یک راستی ءِ یک کسھے – برزکوھی – مھروز بلوچ

نبشتانک: یک راستی ءِ یک کسھے

نبشتہ کار: برزکوھی

رجکانکار: مھروز بلوچ

دی بلوچستان پوسٹ

پنچ روچ ءَ داں روچ ءِ ایر رؤگ ءَ گوں چل ءُ پنچ مردمانی ٹولی ءَ بید چہ رژنائی ءَ تُرسناکیں راھاں پند جنان اِت اَنت – روچے بام ٹک دیگ ءَ آھاں مھکمیں جاھے پٹ ایت ءُ ٹپ اِتاں – روچ ءِ درآیگ ءَ بالی گراباں آھانی سر ءَ ٹر ٹر کنگ بندات کُرت چشیں ساھتاں وپت ءُ واب ءِ بس نام ات، چم اش روچ ءَ سک اِت انت کہ کدی روچ وت ءَ را مزنیں کوھے پُشت ءَ چیر دنت – شُد ءُ تُن ءَ دمبرتگیں اے پند جنوکیں ٹولی گوں سبر اوپار ءَ وھدے پنچ روچ ءَ پد وتی منزل ءَ سر بوت انت گڑا ھپت ماہ ءَ پد اولی رند ءَ کماندار شے ھک ءَ بچکند ایت ءُ وتی سنگتاں گوشت ” سنگتاں ماں سوبین بوتیں، مئے یک سنگتے ھم ٹپی نہ بوتگ – ھما دمان ءَ آئی ءِ بچکند ملوری ءِ تہ ءَ بدل بوت ءُ آئی ءَ دیم گوں نائب کمان کُت درائینت ” سھب ءَ ماھلہ درسیں سنگتاں وتی وتی اوتاگاں دیم دیگ ءِ چن ءُ لانچ ءَ بکن، مناں نٹورک ءَ روگی ءُ ھال کنگی انت “
دور چار ءُ تمردیں شیھک یک وانندھیں بلوچ ورنایے
کہ آئی ءَ کسانیں وھد ءَ سیاست ءِ تک ءُ پھنات چار اتگ اِتاں ءُ بازیں سالاں پیش اے جاہ ءَ اتکگ ءُ سر بوتگ ات کہ وھدیکہ زلم ءُ زوراکی وتی سیمسراں سرگوز بہ کنت گڑا اے چاگردے تہ ءَ ھک ءِ لوٹگ بس تاکت ءَ چہ گرگ بیت – رستری بس رستری ءَ سرپد بیت زوراک ءَ بس زوراک ھلاس کرت کنت – پمیشکا آئی ءَ سلاہ بندیں جھد ءَ را گچین کرتگ ات نوں آئی ءَ سالاں پد چار سلاہ بندیں گلانی یکجاھیں براس ءِ یک ریجن کمانداری زمہ واری آئی ءِ کوپگان ات کہ دو سالاں چہ آ جوانیں وڑے ءَ وتی کرد ءَ پیلو کنگ ءَ ات –
شیھک گشاد گشاد ءَ نیٹورک ءِ نیمگ ءَ رؤگ ات آئی ءِ چماں گوستگیں روچانی گیمرتگیں ودار ءُ راستی ءِ رژن چہ دور ءَ گندگ بوگ ءَ ات – آئی ءِ دیم ءَ چہ زاھر ات کہ آ وتی اُمر ءَ گیش مزن بوگ ءَ ات، گسر کپتگیں سنگت، مکران آس گواروکیں روچ، بے وابیں شپ درستاں وتی سان ءَ ھمائی ءِ دیمے سر ءَ یل داتگ اتاں – آئی ءِ دستانی ترندی، پُرشتگیں ناکُن، دست دل ءِ لکیر آئی ءِ جفاکشیں زند چہ دور ءَ گندگ بوتاں –
آ ھما جاہ سر بیت ءُ سیٹلائٹ پون ءَ درکنت ءُ سگنل شوھاز ءَ لگیت ءُ یک نمبر ءِ جنت، آئی ءِ پون ھما دمان ءَ چست کنگ بیت، اے پون براس ءِ بنجاہ ءَ کنگ بیت – شیھک گپ ءَ گونڈ دار ایت گوش ایت کہ ” واجہ درستیں سنگت سلامت انت، ءُ آ آس پہ زور کنگ نہ بوتگ، مارا ھچ گمان نہ بوتگ کہ آس انچو دور ءَ تالان بیت –

(2)
ھما شپ ءَ کہ کماندار شے ھک ءِ سرکماشی ءَ چل ءُ پنچ مردمانی سلاہ بندیں ٹولی وتی مھپوزیں جاہ ءَ سر بیت ھما شپ ءَ پنچ روچ پیسر بزاں پانزدہ اکتوبر دوھزار ءُ بیست ءَ اے چل ءُ پنچ مردمانی ٹولی مکران کوسٹل ہائی وے ءِ نزیک ءَ بُزی کنڈگ ءَ سنگر جنوک نندوک بنت – اے ٹولی ءَ دو ھپتگ ءَ پند جتگ ءُ ھمود ءَ سر بوتگ اَت – آھانی رد ءَ آھانی ٹارگٹ سربوگے ھاتر ءَ بوت کنت یک روچے بہ لگ اِیت ءُ اے ودار بازیں روچ ءَ داں ھم بوت کنت ـ نوں آھانی ودار ءَ چار روچ سرجم بوتگ ات، درسانی کر ءَ آپ ءِ مزنیں درپ ھست ات ءُ ورگ ءِ واستا کماندار ءَ درساں آس سر ءَ گرستگیں ھشکیں گلہ ءُ تین ءِ سر ءِ پتکگیں تنی نگن دات ، آھانی ودار ھمنکس دیر بہ لگیت بلے آھان آپ ءُ نان کم ورگی ات ءُ ھمد ءَ نندگی ات دان ھما وھد ءَ واتر بوگی نہ ات داں وتی ٹارگٹ ءَ نہ گِر انت –

ودار ءِ چارمی سھب ءَ بانگواہ ءَ وھدیکہ آھانی یک ٹیم ءِ آپ ءِ آرگ ءَ در آیگ ات ءُ دومی سنگتاں وتی پوزیشن گپتگ ءُ نشتگ ات انت گڑا آھانی بالی گرابانی توار اشکُت کہ آزمان ءِ دیم ءَ بال ات انت گڑا درست ھژار بوت ٹپ اِت اَنت، بلے اشانی آیگ ءِ مول ءُ مراد بوت کنت ھمے بہ بیت دژمن سرپد بوتگ اگاں دژمنیں پوج ءَ اشانی ھال رس اتگ گڑا اے وڑیں پچیں جاہ ءَ چہ اوتاگ ءَ دور دژمن ءَ گوں دیم پہ دیم بوت کن انت؟ نوں گیشتر دژمن ءِ ودار کنگ شرتر انت یا مشن ءِ ماٹو کنگ ءُ واتر بوگ؟ بوت کنت دژمن وت ھنچو تر ءُ گرد بوتگ ءُ آ سرپد مہ بنت اگاں آ بس پہ تُرس ءِ سوب ءَ واتر بہ بنت گڑا چینچو مزنیں شوربندی نزیک ءَ بیا انت پد ءَ یل دیگ کپ اِیت- اگاں واکی دژمن کر ءَ دلاری کنگ بوتگ ءُ آ سر ءِ سر ءَ کیت ءُ آ اے پچیں جاہ ءَ گوں آئی ءَ دیم پہ دیم بنت گڑا آھاں چنچو سنگت ءِ تاوان بیت کنت؟
جنگانی تہ ءَ شوربندی سال ءُ ماھانی سر ءَ جوڑ بنت بلے جنگ ءِ پڑ یک ھنچین جاھے کہ اود ءَ تئی درسیں ماژگی منصوبہ یکیں دمان ءَ گوات ءَ گوں ھوار بنت – یک ملٹے ءِ تہ ءَ یک تیرے ءُ یک پیسلھے تئی سرجمیں جنگے نقشہ ءَ بدل کرت کنت – کہ کے سوبین بیت ءُ کے لاش در کیت ءُ نوں شیھک ءِ سرجمیں زند ھمے ساھت ءَ اتکگ ءُ سربوتگ ات کہ اود ءَ آئی ءَ وتی پیسلہ زورگی ات – انسان ھچے نہ انت بید وتی کُتگیں پیسلھاں – مروچی ما ھرچی انت ھر کجا انت، درسانی بن ھشت وتی کُتگیں پیسلہ انت شیھک ءَ ھم پیسلہ کنگی ات کہ آ کے انت؟

کماندار شے ھک دیم ءَ گوں سنگتاں کنت گوشیت ” سنگتاں! مروچی ما چہ جتا جتائیں جاھاں دراجیں پندے بُرتگ ءُ اتکگ انت، اے دراجیں پند ءَ ما بازیں اڑ ءَ جنجالانی اوپار کُتگ، اے سپر ءَ پیش مئے تہ ءَ ھر یکے وتی وڑ ءَ زند ءَ گوازینگ ءَ بوتگ، بلے شمارا درساں یک نزرئیہ ءُ یک پیسلھے ءَ اد ءَ آؤرتگ ءُ یکجاہ کرتگ – آ نزرئیہ بس ھمیش انت کہ ما ایردستی، زُلم ءُ زوراکی اوپار نہ کنیں ما پہ آجوئی ءُ یک وڑیں انسان بوگے ھاتر ءَ جد ءُ جھد کنیں اشی واست ءَ وتی جانانی کربان کنگ ءَ چک پد نہ بئیں – ما وتی زند ھما روچ ءَ کُربان کُرتگ ھما روچ ءَ ما وتی ایردستی نہ منّ اِتگ – ما ھما روچ ءَ ترس وتی تہ ءَ چہ کش اتگ ءُ وتا تُرس ءِ آماچ نہ کرتگ – ما ھما روچ ءَ گوں کربانی ءُ آجوئی ءَ سنگتی کُرتگ، ھما روچ ءَ کہ ما اے راہ گچین کرتگ – مروچی ما سوبین ءُ زندگ بئیں واتر ایں یا مئے ھون اے پاک ءُ پلگاریں ھاک ءَ گوں ھوار بیت ھر ھال ءَ اے مدامی یات کنگ بیت کہ لھتے آزاتیں انسان اد ءَ ایردستی ءِ بگیری ءَ جنگ ءَ اتکگ انت – مئے مروچیگیں روچ چہ دومی روچاں جتا نہ انت- ما اد ءَ ودار کنیں، اگان دژمن سر ءِ سر ءَ کئیت گڑا ما گڈی تیر ءَ داں جنگ کنیں ءُ آئی ءِ دیم ءَ داریں اشی ءِ واست ءَ ما تُری درست کُربان بہ بئیں ما بید چہ وتی ٹارگٹ گرگ ءَ واتر نہ بئیں ” درست شیھک ءِ گپاں گوں تپاک بنت ءُ ھمے وڑ وتی پوزیشن ءَ دار انت –

چیزے ادار ءَ پد یازدہ پنجاہ ءُ پنچ ءَ یک سنگتے گوانکو چہ ھال کنت، ٹارگٹ سربوگی انت ھمے وھد ءَ اے سرمچارانی ٹولی پوج ءِ کاروان ءِ سر ءَ اُرش کن اَنت – چار روچاں چہ بے واب ، شُد ءُ تنیگیں اے سرمچار چو بجلی ءَ دژمن سر ءَ اُرش کن انت پنچ ملٹ ءِ تہ ءَ آئی ءَ نیست ءُ نابود کن انت ءُ نیم ساھت ءَ داں یک بنجاھی شاھدگے ءَ بید ترس ءُ بیم ءَ وتی کنٹرول ءَ کن انت – پانزدہ پوجی کارمند کُش انت ءُ آھانی دُرسیں پوجی ساز ءُ سامانان وتی دمبرتگیں کوپگانی سر ءَ لڈ انت ءُ پد ءَ ھمے کوھانی تہ ءَ چہ گار بنت کہ ھزاراں سالاں ھمے کوہ اشاں پھازگ انت –

زوتان زوت واتر بوھان ءَ کماندار شے ھک ءِ یک سنگت دیم ءَ گوں ھمائی کنت گوشیت کہ ” واجہ اے بلاھیں کارے ات، دل وش بوت ” شے ھک دیم ءَ گوں ھمائی کنت بچکند ایت گوشیت کہ ” سنگت گندے مڈی بہ بوتیں ھمک روچ دژمن ءَ را پیش داشتگ ات کہ بلوچ چنچو بلاھیں کار کُرت کنت “
کمے وھد ءَ پد ٹی وی ءُ چاگردی رسانکدراں پوجیانی مرگ ھال شنگ بیت – پاکستانی میڈیا ءِ تجزیہ جنوک ھمے گپ ءِ جنگ ءَ شرو بنت کہ اُرشکاراں ڈنی تاکتانی کمک گون بوتگ کہ آھاں بازیں نوکتریں سلاہ مڈی ءِ گون بوتگ – لس مھلوک ءِ ھم سُک سُک بندات بنت کہ اے مردم اے وڑ جنگ کرت کناں گڑا ھمک روچ پرچا نہ جن انتے، آجوئی لوٹوکیں دانشور ھما دمان ءَ پیسبک ءَ وتی اسٹیٹس دنت کہ دگنیاوی جنگی رھبندانی رِد ءَ اے اُرش ءَ بازیں تاوانے- ھما وھد ءَ اے درسیں تجزیہ بوگ ءَ بنت ھنیپ بیھوش ءُ کپ اِیت- شے ھک ھما دمان ءَ آپ ءِ تہ ءَ کیلسی مان کنت ءُ آئی وارینیت – سنگت جُست کن انت کہ چی بیت؟ شے ھک گُوش اِیت ھچ بس شُد ءَ جتگ تُستگ –
(3)
اے اُرش ءَ ھپت ماہ ءَ پیش کماندار شے ھک براس ءِ دمگی کونسل ءِ یک گند ءُ نند ھما وھد ءَ لوٹارینیت وھدیکہ براس ءِ درسیں گل وتی کسان ءُ مزنیں اُرشان کنگ ءَ بنت دومی نیمگ ءَ بازیں جیڑہ جنجال ھم بنت یک نیمگے ایردستی ءَ گوں یک جنگ ءِ بندات کنگ ءِ سوب ءَ ھر گل ءُ سرمچار ءِ کر ءَ مڈیانی کم بوگ ءِ جیڑہ دومی نیمگ ءَ چالاک ءَ تاکت وریں دژمن ءُ آئی پیداگیر ھر نیمگ ءَ شنگ شانگ انت – مزلوم ءُ ایردستانی جنگ ھم عجیب بنت وھدیکہ آ بے سوب بہ بنت ھلاس بنت بلے وھدیکہ آ سوبمندی ءَ گوں یک گامے دیم ءَ بہ جن انت گڑا ھر گام چہ پیشی ءَ دو ھمنچو گرانتر انت – سوبمندی ءُ اڑ ءُ جنجال دو شَیانی میان ءَ لکیرانی وڑ ءَ دست گر انت روان بنت تو ھمنچو دیم ءَ روان کن ئے چکاسگ ھمنچو گران تر بنت – بے سوبیں جنگاں چہ مردم وت پُرش انت، بلے مزلومانی سوب مندیں جنگاں چی ھم مردم دلپروش بنت پرچا کہ ھر سوبمندیں جنگانی ھمراھی اڑ ءُ جنجال ھمنچو گیشتر بنت کہ یک لس مردمے ارزانی یک مزنیں اکسے ءَ چہ وتی چماں دور کنت سوبمندی ءَ بیھیال کنت ءُ چہ جیڑہ جنجالاں ھلاس بیت – ھمے ھاتر ءَ اے جنگانی تہ ءَ جسمانی تاکت ءَ چہ گیشیں پھتوئیں نزریہ زلورت انت –

شے ھک ھما ورنائیں سرپرستانی ھمراھی نشتگ ات آ وت یک زانتے اَت ءُ پد ءَ پھتوئیں زانتے ءِ ساھگ ءَ رُستگ اَت کہ وت براس ءِ سوب مندیں اُرشانی سوب ءَ جیڑہ جنجالانی آماچ اِتنت – اود ءَ ھمے پیسلہ بیت کہ ما دژمن ءِ اے منصوبہ ءَ سوبین بوگ ءَ نیل انت کہ آ مارا بھر ءُ بانگ بہ کنت کسان کسانیں ارش سر ءَ بداریت ـ مارا مزنیں اُرش ءِ کنگی انت یک ھنچیں اُرشے کہ آئی ءِ توار دنیا بہ جکسیت یک ھنچیں اُرش ءِ کہ زوراک پد بہ لرزیت ءُ دشمن ءِ لوگاں واؤزاری بہ بیت سرجمیں دنیا سھیگ بہ بیت کہ دژمن دروگ بندگ انت ، ما ھمد ءَ ساڑی انت ءُ وتی ڈیھ ءَ شری ءَ پھازت کنیں –

آئی ءَ پد کماندار شے ھک ءُ دومی سنگت نند انت چاربچار کن انت، وتی ٹارگٹ گچین کن انت پد ءَ ھمے جاہ ءَ سربنت کہ آھانی گورا دنیگت ءَ انچو تاکت ءُ مڈی نیست آ چوں انچوکیں بلائیں کار ءِ کرت کناں؟ شے ھک دومی روچ ءَ براس ءِ بنجاہ ءَ پہ ھال کنگے ھاتر ءَ نیٹورک ءَ رؤت –
(4)
وھدیکے شمے سر ءَ جنگ ءِ آرگ گڑا شما آئی ءَ چہ ھچبر رکیت نہ کن ایت، شما آ جنگ ءَ یلا دست کن ایت بلے الم شمارا آ جنگے بھرے بوگی انت، زور سر ءَ کپتگیں جنگ شما ستر اد ءُ اود ءَ بہ کن ایت آئی ءِ پائدگ بس دژمن ءَ رسیت انت – اگان ما اے ایردستی جنگ ھلاس نہ کُرت گڑا اے مارا ھلاس کنت – دنیا ءَ چہ جتائیں بلوچستان ءِ آجوئی لوٹوکیں سپاھیگ ءِ نیم ساھت ءَ داں وتی بنجاھی کونسل ءِ دیم ءَ ھنچیں یک زور سر ءَ دورداتگیں جنگے ءِ بگیری ءَ اُرش ءِ منصوبہ آھانی دیم ءَ ایر کنگ ات – کہ آئی ءِ سر ءَ چار بچار کنگ ءَ پد منّگ بیت ءُ آئی ءَ چہ پد مڈیانی سر ءَ گپ بندات بیت – شے ھک گوش ایت واجہ من ھنچیں ھساب ءِ جتگ مارا کساس پنجاہ ءَ چہ گیش سرمچارانی لوٹ کپ اِیت کہ آھاں مئے تپاکیں گلانی دمگی کماندار جتائیں اوتاگاں چہ لوٹائین انت – بلے مارا بازیں پوجی سلاہ، راشن، رؤگ آیگ ءِ ھاتر ءَ شانزدہ لک کلدار ءِ زلورت بیت “

اے زرمبشت کہ مدامی مڈی ھوالہ نزور بوگ ءَ ابید شانزدہ لک کلدار یک جاہ کنت ءُ شے ھک داں سر ءِ کنت ـ ءُ اے آپریشن کماندار ھما گچین کنگ بیت کہ ھپت ماہ ءَ پد دژمن ءِ پانزدہ سپاھیگ یک بنجاھی شاھدگ ءِ سر ءَ کُش ایت –

5
دیمے چیزے ماہ کماندار شے ھک ءُ آئی ءِ سنگتانی واست ءَ آسان نہ بنت، انچوکیں بلاھیں آپریشن ءِ دژمن پونز چیر ءَ چہ رازداری ءِ گوم ءَ وتی سوبمندی ءَ سر بہ بیت، بوٹے ءَ شیرے ءِ کد ءَ آرگ ءِ بروبری اِنت بلے دنیائے تہ ءَ چشیں ھچ چیزے نیست کہ نزرئیہ چہ سریچیں تمردے مردے آئی ءَ کُرت مہ کنت –

سَے ماہ ءِ تہ ءَ شے ھک وتی مشن ءَ تیاری ءَ سرجم کنت ـ بلے اے وڑیں وھد ءَ اے مشن ءَ اولی دکّا ھما ٹیم ءَ لگیت کہ آئی ءَ ھال سربوت کہ مشن ءَ ھواریں لھتے سرمچار باجو بوتگ اَنت آھاں دژمن ءِ دیم ءَ سلامی داتگ – بلے نزور نہ بیت بلکیں دوبر چہ بندات ءَ وتی ھکمت املی ءَ بدل کنت آئی ءَ لھتے ماہ گیشیں لگیت –

ھما روچ کیت کہ مشن ءِ ھاتر ءَ در آیگی انت براس ءِ اے کماندار ءِ دست ءَ مشن ءِ نقشہ بیت ءُ آ درسیں سرمچاراں یکجاھی توار پر جنت کہ بیا ات سنگتاں! نوں مشن ءِ درگت ءَ آکری براں گپ جنیں ، درسیں تیاری بوتگ انت ” درسیں سرمچار گل بنت ءُ بچکندنت ءُ ھر یکے یکی دومی ءَ بگل ءَ کنت، ھمے وشی ءِ میان ءَ کماندار شے ھک درسیں سنگتاں اے گوش ایت ءُ آھاں ملور کنت ” کہ سنگتاں ما اد ءَ باز سنگت یکجاہ بوتگ انت نوں مشن ءِ تہ ءَ لھتے بدلی آرگ بوتگ پیسر ءَ مارا ھشتاد ءُ سئے سنگتانی لوٹ بوتگ نوں کہ مشن تہ ءَ لھتے بدلی آرگ بوتگ گڑا آئی ءِ رِد ءَ انچو سنگتانی برگ وت گوریلہ رھبندانی بگیری بیت ـ اشی ءَ ابید مئے گور ءَ انچو مڈی ھم نیست- ھمے ھاتر ءَ مشن ءِ ھاتر ءَ بس چل ءُ پنچ مردم گچین کنگ بیت ” کماندار ءِ گپ اشکنگ ءَ پد یک برے درست ھاموش بنت ھریکی ءِ دل ءَ ات کہ آ بروت گوں، کس ءَ واتر بوگ دل ءَ نہ ات –

شے ھک وتی سنگتانی دیم ءِ ملوری ءَ گندیت یک رندے پد ءَ دیم ءَ گوں سنگتاں کنت گوشیت کہ ” سنگتاں ما پہ زات ءِ ھاتر ءَ ناں آؤکیں پدریچ ءِ ھاتر ءَ جنگ ءَ کنگ انت، سنگتاں! ما لھتے ساھتاں ناں بازیں اگدانی جنگ انت، سنگتاں! ما پہ مرگے ءِ ھاتر ءَ نان زندگ بوگے ھاتر ءَ جنگ انت ، ما گڈسر ءَ نہ ایں بندات ایں، ما کردار نہ ایں مئے تہ ءَ ھر یکے یک کسھے ءُ اے کسھاں دیم ءَ روان بوگی انت اے بس یک جنگ ءِ پڑ انت اے وڑیں بازیں جنگانی پڑ شمے ودار انت، کس دلچل مہ بیت مارا جنگ ءَ ناں بلکیں ما اے جنگ گچین کرتگ گڑا ھر یک سنگتے وتی پڑ ءَ گیپت، کدی آ بزی کنڈگ بیت کدی دشت، کدی بولان ءُ کدی شور ءُ کدی بلوچستان ءِ دگہ کوہ ءُ دمگے بیت ھر سنگتے وت ءَ وتی جنگے پڑ ءِ ھاتر ءَ ساڑی بہ کنت، اے جنگ ءِ پڑ ھر ھما وھد ءَ کاینت ءُ رو انت تا ھما وھد ءَ شھیدی نسیب ءَ مہ بیت یا سوبمندی وت مئے پاداں مہ کپ ایت “

آئی ءَ چہ پد کمادار شے ھک ءَ مھاز ءِ ھاتر ءَ چل ءُ پنچ سنگت جتا کُرت ءُ کوہ ءِ دامن ءَ درست گولائی ءَ نندارینت انت ءُ زمین ءِ سر ءَ نکشہ ءِ ایر کرت ءَ یک سھریں کلم ءِ چہ کیسگ ءَ کشیت ءِ نکشہ ءِ سر ءَ یک جاھے ءَ ٹِک جت گوشت ئِے ” سنگتاں! اد ءَ چہ مئے پند بندات بیت – باند بیگاہ پنچ بچ ءَ ما در کائیں ءُ سھب ءِ پنچ ءَ داں ما پند جنیں ءُ درساں چہ گرانتریں پند مئے ھمے بیت، اے میان کس لیٹ وتی جاہ ءَ سگریٹ روک کنگے ھم اجازت نیست ءُ ھر ھال ءَ مارا پنچ ءَ اود ءَ رسگی انت، اود ءَ آپ ءِ یک چمگے ءُ لھتے درچک ھست، اود ءَ یک سنگتے کیت، ورگ ھم کاریت بلے بانداتگیں پنچ بج ءَ پد مارا راہ ءَ ورگے ھاتر ءَ ھچ نرسیت، بس آپ ءُ بسکوٹ سر ءَ گزارہ کنگی انت، اود ءَ چمگے سر ءَ لھتے سنگتاں رؤگی انت موٹر سیکل آرگی انت تانکہ لھتے سنگت موٹر سینکلانی سر ءَ وتی سپر ءَ بندات بہ کن انت ایندگہ ھرانی بند ءُ بست بوتگ لھتے سنگت ھرانی سر ءَ ساماناں لڈ انت ءُ پند جن انت، اچا دگہ جیڑہ ایش کہ لھتے ھر باز نزور انت ھمے ھاتر ءَ اے راھ ءَ آھانی ھم ھیال دارگی انت -“

کماندار آ درسیں جاھاں سھریں کلم ءِ سر ءَ نشان جنان ات ءُ گوشگ ءَ ات کہ کجا اوشتگی انت کجا اناں ءُ کجام وڑ ءَ شپ ءَ پند جنگی انت ءُ چتور اے پند داں دو ھپتگ ءَ برجاہ بیت –
گڈسر ءَ کماندار ءَ نکشہ ءِ سر ءَ یک جاہ ءَ بلاھیں گول نشان ءِ جت ءُ دیم گوں سنگتاں کُرت گوشت کہ ایش انت بزی کنڈگے ھما جاہ کہ چداں چہ اورماڑہ انچو دور انت ءُ گوادر انچو ءُ ما اد ءَ دژمن ءِ سر ءَ اُرش کنگے ھاتر ءَ سنگر کنیں “
6
” واجہ سنگت درست سلامت انت آس پہ زور جنگ نہ بوتگ مارا اے گمان نہ بوتگ کہ آس انچو تالان بیت ” کماندار شے ھک بنجاھی کونسل ءَ ھال دیگ ءَ ات – درسیں پند جنگے میان ءَ ایندگہ درسیں سنگت سوبمندیں اُرش درگت ءَ گپ اِتاں ءُ آئی ءِ سر ءَ ھیال درشانگ اتاں یا اے پند ءَ دمبرتگ تاں – بلے واتری ءَ پد شے ھک ءِ زھن ءِ تہ ءَ بس دو گپ اتاں کہ آئی سوب ءَ ناں آئی ءَ واب پرواہ ات ناکہ دمبرگ مھسوس بوگ ءَ ات – اولی ایش کہ کجام وڑ ءَ درسیں سنگت وش ءُ سلامتی اوتاگ ءَ زوتاں زوت سر بہ بنت دومی ایش کہ وھدے کہ آئی راہ ءَ ھال رس ات کہ دژمن ھما گاڑی کہ آھاں مانداشتگ ات آ آس پٹرول سوب ءَ تالان بوتگ چریشی دژمن پوج ءِ سپاھیانی لاش سُتکگ انت – آ پمشکہ تکانسر ات کہ اے امل یک دانستہ زانت کتگیں ءِ لیکگ نہ بیت –

آئی ءُ آئی ءِ سنگتانی جنگ انسانیت ءِ ھاتر ءَ ات، آ ھچ وڑ ءَ نہ منیت کہ آ جنگلی لیکگ بہ بیت، آ انسانیت ءِ پھازوک تاں، آ یک دودمانے ءِ داروک تاں، ءُ واھشتی دودمان برباد کن انت آھاں نہ پھاز انت ھمے ھاتر ءَ آ اے جیڑہ ءِ سر ءَ ملور ات آ ایشی ءَ ھم سرپد ات کہ سرجمیں مشن ھال سنٹرل کمان دیگی انت چوش مہ بیت ھمے یکیں ردی ءِ سوب ءَ انچو سنگتانی شپ ءُ روچ ءِ مھنت زوال بہ بنت –

آئی ءَ بنجاھی کمان ءَ درسیں ھال دات انت، آئی ءَ بازیں سوال ءِ کنگ بیت، درسیں تک ءُ پھنات چارگ بوتاں، بنجاھی کمان ءِ گوار ءَ پیسر ءَ درسیں ھال سر اتنت، شیھک ءِ گوشگ ءَ پد اے پدر بوت کہ اے یک ناگتی املے بوتگ ءُ آئی ءِ راستی منگ بوت ، ءُ اے مشن یک سوبمند مندیں مشن ءِ گوشگ بوت –

بازیں گپ باوست ءَ پد شے ھک ءَ سیٹلائٹ بند کُرت، ءُ آئی ءَ انٹینا درکت کیسگ ءَ کُرت ءُ ھپت ماہ پد اولی رند ءَ آئی ءِ دیم رژناہ تر بوت ءُ آ بچکندان ءَ دیم پہ بنجاھی اوتاگ ءِ نیمگ ءَ رؤگ ءَ لگ ایت،- بازیں ماھاں پد مروچی آ دل ءِ سیر ءَ ورگ وارت وش واب بیت –
7
راولپنڈی ءَ آئی ایس پی آر ءِ نیوز چلگ ءَ ات آئی گور ءَ نہ منوکیں گواہ ھست انت کہ بلوچستان ءَ دری تاکت وریں ڈیھانی دست مان انت ءُ آ بلوچ سرمچاراں مزنیں کساسے ءَ مڈی سر کنگ انت – ءُ گیشتریں اُرشاں دری ڈیھانی چیریں ترامگیج وت کنگ ءَ انت –

شال ءَ وتگڑیں زانتکارے نیو اسٹار ھوٹل ءَ وتی چار سنگتانی ھمراھی ءَ دومی پیالہ شیرچاہ ءِ لوٹارینیت ءُ کرونا ءَ پد بلوچ زرمبشت ءِ سر ءَ ٹپاسکاری جنت ءُ گوش ایت کہ سربوتگیں ھالانی رِد ءَ نون بلوچ زرمبشت ھلاس بوتگ –
ناشناسیں جاہ ءَ چہ آجوئی منوگریں دانشور ءَ پیس بُک وتی اسٹیٹس ءَ پوسٹ داتگ ات کہ آئی ءِ تہ ءَ پیرس مینا بازار ءَ بلوچستان بیرک ءِ چنڈگ ءِ ھال درشان کپتگ تاں، نون دومی اسٹیٹس ءَ گوگل ءَ چارگ ءَ ات کہ براس سلاہ بندیں اُرش چوں میان استمانی رھبند ءُ انسانی ھکانی لگتمالی یے –

بلوچستان ءِ کوھانی تہ ءَ کماندار شے ھک ءَ وتی گاٹ ڈوٹی ھلاس کرتگ ءُ ڈوک ءِ سر ءَ چوڑ کرتگیں ھما لوگ ءِ تہ ءَ پُترتگ ات کہ اود ءَ براس ءِ دمگی کونسل دوبر یکجاہ ات- آ سربوت گوشت ئے، سنگتان! درساں پیش مارا وتی مشن درسیں کوتاھینانی ردیانی سر ءَ گپ جنگی انت کہ مئے تہ ءَ کجام نیزوری بچ اِتگ انت اشی پد منی زھن ءِ تہ ءَ دگہ مزنیں اُرش ءِ شوربندی ھست آئی ءِ تیاری انوگ ءَ چہ بندات کنگی انت –

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔