نبشتانک: تو منی پت نہ ئے
نبشتہ کار: ھدایت بلوچ
دی بلوچستان پوسٹ
پنجگور ءَ کالج ءُ ھاسٹل ءِ دور منی زند ءِ وشتریں بھر ات پرچا کہ سنگت ءُ چاگرد ءِ تہ ءَ ات آں ۔ سُھب ءَ کالج ءَ کلاس گِپت بیگاھاں کتابجاہ ءَ گوں سنگتاں نشت ءُ کتاب ونت برے برے بیگاھاں گوازی کُت بازار ءَ شُتاں گشت کت موکلانی روچاں گشت ءُ پکنک ءُ سیل کُت وھدے کالج ءِ دور ھلاس بوت پہ دیم ءِ وانگ ءِ ھاتر ءَ وھدے من کراچیءَ شُتاں اود ءِ زندگی گوں اِد ءِ زندگی ءَ سک باز پرک بوت۔ اود ءَ سنگت ءُ چاگرد اد ءَ ابیتکی ءُ تھنائی گون ھمے تھنائیءَ ھیل زورگی ات گڑا اد ءَ ھمک بیگاھاں وھد ءِ گوازینگ ءَ اوٹل ءِ دپ ءَ نشت ءُ چاھے لوٹائینت ھالتاکے دست ءَ کُت وتی تھنائی گوازینت۔
ھمک روچ ءَ اوٹلءِ دپ ءَ کہ نشتاں مدام دل ءَ گُشت من ءَ اد ءَ درانڈیھی ءَ یک سنگتے بوتیں وھدے من پہ وت ءَ کہ ھچ نہ دیست پد ءَ ھالتاکے زُرت ءُ وانگ ءَ لگ اِتاں ھمک بیگاہ ءِ وڑ ءِ یک بیگاھے من اوٹل ءِ دپ ءَ نشتگاں چاہ دیم ءَ ایر انت من وتی دست ءِ ھالتاک ٹیبل ءِ سر ءَ ایر کُت دست پہ چاہ ءَ بُرت چم چست بوت اَنت داں دیم پہ دیم ءَ یک کسانسالیں ورنایے نِشتگ گوں بلاھیں شلوار ءُ سیاھیں چادر ءَ من زانت اے بلوچے اے مرد ءِ گِندگ ءَ من ھنچو گل بوتاں تھنائی ءُ ابیتکی ءَ دل ءَ وار نہ دات من پاد اتک ءُ شُتاں ھمے ورناہ ءَ را دست کلّئے دات ءُ دومی کُرسیءِ سر ءَ نشتاں۔
چہ ھال انت تو بلوچے ئے؟ گون منی سلام دیگ ءَ ایشی ءِ تب ھنچو وش بوت گُش ئے زاناں ایشی ءَ من ءَ پیسر ءَ دیستگ ات ئِے۔۔ من ھنچو مارت اے مرد منی وڑ ءَ تھنا انت۔۔ سلامءُ دُروت ءَ رند من ایشی ءَ جُست کت تو کجا نشتگ ئے؟ ورنا ءَ گُشت من گوادر ءَ نشتگ آں اد ءَ کراچی کمپنی ءَ کار کنگءَ آں من ءَ جُست ئِے کُت تو کجا نشتگ ئے؟ من پسّو دات من پنجگور ءَ نشتگ آں اد ءَ پہ وانگءَ اتکگ آں۔
من ءُ اے مرد ءَ گْونڈُکیں بیگاھے پہ جُست ءُ پُرس گوازینت من گل بوتاں من ءَ منی وڑیں ھم زبانیں سنگتے بوت ما ھمک بیگاہ اھت ءُ ھمے اوٹل ءِ دیم ءَ نشت ءُ وتی ابیتکی پہ گپ ءَ گوازین من یک ھبرے شمُوشت ورنا ءِ نام سالم ات۔
سالم سکیں وش تب ءُ نرم ھبریں مردمے ات منی ءُ سالم ءِ نزیکی ھنچو برات ءِ وڑ ءَ ات ھمک روچ سُھب ءَ من وانگجاہ ءَ کلاس گپت سالم ءَ ھمک سھب کار کُت بلے بیگاھاں ما ھمے اوٹل ءِ دیم ءَ نشت ءُ ھمنیاد بوتیں
من یک روچے سالم ءَ جُست کُت زاناں بلوچستان ءَ کار نیست کہ تو اد ءَ درامدانی تہ ءَ نشتگ ئے ءُ کار کن ئے۔
سالم ءَ وتی سر جھل کُت ءُ بے توار بوت من ھیران بوتاں پد ءَ جُست کت سالم تو ھبر نہ کن ئے زاناں تئی جیڑہ چی انت؟ تو پسو نہ دات۔ سالم ءَ سر چست کت چم ئِے پُر ارس ات اَنت گشت ئِے من ءَ ھچ جیڑہ نیست بس اد ءِ کار شرتر انت۔ من ءَ جُست ئِے کت چون انت تئی وانگ؟ جُھد ئِے کُت من اے ھبر ءَ گار بہ کناں۔
من پسو دات منی وانگ شر انت۔ تو ھبر ءَ گار مہ کن تئی جیڑہ چی انت سالم ءِ چم پُر ارس ات اَنت زبان ئِے ھمراہ داری کنگ ءَ نہ ات من ءَ گشت ئِے ھدایت جان تو منی برات ءِ وڑ ءَ ئے اسل ءَ ھبر چُش انت من کسانی ءَ نشہ ءِ آماچ بوتگاں منی کماشیں مات ءُ پت ءَ باز جُھد کُتگ کہ تو وت ءَ را چہ اے سلیں بیماری ءَ بہ رکّین بلے من ھچ سرپد ء ھبر نہ بوتگاں گُڑا منی کماشاں ھمے ھبر دیم ءَ آرتگ کہ ما سالم ءَ آروس دے اِیں زمہ دار بیت بلکیں نشہ مہ کنت۔ 27 سالءِ اُمر ءَ منی آروس بوتگ آروس ءَ رند منی زال ءَ من ءَ سک باز گشت کہ تو اے نشہ ءَ یلا کن کار روزگارے بہ کن کہ مئے زند وشھال بیت من اے گپ ھچ نہ مار اِت کہ من ھراب کنگ ءَ آں ۔
بازیں گُشگاں یک وھدے من نشہ کم کُرتگ بلے گوں من یلہ کنگ ءِ جُھد نہ بوتگ آروس ءِ سیمی سال ءَ من ءَ جنکیں چکے بوت۔ لاپ ءُ ھرچ پت ءِ کوپگاں بوتگ من سک بے پرواہ بوتگاں کمے مدت ءَ رند من ھما نشھی ئیں سنگتانی دیوان ءَ شُتاں روچ پہ روچ منی نشہ گیشتر بوان بوت ۔ لوگ ءِ تہ ءَ ناتپاکی ءُ ھبر بندات بوت بلے منی گوش ءَ مورے ءَ اوں نہ وارت کہ من اے نشہ ءَ وت ءَ در بہ کناں یک شریں انسانے، یک شریں پتے، یک شریں جودے، جوڈ بہ باں یک روچے منی جنین بیمار بوت بلوچستاں ءِ ڈاکٹراں گشت ایشی ءِ الاج اد ءَ بلوچستان ءَ نہ بیت ایشی ءَ را کراچی ءَ بَر اِت منی پت ءُ مات چہ منی نیمگ ءَ دلیکیم ات انت۔
منی پت ءَ اد ءَ ءُ اود ءَ چندہ کرتگ ءُ وتی نشار پہ کراچی ءَ بُرت پہ الاج ءَ بلے من وتی نشہءَ دزگٹّ اتاں منی گونڈکیں جَنک مات ءِ چُل ءِ سر ءَ چوروے ءِ وڑ ءَ ات ۔
گون درتگیں گُداں ءُ شپادیں پاداں۔ بلے منی چم گش ئے کُور ات انت۔ داں یک ماھے ءَ منی جنین ھمود ءَ نادْراہ جاہ ءَ کپت یک روچے مئے بازار ءِ مسیت ءَ جارے ءِ توار بوت کہ پلانی جنک چہ دنیاہ ءَ شُتگ –
منی چماں دنیا گش ئے تھار بوت من وتی نشہ ءِ سامان دور دات ءُ دیم پہ لوگ ءَ تچان بوتاں وھدے لوگ ءَ رس اِتاں چاراں منی جنین ءِ میت لوگ ءِ تہ ءَ ایر انت مات ءُ گھار زار ءُ پریات کنگ ءَ آں منی زھگ سک گریوگ ءَ ات من دور کُت وتی زھگءَ بڈّ ءِ بہ کناں۔۔ منی زھگ ءَ من ءَ دو دست دات ءُ گشت ئِے منی کّر ءَ میا تو منی پت نہ ئےمن نوں زانت من چونیں بلاھیں شومے آں پہ من اے دُگنیا ءَ ھچ پشت نہ کپتگ-
منی چم ارسیگ اتاں ءُ سالم ءِ ارس ٹُپ ٹُپ رچگ ءَ اتاں من ءَ گشت ئِے ھدایت جان من نوں آ لوگ ءَ پہ کجام شرم ءَ بہ رواں کہ منی زھگ من ءَ وتی پت نہ لیک اِیت من ھمد ءَ کار کناں بس زراں پہ وتی مات ءُ پت ءِ سر ءَ روان دیاں اے دمان ءَ من ءَ ھچ لبز نیست اَت من سالم ءَ چون تسلہ بہ دیاں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔