زَھیر: سنگت فیروز بلوچ ءِ نام ءَ
عزیز اعجاز
دی بلوچستان پوسٹ
بے وَسیں اَرز
راج ءِ رھبر پھک کُور ءُ ھُشکیں سراں
بَلے
انگت ءَ پہ شان ءِ پھر بنداں گُش آں
بیا کہ دِیریں ترا
بیا کہ کِشکاں تئی اِیراں چم مئے گُشے
بیا کہ مات ءَ تئی ماسگ ءِ بندگ ءَ رند
گِریتہ ءُ اَرز ءِ کتہ
کد بیت کہ بیائے شپ ءِ
وابءُ آگہ بہ باں
چم لُنجیں شپاں
ءُ من
تئی راہ ءَ بباں
تراولیں ھالے ءَ بباں
پہ ترا بگنداں روچے من
ساھتاں سالونکی دوبر
بام شِنگ ایت
واب سرجم نہ بیت
روچ پیلوشتگیں کھریں برنزاں کپ ایت
واب بے مانا بیت
مات ءِ مونجا بیت
سک ابیتک ءُ تانکسُر
بیت چُک ءِ بیگواھی ءَ
مات لوٹ ایت پسّو ءَ جُست ءَ یکیں وتی
مات ءِ پیم ءَ دگہ اوں کسے
الم ءَ پہ چُکے ءِ دیداں زَرایت
چُک الم ءَ ماتے مھر ءَ زَر ایت
باریں چُنت دگہ پیم ءَ منی
ڈاہ ءَ جَنت زند ءِ وتی
کسے ءِ بہ روت اے جست ءَ بکن
مکھیں مات ءَ ھما
ھُشک ءُ بے کاریں چہ گنجیں گَماں
بے توار ءُ اَبیتکیں دَنزیں ترانگانی تہ ءَ
گِریتگیں چماں بچار
آرس اِش گیش نام ءَ نہ بیت
آ کہ نہ بیت گِلگدار اے دما
چُک بے نپر رنگراھے ءَ
راھدربر ءِ رھشوانی ءَ پشت دمکاں کپ ایت
یک نازاکیں چُک ءِ دگہ چو ترا
کہ راھشوان ءِ زور پَشیں واجھی ءَ
زندے وشتامیں لزتاں چہ گِسر
زند ءُ مرگ ءِ رنگراھاں کپ ایت
بس بکن
اے اَرز اِنت منی
بند بکن
ایش مُپتیں فیسبکی پُوسٹاں وتی
ایش بے نپیں سیاست ءَ وتی
ایش سُبکیں ھِیل ءُ ھادتاں وتی
نا کارے پجّا راج ءِ گَماں
نیکہ زان ئے تو اِشک ءِ مانا ءُ متلب ءَ
باور بکن
سدک بکن
بیسہ بکن
آجزیں اَرز ءَ شر گْوش بہ دار تو منی
گوشاں پچ بکن
درداں نہ سَگگیں بہ مار
مات ءِ ترونگلیں آرساں بہ چار
ھِیسکاریت ءُ پلپٹ ات چہ یاتاں ھما
کہ
چُک چہ گَرانیں رَنجاں گْوز ایت
دل منی رِیش بیت
ھمُک درد آئی ءِ بیت
ھر دمان ءَ
کُش ایت من ءَ کَبر کنت
بس ایوک یکیں ھمے
گِلگ بلکیں تئی سر ءَ پش کپ ایت
کہ
تی بے نپیں رھشوانی ءَ
بچ منی زندان کُتہ
کوٹیءَ تھار ءُ بیمناکیں
بچ منی بندیگ کُتہ