ڈیرہ بگٹی ءُ ھرنائی ءَ کوھنیں دشمنی ءِ جنگ ءِ سوب ءَ دو مردم بیران، زالبولے ءَ ھوار چار کس زدگ

دی بلوچستان پوسٹ

بلوچستان ءِ دمگ ڈیرہ بگٹی ءِ ھند سوئی ءُ سلاہ بندیں مردمانی تیرگواری ءَ یک مردمے بیران ءُ دس زدگ بیتگ اَنت –

بیران بیتگیں مردم ءِ پجار زنو خان بگٹی ءِ نام ءَ پجارگ بیتگ ءُ زدگ بیتگیں ھردوک بیران بیتگین ءِ زھگ گوشگ بیگ ءَ اَنت –

دمگی پھزدارانی رد ءَ تیرگواری ءِ سوب کوھنیں دشمنی ءِ سوب ءَ بیتگ –

ھمے وڑ ھرنائی ءِ دمگ بابیان ءِ میتگ تکہ زیریں ءَ دو ٹکانی میان ءَ زمین ءِ جیڑہ ءِ سر ءَ یکے دومی ءِ ھلاپ ءَ سنگر بند بیتگ اَنت ءُ تیرگواری ءِ سوب ءَ یک زالبول ءُ یک مردینے بیران بیتگ اَنت ءُ یک زالبولے زدگ بیتگ –

دمگی مردمانی رد ءَ ھرنائی ءَ ترین ٹک ءِ دو ٹک علیانی ترین ءُ تیانی ترین ءِ میان ءَ یک سد ءُ نوزدہ سالی ئیں جنگ ءُ دلچِلی بیتگ اَنت کہ چریشی ءِ سر ءَ تنی وھدی بازیں جنگ بیتگ اَنت- بلے تنی وھدی اے زمین ءِ جیڑہ نہ گش اِتگ ءُ جیڑہ ءِ گیش ءُ گیوار کنگ ءَ دو نومبر دوھزار ءُ نوزدہ ءَ دست ءُ دروتی بیتگ اَنت بلے اے دست ءُ دروتی ءِ سر ءَ مردم کڈن نہ بیتگ اَنت –

دمگی مردمانی رد ءَ ترین ٹک ءِ دوئیں ٹکانی میان ءَ زمین ءِ جیڑہ نوزدہ سد ءُ یک ءَ بندات بیتگ، کہ چریشی ءَ ٹکی سروکانی نیمگ ءَ دیوان کنگ بیتگ اَنت کہ اشی ءِ اولی دیوان نوزدہ سد ءُ ھبدہ ءَ بیتگ، دومی دیوان نوزدہ سد ءُ چِل ءُ شش ءَ بیتگ، سیمی دیوان نوزدہ سد ءُ چِل ءُ ھشت ءَ بیتگ چارُمی دیوان نوزدہ سد ءُ ھشتاد ءَ بیتگ، پنچمی دیوان نوزدہ سد ءُ ھشتاد ءُ پنچ ءَ بیتگ، ششمی دیوان دوھزار ءَ بیتگ، ھپتمی دیوان دوھزار ءُ سیزدہ ءَ بیتگ ءُ دراھیں دیواناں پد ھم اے جنگ ءِ آسری نہ بیتگ ءُ دیوان پروشگ بیتگ اَنت –