانگ کرتگ – میجر گْوھرام بلوچ

دی بلوچستان پوسٹ

سربوتگیں ھالانی رِد ءَ مروچی چار شمبے ءَ ناشُناسیں سلاہ بندیں مردماں آوارن ءِ دمگ بزداد کُلی ءَ پاکستانی پوج ءِ پانگس ءِ سر ءَ اُرش کُتگ –
اُرش ءَ پاکستانی پوج ءَ جانی تاوانانی ھال بیتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اُرش ءِ زمّہ واری منّ اِتگ ءُ گوشتگ کہ مئے سرمچاراں ھبدہ جنوری ءِ بیگاہ ءَ آواران ءِ دمگ بزداد کُلی ءَ برجاھیں پاکستانی پوج ءِ پانگس ءِ سر ءَ یک پوجی کارمندے دور جنگیں توپک ءِ نشانگ جوڑ کرتگ ءُ کُشتگ –

جارکش گْوھرام بلوچ ءَ گوشتگ کہ زورگپتیں بلوچستان ءِ آجوئی ءَ تاں زور گیریں پوجے سر ءَ مئے اُرش برجاہ مان اَنت –