بلوچستان: پنجگور ءُ قلعہ عبداللہ ءَ سُھرُک ءِ نادراھی ءَ چار چُک بیران

دی بلوچستان پوسٹ

سربیتگیں ھالانی رِد ءَ پنجگور گچک ءَ سُھرُک ءِ نادراھی تالان بوتگ – چریشی ءِ سوب ءَ عدیل ء رمضان بیران بوتگ ءُ سَے دگہ زھگ فراز ء محمد یار، قندیل ءُ سبزل نادراھی آماچ انت کہ آھانی اُرمر سَے ءُ چار سال گوشگ بوگ ءَ اَنت –

دمگی مردمانی گوشگ انت کہ گوستگیں سال ءَ ٹُکہ نہ جنگ ءَ آھاں چہ محکمہ جانداراھی پنجگور ھال داتگ کہ کسانیں زھگاں ٹکہ ءَ جنگ بہ بیت –

دمگی مردمانی گوشگ انت کہ محکمہ جاندراھی ءَ پُڑیانی ورگ ءِ سوب ءَ دوریں دمگاں پھازگی گامگیج زورگ نہ بوتگ پمے ھاتر ءَ نِی گچک ءَ پولیو کیس ھم دیم ءَ آیگ ءَ انت کہ سک باز پدردی اَنت-

ھمے وڑ بلوچستان ءِ دمگ قلعہ عبداللہ توبہ اچکزئی ءَ ھم بازیں دمگاں سُھرُک ءِ نادراھی تالان بوتگ – چریشی ءِ سوب ءَ یکیں کھولے سلے زھگ بیران بوتگ اَنت –

اے درگت ءَ ڈی ایچ او چمن رفیق مینگل ءَ سُھرک ءِ نادراھی ءِ سوب ءَ سَیں زھگانی بیرانی راست کُتگ ءُ گوشتگ کہ اے دمگاں ھاسیں ٹیم دیم دیگ بہ بنت –

دمگی مردمانی گوشگ انت کہ نادراھی چہ افغانستان ءَ چمن ءَ اتکگ ءُ تالان بوتگ ءُ اد ءَ ھم ھر سال سھرُک ءِ نادارھی تالان بوتگ بلے انگت ایشی ءَ چہ رکگے ھاتر ءَ ھچ وڑیں گامگیج زورگ نہ بوتگ اَنت –

زانگ بہ بیت سُھرُک ھنچیں نادراھی ءِ کہ یکے چہ دومی ءَ گران کنے کہ ھمے زوتاں سجمیں دمگ ءَ تالان بیت کت کنت – سُھرُک ءِ نادراھی ءِ درگت ءَ محکمہ جاندراھی ءَ اے نادراھی بگیری ءَ مھم چلائینگ ءِ پیسلہ کتگ بیتگ – ھر ھما زھگ کہ آھانی اُمر نو ماہ ءَ بگر تاں پنچ سال انت ء آھاں سُھرُک ءِ نادراھی چہ رکگے ھاتر ءَ سرکارے نیمگ ءَ ٹُکہ جنگ بیت اِنت –