کیچ ءَ پاکستانی پوج ءِ لشکر کشی

دی بلوچستان پوسٹ

کیچ ءِ ھند گورکوپ ءَ یکرندے پد ءَ چہ پاکستانی پوج ءِ نیمگ ءَ لشکر کشی بندات کنگ بوتگ – لشکر کشی ءَ زمینی پوج ءِ ھواری ءَ جنگی بالی گرابانی کمک ھم گون انت –

اھوالکارانی رِد ءَ تنی وھدی دمگ ءِ تہ ءَ مزنیں کساسے ءَ پاکستانی پوج اتکگ ءُ سر بوتگ مزنیں لشکر کشی ءِ تیاری کنگ بیتگ وھدیکے زمینی پوج ءَ بالی گرابانی کمک ھم گون انت ـ کہ سھبگین انت بُرز ءَ بال اَنت-

دمگ ءِ درسیں راہ ءُ در بند کنگ بوتگ انت ءُ مھلوک ءَ چیک ءُ تان کنگ ءَ انت – بلے دنیگت ءَ ھچ وڑیں جانی ءُ مالی تاوان ءُ دزگیری ءِ ھال نیست –

زانگ بہ بیت گورکوپ ءَ ھوار بلوچستان ءِ جتا جتائیں دمگاں پاکستانی پوج ءِ لشکر کشیانی رِد یکشل ءَ برجاہ انت بازیں کساسے ءَ مھلوک آوار جنی ءَ پد بیگواہ کنگ بوتگ انت – کہ اھانی تہ ءَ پیر ءُ زالبولاں ھوار مزنین کساسے ءُ ورنائیں نودربر ھوار انت – سیاسی ءُ چاگردی مردمانی نیمگ ءَ ھم پاکستانی پوج ءِ زوراکی ایرجنگ بوتگ ءُ چہ میان استمان ءَ لوٹ کنگ بوتگ کہ لشکر کشی بگیری ءَ پاکستان ءِ سر ءَ گامگیج بہ زور ایت –

ھمے زوراکیانی پژدر ءَ لھتے روچ ساری بی این پی ءِ سرکماش اختر مینگل ءَ ھم وتی ٹویٹ ءِ تہ ءَ بلوچستان ءَ بوکیں پاکستانی پوج ءِ زوراکی ایرجتگ ءُ یک اکسے شنگ کرتگ – اکس ءِ تہ ءَ پاکستانی پوجے زوراکی ءُ بلوچ زالبول گندگ بوگ ءَ انت –
آئی وتی ٹویٹ تہ ءَ نبشتگ کہ اے کشمیر نہ انت ءُ ناکہ کشمیر اے وڑ اِنت اے بلوچستان انت کہ اد ءَ پاکستانی پوج لس زالبول اش انگیر کرتگ ءُ تُرس ءُ بیم اش تالان کرتگ –