شال ءَ پاکستانی چیریں ادارھانی واستا کارکنوکیں کارمند ءِ لوگ ءِ بیتگیں اُرش ءِ زمہ واری ءَ منّیں – بی ایل اے

شال ءَ مھترھندیانی چاریگ غلام حسین ءِ لوگ ءِ سر ءَ کرتگیں بمب اُرش پہ مھترھندی چاریگانی واستا یک بیھارے – جیئند بلوچ

دی بلوچستان پوسٹ

سربوتگیں ھالانی رِد ءَ بلوچستان ءِ بنجاھی شھر شال ءَ سریاب دگ ءِ سر ءَ بروری ءِ دمگ ابراہیم زئی میتگ ءَ ناشناسیں مردماں لوگے ءِ سر ءَ دو دز بمب چگل داتگ ءُ شُتگ انت –

اُرش سندھ ءِ جاھمنند ڈاکٹر غلام حسین ءِ لوگ ءِ سر ءَ بوتگ –

دمگی پولیس ءِ رِد ءَ اُرش ءَ چہ آئی ءِ لوگ ءَ تاوان رس اِتگ بلے ھچ وڑیں جانی تاوان نہ بوتگ – اُرشکار درآیگ ءُ رؤگ ءَ سوبین بوتگ انت ءُ آھانی پٹ ءُ پول برجاہ انت –

دومی نیمگ ءَ بلوچ سلاہ بندیں آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ڈاکٹر غلام حسین لوگ ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ شال ءِ شھر ءَ بروری دگ ءَ ابراھیم زئی میتگ ءَ پاکستانی پوج ءِ کمکار ڈاکٹر غلام حسین ءِ لوگ ءِ سر ءَ دز بمب اُرشے کُتگ – اے اُرش یک بیھار بوتگ ھمے ھاتر ءَ اُرش ھنچیں رنگے ءَ کرتگ جانی تاوان مہ بیت –

جارکش ءَ گوشتگ کہ ڈاکٹر غلام حسین پاکستانی فوج ءِ گوشگے پد ءَ بلوچ راجی زرمبشت ءِ بگیری ءَ کار کنگ انت – آ پاکستانی پوج ءَ گوں بلوچ دژمنی ءَ بھرے بوتگ آئی ءَ زرمبشت بگیری ءَ پندل سازی کرتگ ءُ دیم ءَ برتگ انت –

جارکش جئیند بلوچ ءَ گوشتگ کہ اے اُرش پاکستانی پوج ءُ چیریں ادارھانی کارکنوکانی ھاتر ءَ یک بیھارے – ھر ھما کس پہ لب ءُ ملام ءَ دژمنیں پوج ءَ ھوار بیت ءُ بلوچ راجی زرمبشت ءِ بگیری ءَ کار کنت آ بکشگ نہ بیت چاھے آ ھرکس بہ بیت ھر وڑیں پھناتاں گوں وتی کتکاریاں چیر دیگ ءِ جھد ءَ بہ کنت –