پاکستانی آزار جاھاں چار مردم یل بوتگ اَنت

دی بلوچستان پوسٹ

سربوتگیں ھالانی رِد ءَ آواران ءِ دمگ جاؤ ءَ پاکستانی پوج ءِ دست ءَ بیست ءُ یک اپریل دوھزار ءُ نوزدہ ءَ آوار جنگ ءُ بیگواہ بوتگیں سدیر ءُ نادل ء خیرمحمد، زبیر احمد ء محمد ہاشم ءُ ھپت اکتوبر دوھزار ءُ نوزدہ ءَ آوار جنگ بوتگیں ندیم ء درویش چہ پاکستانی آزار جاھاں یل کنگ بوتگ ءُ گِساں سربوتگ انت –

بیگواھیں بلوچانی یل کنائینگ ءِ ھاترءَ جھد کنوکیں گل وی بی ایم پی ءَ ھم چہ وتی ٹوئیٹر اکاونٹ ءَ شنگ کُتگیں گونڈیں درشانانی ءِ تہ ءَ یل کنگ بیتگیں مردمانی درآیگ ءِ ھال راست کتگ –

بلوچ سیاسی ءُ انسانی ھقانی گلانی ردءَ بلوچستان ءِ جتا جتائیں جاھاں پاکستانی پوج ءِ دست ءَ آوار جنگ ءُ بیگواہ بوتگیں مردمانی کچ ھزارانی ھساب ءَ انت، آھانی تہءَ کسانیں کساسے ءَ مردم یل کنگ بوتگ اَنت وھدیکہ دومی نیمگ ءَ آوار جنی ءُ بیگواہ کنگ یکشل ءَ برجاہ انت –

بیگواھیں مردمانی یل کنائینگ ءِ ھاتر ءَ شال ءُ کراچی ءَ وائس فار بلوچ مسنگ پرسنز ءِ زھرشانی ھم چہ یک دھک ءَ گیشتر وھد ءَ برجاہ انت – وی بی ایم پی زھرشانی ءَ مروچی چار ھزار ءُ یک سد ءُ نود ءُ پنچ روچ سرجم بوتگ –

وی بی ایم پی ءَ وتی چاگردی رسانکدر ءِ تندجاہ ءَ شنگ کُتگیں درشان ءِ تہ ءَ گوشتگ کہ گار ءُ بیگواہ بوتگیں مردمانی یل بوگ ءَ آھانی کھول ءُ گِساں شادھانی بیت – گل ءَ لوٹ کتگ کہ بیگواھیں مردمانی یل بوگ برجاہ بہ بیت –

وائس فار بلوچ مسنگ پرسنز ءِ رھشون نصراللہ بلوچ ءَ گوشتگ کہ بیگواھیں مردمانی یل بوگ وشیں ھبرے – آئی ءَ گوشتگ کہ بیگواھیں مردمانی یل بوگ جوانیں گامگیجیں لیکیں ءُ اشی ءَ ما پرارزشتیں گامیں سرپد بئیں –

آئی ءَ گوشتگ کہ ما اُمیت داریں کہ سرکار بیگواھیں مردمانی یل کنگ ءَ ھوار زورانسری آوارجنی ءِ جیڑہ ءَ ملکی کانودانی رِد ءَ گیش ءُ گیوار کنگ ءَ ھم وتی کِرد ءَ پیلو کنت –